Павелонь сёрмац Риму 16 - Од Соткс Новый Завет на мордовском-мокша языке 2016

Пара валонь кучемась Римонь кемайхненди

¹ Монь мялезе содафтомс тинь Фива сазороньконь мархта, сон Кенхреянь кемаень пуромксть лездыец.

² Васьфтесть сонь Азорть лемса, кода ладяй Шкаень ломаттненди, и лездода сембоса, мезе тейнза эряви, сяс мес сон ламонди лезнесь, тянь лувксса тейненьге.

³ Азода пара вал Прискилланди и Акиланди, мархтон марса Иисус Христости покодихненди,

⁴ конат аноктольхть максомс монь инксон эряфснон. Мон аф ськамон азан тейст сюконяма, а лия ломаньтналонь сембе кемаень пуромксневок. Азода пара вал кемаень пуромксти, кона пуромкшни синь кудсост.

⁵ Азода пара вал кельгома ялгазти Епенетонди, кона Ахаияса васенцекс кармась кемама Христости.

⁶ Пара вал Мариамонди, кона тяшкава лама тейнек тись.

⁷ Пара вал Андрониконди и Юниянди, монцень масторстон ломаттненди, конат мархтон ульсть пякстамгудса и конат лац содафт апостолхнень ёткса, и конат мондедон инголе кармасть кемама Христости.

⁸ Пара вал Амплиенди, Азорти кемамас коре кельгома ялгазти.

⁹ Пара вал Урбанонди, мархтонк Христости покодити, и кельгома ялгазти Стахиенди.

¹⁰ Пара вал Апеллесонди, кинь Христосоннекс улемац няфтьф тевса. Пара вал Аристовулонь кудэряензонды.

¹¹ Пара вал монь масторстон Иродиононди и Наркиссонь кудста кемайхненди.

¹² Азода пара вал Трифена и Трифоса аватненди, конат лама виень путозь покодихть Азорти. Пара вал кельгома сазорти Персиданди, конац пяк лама виень путозь покоди Азорти.

¹³ Пара вал Руфонди, Шкаень кочкаф покодити, и сонь тядянцты, кона арась тядякс тейненьге.

¹⁴ Пара вал Асинкритонди, Флегонтонди, Ермонди, Патровонди, Ермиенди и лия кемайхненди, конат синь мархтост.

¹⁵ Пара вал Филологонди и Юлиянди, Ниреенди сазоронц мархта и Олимпанонди, и мархтост сембе иняру ломаттненди.

¹⁶ Шумбракснеда фкя-фкянь мархта иняру паламаса. Христосонь сембе кемаень пуромксне кучихть тейнть пара вал.

¹⁷ Мон эняльдян, кемай ялгат, ванфтода пря сятнень эзда, конат шорсемок ётконтень, явфнетядязь тинь. Синь ускихть эсонт ся тонафтомать эзда, кона максф тейнть. Аеркшнеда тяфтапнень эзда.

¹⁸ Ня ломаттне покодихть аф Иисус Христос Азороньконди, а эсь пекснонды. Синь ламбама и кяльготнемань кяльсост васькафнесазь сятнень седиснон, кит тёждяста кемайхть мезьс повсь.

¹⁹ Сембонди содаф, тинь уледе кулхцондыкс Пара кулянь валти, и тя монь кеняртьфнесамань. Но монь мялезе тяфтама: маштоледе тинь паронь тиема и афоледе машта кяжень тиема.

²⁰ А Шкайсь, сетьмошинь лихтибрясь, курок прафтсы Сатанать пильгалонт. Иисус Христос Азороньконь пароказнец улеза тинь мархтонт! Аминь.

²¹ Тейнть кучихть пара вал Тимофей, монь мархтон покодись, Луций, Иасон и Сосипатр, монь мастороннетне.

²² Монга, Тертий, Павелонь валонзон коряс тя сёрмать тяштиец, кучан тейнть седиваксстонь вал Азорть лемса.

²³ Пара вал кучи тейнть Гаий, монь инжиень кельги азорозе, конань кудса пуромкшни марнек кемаень пуромкссь. Пара вал тейнть Ерастонь, ошень ярмаконь ванфтыть эзда, и Кварт кемай ялганьконь эзда.

²⁴ Иисус Христос Азороньконь пароказнец улеза тинь сембонь мархтонт! Аминь.