Павелонь сёрмац Риму 4 - Од Соткс Новый Завет на мордовском-мокша языке 2016

Авраам лувовсь видексшинь ломанькс кемаманц инкса

¹ Эста мезе минь астама Авраам атянь-атяньконь колга? Мезе сон сатсь?

² Кда сон лувовсь видексшинь ломанькс тевонзон инкса, эста ульсь тейнза мезьса шнамс прянц, но аньцек аф Шкайть инголе.

³ Мезе корхтай Сёрматфкссь? «Авраам кемась Шкайти, и тянкса Шкайсь лувозе сонь видексшинь ломанькс».

⁴ Покодити макссихть аф казне, а пандыхть тевонкса.

⁵ Но кда ломанць надияй аф эсь тевонзон лангс, а кемамать лангс и кемай Шкайти, кона нолясыне пежуть шумонзон, эста Шкайсь лувсы сянь видексшинь ломанькс кемаманц инкса.

⁶ Вчёк тянь кирдезе мяльса Давид оцязорське, мзярда павазукс лемнезе сянь, конань Шкайсь лувсы видексшинь ломанькс тевонзон лангс апак ватт:

⁷ «Павазуфт сят, конатненди нолдазь кальдяв тевснон и конатнень нардафт пежесна.

⁸ Павазу ломанць, конанди Шкайсь аф лувсы муворшикс сонь пеженц».

⁹ А тя павазсь максови кинди: аньцек керф киськопе еврейхненди али апак керф лия ломаньтналхнендинге? Вдь минь корхтатама: «Шкайсь лувозе Авраамонь видексшинь ломанькс кемаманц инкса».

¹⁰ Мзярда ина тя лиссь? Мзярда керфоль сонь киськопец али мзярда нинге апак керфоль? Керфтомада инголе, аф меле.

¹¹ Киськопень керфтомась ульсь кода тяштькс, кона няфтезе сонь видексшинц, кона максфоль тейнза кемаманц инкса керфтомада инголе. Тяфта сон арась алякс сембе аф керф кемайхненди, конатнень Шкайсь лувсыне видексшинь ломанькс кемамаснон инкса.

¹² Тяфта Авраам арась алякс ся керфнендинге, конат мольсть киганза аф аньцек керфтомать сюнеда, а сяка кемамать, кона ульсь минь Авраам аляньконь киськопенц керфтомада инголе.

Шкаень надияфтомась пяшкоди кемамать вельде

¹³ Шкайсь надияфтозе максомс марнек масторлангть Авраамонди и сонь уноконь-уноконзонды. Тя надияфтомась максф Авраамонди аф койть ванфтоманкса, а кемаманц инкса, конань коряс Шкайсь лувозе сонь видексшинь ломанькс.

¹⁴ Кда тя надияфтомась максоволь сятненди, кит ванфтсазь койть, эста кемамась улель аш мезькска и Шкаень надияфтомась улель прокс шава.

¹⁵ Койсь таргай эсь мельганза Шкаень кяж; коса аш кой, тоса аш сонь колсемацка.

¹⁶ Сяс надияфтомась максф кемаманкса: улеза сон Шкаень пароказнеть эзда. Тяфта Шкаень надияфтомась улеза кемокстаф Авраамонь сембе идензон-уноконзон мельге – аф аньцек сятнень, конат ванфтсазь койть, но сятненьге, конат кемайхть Авраамонь лаца. Сон сембонди тейнек аля,

¹⁷ кода азф Сёрматфксса: «Мон тиихтень тонь ламоц ломаньтналхненди алякс». Тяфтамкс сон и ули Шкайть сельминголе, Шкайть, конанди сон кемась, кона мрдафтсыне кулофнень эряфти, и кона Эсь валсонза най тии од, мезе тяда инголе ашель.

¹⁸ Мзярда ашель мезень лангс надиямс, Авраам сяка ашезе юмафне надияманц: сон кемась и арась ламоц ломаньтналхненди алякс, кода тейнза азфоль: «Тонь уноконь-уноктот ули ламодонга лама».

¹⁹ Сонь кемамац ашезь лафчема, хуш сон содазе: кизодонза ни сядоть малаволь, алянь виензонга маштсть, и Сарраньге потмоц кунара пужсь.

²⁰ Но Авраам ашезь кафтолда, ашезь лотка кемамда Шкаень надияфтомати и, амолямок вий кемамаста, шназе Шкайть.

²¹ Вдь сон пяк кемась: Шкайти вийс коре пяшкодемс надияфтоманц.

²² Сяс кемаманц инкса сон лувовсь видексшинь ломанькс.

²³ Ня валхне «лувовсь видексшинь ломанькс» сёрматфт аф аньцек Авраамонь колга,

²⁴ но миньге колганк. Шкайсь миньге лувсамазь видексшинь ломанькс, мзярда минь кематама Сянди, кие вельмафтозе кулофнень эзда Иисус Христость, минь Азороньконь,

²⁵ кона максфоль куломас пеженьконь инкса и кона вельмафтфоль минь видексшинь ломанькс лувоманьконь инкса.