Павелонь сёрмац Риму 3 - Од Соткс Новый Завет на мордовском-мокша языке 2016

Шкайть видексшиц

¹ Эста мезьса сяда цебярьхть еврейхне лиятнень коряс? И кодама лезкс киськопень керомать эзда?

² Оцюдонга оцю лезкс сембе ширде. Васендакиге, Шкайсь максозе тейст Эсь валонц.

³ И мезе сянь эзда, кда конат-конат ня ломаттнень эзда ульсть аф кемайкс Тейнза? Кали синь аф кемамасна машфтсы Шкайть валонь кирдеманц?

⁴ Прокс аф! Шкайсь фалу кирдьсы валонц, а эрь ломанць кяльготни, кода азф Сёрматфксса: «Тонь сембе валхне най лувовихть видекс, и сятнень лангса, кит муворгофнетядязь Тонь, сявсак вярть».

⁵ А кда минь аф видексшиньке тиендьсы нинге сяда няевиксокс Шкаень видексшить, эста мезе минь астама? Эста пади Шкайсь аф виде, кда шарфнесы Эсь кяженц минь лангозонк? Мон тяса корхтан ломанень арьсемать коряс.

⁶ Прокс аф! Афток кода Шкайсь кармай судендамонза тя масторлангть?

⁷ Но кда монь кяльготнемазе тисы сядонга няевиксокс Шкайть валонь кирдеманц, и тянь вельде сядонга касфтови Сонь оцюшиц, эста мес мон эряван судендамс кода пежень тии?

⁸ Мес эста аф мярьгомс: «Карматама тиендема кальдяв, катк лиси эздонза цебярь»? Сялдыеньке вчёк тянь и корхнесазь, бта минь афкукс тянди тонафттама. Тяфтама ломаттнень шумосна пандови тевснон коряс.

Аш фкявок видексшинь ломань

⁹ Кода ина эста? Кали минь, еврейхне, ащетяма аф сяда вяре лиятнень коряс? Прокс аф. Минь няфтеськ ни: сембе ломаттне, еврейхть синь али лия ломаньтналонь, сембе синь пежеть алот.

¹⁰ Сёрматфксса тяфта азф: «Аш фкявок видексшинь ломань;

¹¹ Аш фкявок шарьхкоди ломань, кивок аф вешендьсы Шкайть.

¹² Сембе шарфтсть Шкайть эзда и сембе колафт; Аш паронь тии, фкявок аш.

¹³ Синь кргапарьсна – панжада калма; Синь кяльбрясост васькафнема. Синь трвасост куень урафтома

¹⁴ и кургсна пяшксе сюдомада и сяпта.

¹⁵ Синь ласькозь ласькихть веронь валома.

¹⁶ Эсь мельгаст синь кадыхть срафтома и ризф,

¹⁷ и аф маштыхть ладязь эряма.

¹⁸ Синь ашесть тонада Шкайда пелема».

¹⁹ Но минь содасаськ, сембось, мезень колга тяса корхтай койсь, азф сятненди, кит эряйхть койть коряс. Сяс киньге аф панжеви кургоц эсь прянь араламанкса. Марнек масторлангсь мувору Шкайть инголе.

²⁰ Вдь кивок Сонь инголенза аф лувови видексшинь ломанькс сянкса, мес тиенди койть кошардоманзон коряс. Койть вельде ломанти аньцек шарьхкодеви пежесь.

Видексшись максови Иисус Христости кемамать вельде

²¹ Вов тяни Шкайсь панжезе ломаттненди видексшить, кона максови аф койть вельде. Тянь колга ни азондсть койсь и пророкне.

²² И тя видексшить Шкайсь макссы ломаттненди Иисус Христости кемамать инкса. Сон максови сембонди, кит кемайхть, кикс синь афольхть уле,

²³ сяс мес сембе сувасть пежес и кадовсть Шкаень иневалдфтома.

²⁴ Но сембонь муворшисна валхтови питнефтома, Шкайть пароказненц коряс Иисус Христость вельде, кона идезень-рамазень синь воляшис.

^25-26 Шкайсь Сонь арафтозе ладямань озксказнекс, конань версонза аруяфтсыне пежетнень эзда сембонь, кит кемайхть Тейнза. Тяфта Шкайсь няфтезе Эсь видексшинц. Оцю кирдемшканц сюнеда Сон ашезь пантфта шума инголи тиф пежетнень инкса. А тяниень пингть Сон няфнесы Эсь видексшинц тяфта: Сон Сонць видексшинь и лувсыне видексшинь ломанькс сятнень, кит кемайхть Иисусти.

²⁷ Тяни ули минь туфталоньке прянь шнамс? Аш, сембе туфталхне юмафтфт. Кодама ина койсь тянь тиезе? Койсь, кона анай тефт? Аф. Тянь тиезе кемамань койсь.

²⁸ Сяс минь кемоста азсаськ: видексшись максови кемамать инкса, а аф коень ванфтоманкса.

²⁹ Кали Шкайсь аньцек еврейхненди Шкай, а лия ломаньтналхненди аф? Тяфта, Сон – лия ломаньтналхнендинге Шкай,

³⁰ сяс мес Шкайсь фкя-тяка. Сон лувсыне Эсь инголенза видексшинь ломанькс киськопень керфнень, кда синь кемайхть, и тяка лаца киськопень апак керфненьге, кда синь кемайхть.

³¹ Тяшкава вяри кемамать путомста минь аф машфнесаськ койть? Ёфси аф. Минь тянь вельде кемокснесаськ койть.