Павелонь сёрмац Риму 7 - Од Соткс Новый Завет на мордовском-мокша языке 2016

Тинь мянтьфтядязь Моисеень коенц эзда

¹ Кемай ялгат, (мон корхтан сятненди, конат содасазь койть), дяряй тинь аф содасасть, койсь азорондай ломанть лангса аньцек мзярда сон шиса?

² Кепотьксонди, койсь сотнесы рьвакс туф авать мирденцты, мзярс ся шиса. Но кулондяряй мирдсь, авась мяни воляс койть эзда, кона сотнекшнезе мирденцты.

³ Тяфта, кда сон мирденц пингста туй лиянди, сон лувови полань полафникс. Но кда кулы мирдец, эста койть вельде авась ни апак сотт кулофти и лиянди рьвакс лисемста аф лувови полань-полафникс.

⁴ Тякось тиньге мархтонт, кемай ялгане: Христость куломста тиньге, кода Сонь ронгонь пяльксонза, кулоде койти. Тяфта тинь Лияти максфтада, Сянди, кие ульсь вельмафтф кулофнень эзда. И тяфта тейнек ули кода покодемс Шкайти.

⁵ Мзярда минь эряме колаф обуцяньконь коряс, эста пежу мяльхнень, конатнень крьвяснезень койсь, ульсть вийсна ронгоньконь лангса, и синь покодсть аньцек куломати.

⁶ А тяни минь куломе койти, кона тяда инголе кирдемазь эсь кядялонза. Тяфта минь мянеме койть эзда и тяни покоттяма Шкайти одкстоптф Ваймопожфса, а аф кода инголи, мзярда минь эряме сёрматф койть коряс.

Койсь и пежесь

⁷ Мезе тянь лангс астама? Дяряй койста лисенди пежесь? Прокс аф! Но кда аф койсь, мон афи содалине, мезе стамсь пежесь. Кда койсь афолезе аза: «Тят пута сельме маластоцень уликс-паронц лангс», – мон афи содалине, мезе стамсь сельмонь путомась.

⁸ Пежесь мусь кошардомвалса эстейнза киня васькафтомс монь и вельденза крьвястсь моньцон эрь мезень лангс сельмонь путома. Пежесь койфтома кулоф.

⁹ Ульсь пинге, мзярда мон эрянь койфтома, но кодак эвондась коень кошардомвалсь – пежесь эреклась,

¹⁰ а мон кулонь. Тяфта кошардомвалсь, конанди эряволень вятемс эряфти, шарфтсь тейне куломанди,

¹¹ сяс мес пежесь мусь кошардомвалса эстейнза киня васькафтомс монь, а сяльде кошардомвалть вельде шавомань.

¹² Сембе сяка, койсь иняру, и сонь кошардомвалоцка иняру, видексшинь и пара.

¹³ Но кали тя парось кандсь тейне кулома? Прокс аф! Пежесь тиезе тянь. Тяфта сон няфтезе эсь афкуксонь шаманц и пароть вельде кандсь тейне кулома. Лисенди, кошардомвалть вельде сядонга шарьхкодевсь, конашкава кальдяв пежесь.

¹⁴ Вдь минь содасаськ, койсь Ваймопожфонь. А мон ломанян ронгонек-пондонек и мифан урексшис пежети.

¹⁵ Мон монць аф шарьхкодьса, мезе тиендян, сяс мес тиендьса аф сянь, мезе мялезе, а сянь, мезть афолине няе.

¹⁶ Но кда мон тиендьса аф сянь, мезе мялезе, эста мон лувса койть цебярькс.

¹⁷ Сяс лисенди, тиись аф мон, а потмосон эряй пежесь.

¹⁸ Мон содаса: монь эсон, лиякс мярьгомс, колаф обуцясон, аш мезевок цебярь. Монь мялезе тиемс пара, но сон тейне аф тиеви.

¹⁹ Ся пароть, конань мялезе тиемс, аф тиендьса; а кальдявть, конань аш мялезе тиемс, тиендьса.

²⁰ Но кда мон тиендьса сянь, мезе аш мялезе, лисенди, тянь тиендьса аф мон, а пежесь, кона эряй потмосон.

²¹ Тяфта, мон панжень эсьсон кой: мзярда ёран тиемс кодамовок цебярь, монь эздон лиси кальдяв.

²² Эсь потмован мон кеняртькшнян Шкаень койти,

²³ но ронгсон мон няян лия кой, кона тюри монь потмонь ёнезень мархта. Сон тиендьсамань монь урекс пежеть коенцты, кона покоди монь ронгсон.

²⁴ Мон павазфтома ломанян! Кие мянтьфтсамань монь тя куломань канды ронгть кядялда?

²⁵ Сюконян Шкаезти – Сон мянтьфтемань монь Иисус Христос Азороньконь вельде! Лисенди тяфта, эсь потмован мон покодян Шкайть коенцты, а эсь колаф обуцязень коряс – пежень койти.