Павелонь сёрмац Риму 9 - Од Соткс Новый Завет на мордовском-мокша языке 2016

Шкайсь кочказе Израильть

¹ Мон корхтаса видеть и кемокстаса тянь Христость лемса. Мон аф кяльготнян и тянь кемокстасы монь ваймовайгялезе, кона вятневи Иняру Ваймопожфса.

² Монь оцюдонга оцю ризфозе, и седисон пефтома сярятьф

³ ялганень – фкя веронь ломаннень инкса! Сяда пароль эстейне улемс вастозост сюдофокс и Христость эзда явфокс.

⁴ Синь Израилень ломатть: Шкайсь тиезень синь Эстейнза идькс и няфтезе тейст Эсь иневалдонц. Синь мархтост Сон ладясь соткст и макссь тейст кой, тяка лангс макссь тейст озксвятема и Шкаень надияфтомат.

⁵ Синнет ульсть кунардонь пингонь атянь-атятневок, и синь эздост ломанькс шачсь Христос, семботь лангса ащи Шкайсь, кона бславаф пефтома пингс! Аминь.

⁶ Но тя аф корхтай сянь колга, бта Шкайсь ашезе пяшкоде Эсь надияфтоманц. Вдь аф сембе израиленнетне афкуксонь Израильсь.

⁷ И аф сембе Авраамонь эзда шачфне тейнза афкуксонь итть, но Шкайсь мярьгсь Авраамонди: «Исааконь эзда шачфне лемдевихть тейть уноконь-унококс».

⁸ Стане, аф сембе Авраамонь эзда шачфне лувовихть Шкаень идькс, а аньцек сятне, конатнень шачемасна ульсь надияфтф Шкайть эзда.

⁹ А надияфтомаса ульсть тяфтама валхт: «Кизода меле Мон тага саян тяка пингть, и Саррань кармай улема цёрац».

¹⁰ И тя аф сембе. Ревеккань цёранзон ульсь фкя-сяка алясна, минь атянь-атяньке Исаак.

^11-12 Мзярда иттне нинге афи шачендсть и мезевок ашесть кенере тиемс, аф цебярь, аф кальдяв, Шкайсь ни мярьгсь Ревекканди: «Оцюсь кармай ёмлать лангс покодема». Тяфта Шкайсь няфтезе: Сон кочкась Эсь мяльсонза, аньцек тердеманц коряс, аф ломанень тевть коряс.

¹³ Сёрматфксса тяфта и корхтави: «Иаков тейне кельговсь, а Исав аердавсь».

¹⁴ Мезе тянь лангс астама? Шкайсь тиенди аф видеста? Прокс аф!

¹⁵ Моисеенди Сон мярьгсь: «Кинди мялезе, сянди няфтьса кельгозь ужяльдемазень, кинь мялезе ужяльдемс, сянь ужяльдьса».

¹⁶ Тяфта, сембось тя ащи аф ломанть мяленц и путф виенц эзда, а Шкайть кельгозь ужяльдеманц эзда.

¹⁷ Сёрматфксса Шкайсь корхтай фараонти: «Мон путыхтень тонь оцязоркс ва мес: няфтемс тонь лангсот Эсь виезень и марнек масторлангса тиемс содавиксокс Монь лемозень».

¹⁸ Лисенди, Шкайсь Эсь мяленц коряс финцнень ужяльдьсыне, а лиятнень седиснон кевонзафтсыне.

Шкаень кяжсь и кельгозь ужяльдемась

¹⁹ Тон кизефтьсамак монь: «Эста мезенкса Шкайсь муворгофнесыне ломаттнень? Дяряй киньге ули виец молемс Сонь мяленц каршес?»

²⁰ Но кият тон, ломань, пялькстомс Шкайть мархта? Кали мярьги кядьгонясь кядьгонянь тиити: «Мезенди тяфтамкс тиемайть?»

²¹ Мезе, кали кядьгонянь тиить аш виец фкя-сяка сёвоньцта тиемс фкя питни кядьге и фкя стакшинь кядьге?

²² Тяфта тись Шкайське: Сон ёрась няфтемс Эсь кяженц и Эсь виенц. Сяка Сон куватьс сатфтозе кирдемшканц ня кядьготнень мархта, конат срхкафнезь кяженц и конат эрявсть тапамс.

²³ Тяда башка Сон путсь мяль няфтемс пефтома оцю иневалдонц ся кядьготнень лангса, конатнень Сон Эсь кельгозь ужяльдеманц вельде аноклазень иневалдти.

²⁴ Кельгозь ужяльдемань кядьготне – тя минь. Минь сембонь тердемазь Шкайсь, аф аньцек еврейхнень, тякокс лия ломаньтналхненьге.

²⁵ Осиянь книгаса Сон корхтай тянь колга: «Ломаньтналть, кона аф Моннель, лемдьса Монценнекс, и аф кельговить – кельговиксокс.

²⁶ И ся вастса, коса азфоль тейст: "Тинь аф Монь ломаньтналозе", – тоса синь улихть лемтьфт эряй Шкайти идькс».

²⁷ А Исаия ювади Израильть колга: «Улендяряй израиленнетнень лувкссна оцюведень шувар лаца, сембе сяка идеф ули аньцек лядыкссь.

²⁸ Вдь Азорсь тисы тевть педа-пес и курок пяшкодьсы сонь видешить коряс. Апак абонкшнек Азорсь аделасы тевонц масторть лангса».

²⁹ Эста лиси тяфта, кода ингольпяли азозе Исаия: «Кда Саваоф Азорсь афоль када тейнек юромонь поладыхть, минь аралеме Содомть лаца, и шаролеме Гоморрать лангс».

Израильсь и Пара кулясь

³⁰ Ина мезе лисенди? Лия ломаньтналхне, конат ашесть вешенде видексшинь эряф, сатозь сонь, мусть видексшинь эряф, кона кемамать эзда.

³¹ А Израильсь, кона коень ванфтомать вельде ёразе сатомс видексшить, ашезь пачкоде тейнза.

³² Мес? Сяс мес синь нежетькшнесть аф кемамать, а коень тефнень лангс. Тяфта синь пупордасть «пупордамань кевть» ланга,

³³ кода тяштьф Сёрматфксса: «Вов, Мон путан Сиону кев, и кармайхть ланганза пупоряма, кев, конань ланга синь прайхть. Но ся, кие кемай Тейнза, аф сувай визькс шамас».