Павелонь сёрмац Риму 14 - Од Соткс Новый Завет на мордовском-мокша языке 2016

Тяк суденда кемай ялгацень

¹ Ломанть, конань лафча кемамац, сувафтость эсь ёткозонт и тяда срхкафне пялькснемат сонь мялензон-арьсеманзон кувалма.

² Сяс мес фкясь кемай: мярьгондеви ярхцамс сембе ярхцамбяльда, а лафчсь ярхцай аньцек касыксонь ярхцамбяльда.

³ Сембода ярхцайсь, катк аф безярди сянь эзда, кие ярхцай аньцек касыкста. А аньцек касыкста ярхцайсь катк аф судендасы сянь, кие ярхцай сембода. Вдь Шкайсь соньге сявозе Эстейнза.

⁴ Кият тон тяфтамсь лиять покодиенц судендамс? Сон эсь Азоронц инголе стяда ащи али прашенды. Но сон сяка кармай ащема, сяс мес Шкайти вийс коре кирдемс сонь пильге лангса.

⁵ Фкясь лувсы кодамонга шить лиятнень коряс сяда оцюкс, а омбоцети сембе шитне фкат. Катк эрсь тии эсь кемаманц-шарьхкодеманц коряс.

⁶ Ся, кона башка луви кодамонга ши, Азорть инкса тянь тисы, а кие сембе шитнень фкакс лувсыне, тяка лаца Азорть инкса тянь тисы. Сявок, кие ярхцай, ярхцай Азорть лувомга, сяс мес сюконяй Азорти ярхцамбяленкса. А кие аф ярхцай, ся аф ярхцай Азорть лувомга, и тяка лаца азы сюконяма Шкайти.

⁷ Вдь эздонк кивок аф эряй эсь инксонза, и кивок аф кулы эсь инксонза.

⁸ Кда минь эрятама, минь эрятама Азорть инкса. Кда кулотама, Азорть инкса кулотама. Шисотама минь али кулотама, минь сяка ляткшнетяма Азороннекс.

⁹ Вчёк тянкса Христос кулось и вельмась – кулофнень и шистотнень лангса Азоркс араманкса.

¹⁰ Мес ина тон судендасак кемай ялгацень? Али тон, мес безярдят ялгацень эзда? Вдь минь сембе карматама ащема Христость судонц инголе.

¹¹ Вдь Сёрматфксса азф: «Кода виде тя: Мон эрян, – корхтай Азорсь, – тяфта виде тявок: Монь инголен комафтсы плманжанц эрь ломанць, и эрь кяльсь шнасы Шкайть».

¹² Тяфта, эрсь минь ёткстонк кармай азондомост эсь тевонзон Шкайти.

Тяк сувафне пежес кемай ялгацень

¹³ Сяс аф карматама фкя-фкянь судендама. Меколанкт, тяряфтода мезевок аф тиендемс стама, мезсь тапарялезе кемай ялгацень али сувафтолезе пежес.

¹⁴ Иисус Азорть мархта сотовомать сюнеда мон кемоста содаса: аш тяфтама ярхцамбяль, кона улель эсьсонза аф ару. Аньцек ся, мезть ломанць лувондсы аф арукс, ся арси тейнза аф арукс.

¹⁵ Кда тонь кемай ялгацень колави мялец сянкса, мезьда тон ярхцат, эста тон аф кельгомас коре тиендят. Тяк вяте юмамас-арамас ярхцамбяльцень мархта сянь, кинь инкса кулось Христос.

¹⁶ Киндинге тяда макссе туфтал кальдявста корхтамс сянь колга, мезть тинь лувсасть цебярькс.

¹⁷ Вдь Шкаень Оцязорксшись – тя аф ярхцамбяль, афи симомбяль, сон – видексши, сетьмоши и кенярдема, конатнень казендьсыне Иняру Ваймопожфсь.

¹⁸ Кие тяфта покоди Христости, ся тушенды Шкайть мяльс и лувови цебярькс ломаттнень ётксовок.

¹⁹ Тяфта, карматама фалу вешендемонза ся кить, кона вятьсамазь минь ладямати и кемаманьконь марстонь кемокстаманцты.

²⁰ Ярхцамбяленкса тяк срафне-калафне Шкаень тевть. Сембе ярхцамбяльсь ару, но кальдяв, кда тон сувафнесак ломанть пежес ярхцамбяльса, конада ярхцат.

²¹ Сяда пара аф ярхцамс сивольда и аф симомс винада, и аф тиендемс мезевок стама, мезть эзда тонь кемай ялгаце пупордай, сувай пежес али вийда машты.

²² Ванфтк эсь мяльцень-кемамацень тянь кувалма Шкайть инголе. Павазу ся ломанць, кона аф судендасы эсь прянц сянкса, мезть сон лувсы видекс.

²³ А кда ломанць кафтолды, эряви тяда ярхцамс али аф, но сяка ярхцай, сон ни судендаф, сяс мес тиенди аф кемама коряс. А сембось, мезсь тиендеви аф кемама коряс – пеже.

Шнама Шкайти!

²⁴ Шнама Шкайти, конанди вийс коре кемокстамс тинь! Тянь колга корхтай Пара кулясь, конань мон азондса. Тя Иисус Христость эзда кулясь, лиякс мярьгомс, салавашись, кона кяшфоль лама пинге и тяни панчф.

²⁵ Пефтома эряй Шкайть мярьгоманц коряс тя салавашись тяни панчф пророкнень сёрматфса и азонтф сембе ломаньтналхненди – синь кемамас и кулхцондомас сувафтоманкса.

²⁶ Улеза Иисус Христость вельде пефтома пингонь шнама фкя-тяка Смузюдонга Смузю Шкайти! Аминь.