Павелонь сёрмац Риму 6 - Од Соткс Новый Завет на мордовском-мокша языке 2016

Христосонь ломанць пежети аф уре

¹ Мезе ина тяда меле минь астама? Тага карматама ингольцеть лаца тиендема пежет Шкаень пароказнеть касфтоманкса? Прокс аф!

² Вдь минь куломе пежети – кода ина тейнек тага эрямс пежеса?

³ Кали аф содасасть: сембе минь, кит кстиндафтозь пряснон Иисус Христость мархта сотовоманкса, тянь вельде куломе мархтонза.

⁴ Тяфта, кстиндамста минь куломе Сонь мархтонза и улеме калмафт мархтонза ва мес: кода Христос вельмафтфоль кулофста Алянц инь оцюшинц вийса, тяка лаца миньге карматама эряма од эряфса.

⁵ Кда минь фкя-тяка куломаса сотовоме Сонь мархтонза, эста и вельматама Сонь лацонза,

⁶ вдь минь содасаськ: ташта ломаненьке эськотьф Христость мархта крёз лангс минь пежу обуцяньконь виенц юмафтоманкса, афолеме уле пежети урекс.

⁷ Кулофсь воляшиса пежеть эзда.

⁸ Минь кематама, кда минь куломе Христость мархта, эста эрямска карматама Сонь мархтонза.

⁹ Минь содасаськ: Христоссь, кулофнень эзда вельмафсь, мзярдонга ни аф кулы, куломать аш азорксшиц ни Сонь лангсонза.

¹⁰ Мзярда Иисус кулось, Сон весть и сембе пинкненди кулось пежети. А мес тяни эряй, тяни эряй Шкайти.

¹¹ Тяконь лаца тиньге, конат сотфт Иисус Христос Азороньконь мархта, лувость прянтень кулофокс пежети, но шистоннекс Шкайти.

¹² Сяс катк пежесь аф азорондай куломанди максф ронгонтень лангса, и тясть кулхцонда сонь визькс мялензон.

¹³ Тясть макссе пежети ронгонь кодамонга пяльксонтень кярьмодемакс кальдявонь тиеманди. Тянь вастс максость прянтень Шкайти, кода ломатть, конат ётасть куломаста эряфти. Эсь ронгонь пяльксонтеньге максость Шкайти кярьмодемакс пара тевонь тиеманди.

¹⁴ Катк оду аф азорондай лангсонт пежесь, сяс мес тинь Шкаень пароказнеть алотада, а аф койть.

Христосонь ломанць уре Шкайти

¹⁵ Тяфта ина мезе? Карматама тиендема пежет, сяс мес минь лангсонк тяни аф койсь, а Шкаень пароказнесь? Прокс аф!

¹⁶ Кали аф содасасть: кда тинь макссасть эсь прянтень киньге кядялу урексшис, эста тинь афкукс кармаде улема сянди урекс, кинь кулхцондсасть? Тинь али пежети уретяда, мезсь вяти куломас, али Шкаень кулхцонды уретяда, мезсь вяти Шкайть мархта ладямати.

¹⁷ Мзярда-бди тинь уледе пежети урекс, но тяни, сюконян Шкайти, марнек седиса кармаде кулхцондомонза ся тонафтомать, конанди тинь максость эсь прянтень.

¹⁸ Тинь нолдаводе пежеть урексшинц алда и араде урекс, конат тиендихть видексшить коряс.

¹⁹ Мон тянь корхтаса стама кяльса, кона сяда шарьхкодеви тейнть. И кода тинь мзярда-бди максость прянтень урексшис аф арушити и койфтомошити – тиендемс койфтома тефт, тяфта тяни максость ронгонтень урексшис видешити – тиендемс иняру тефт.

²⁰ Мзярда тинь уледе пежети урекс, тейнть ашезь эряв пяшкотькшнемс Шкайть мяленц.

²¹ Кодама лезкс тянь эзда тинь сяводе? Сяводе сянь, мезьда тяни визттяда, сяс мес сонь пец – тя куломась.

²² Но тяни, мзярда тинь нолдафтада воляшис пежеть эзда и араде Шкайти урекс, тинь сяводе аруши, конань песта тейнть максови пефтома пингонь эряфсь.

²³ Питнесь, кона пантфтови пежень тиеманкса, – кулома, а Шкаень казнесь – пефтома эряма Иисус Христос Азороньконь мархта.