Павелонь сёрмац Риму 11 - Од Соткс Новый Завет на мордовском-мокша языке 2016

Шкайсь ашезе када Эсь ломаньтналонц

¹ Сяс кизефнян: кали Шкайсь кадозе Эсь ломаньтналонц? Ёфси аф! Мон монць израиленнян, Авраамонь полатксоц, Вениаминонь юромста.

² Ашезе када Шкайсь Эсь ломаньтналонц, конань Сон кочказе кунаркиге. Кали тинь аф содасасть, мезе корхтай Сёрматфкссь ся вастса, коса Илия пеняцяй Шкайти Израильть лангс:

³ «Азор, Тонь пророкнень шавозь, Тейть путф алтарьхнень срафтозь-тапазь, мон илядонь ськамон, моньге эряфозень ёрайхть машфтомс».

⁴ И мезе ина каршезонза мярьгсь Шкайсь? «Мон ванфтонь Эстейне сисем тёжятть ломань, конат ашезь комафта плманжаснон Ваалонь инголе».

⁵ Тяфта тянинге ванфтовсь «лядыкссь», конань Шкайсь кочказе Эсь пароказненц коряс.

⁶ Лисенди Шкайсь кочказе сонь Эсь пароказненц коряс, а аф ломаттнень тевснон коряс. Афток пароказнесь афоль уле пароказнекс.

⁷ Мезе тянь эзда лисенди? Израильсь ашезе сата сянь, мезе вешендсь. Тянь сатозь кочкафне, а лиятнень кевонзасть седисна,

⁸ кода сёрматф: «Шкайсь кучсь лангозост седиень-ваймонь казямши; тянемс аф няихть синь сельмосна, аф кулихть синь пилесна».

⁹ И Давид корхтай: «Катк синь повихть кундамас ярхцама пингстост! Катк синь прайхть туворс, и катк сай тейст шумонь пандома!

¹⁰ Катк синь сельмосна вельхтявихть шобдаса, и лоткайхть няемда. Катк сембе пингс мяндеви синь карязсна!»

Лия ломаньтналхнень идемасна

¹¹ Мон кизефнян: кали еврейхне пупордасть и прокс прасть? Ёфси аф! Синь прамаснон вельде сась идема лия ломаньтналхненди, эвондаза еврейхнень эса седиень палома.

¹² А кда синь прамасна кандсь пара масторлангонь ломаттненди и кда синь Шкайть эзда шарфтомасна кандсь пара лия ломаньтналхненди, эста конашкава оцю ули тя парось, мзярда еврейхне мрдайхть Шкайти!

¹³ Тяни мон пшкядян тейнть, лия тналонь ломатть. Мон лия ломаньтналхненди апостолан и пря шнафтан тейне максф тевть мархта.

¹⁴ Мон надиян, пади сргозьфтян сельмонь каяма тинь лангозонт эсь веронь ломаньтналозень эса и тянь вельде конат-конат ёткстост идевихть.

¹⁵ Кда Шкайть шарфтомац еврейхнень эзда панчсь масторлангти Шкайть мархта ладямань ки, эста мезе ули, мзярда Шкайсь меки сявсыне синь? Эряф кулофненди!

¹⁶ Вдь кда шапаксть васенце пяльксонц лемдемс Шкайти, эста марнек шапаксське лемтьф Тейнза. И кда юрсь лемтьф Шкайти, эста – тараттневок.

¹⁷ Но кда вайшуфтонь кона-кона тараттне ульсть синнефт, и тон, вирень вайшуфтонь тарадсь, улеть петфтаф синь вастозост, и тяфта тон лядыкс тараттнень мархта кармать симома иможберень вайшуфтть юрста,

¹⁸ эста тят шнафта пря синтьф тараттнень инголе. Аш мезьса тейть шнафтомс пря. А лисендяряй тяфта, лятфтак: аф тон максат вий юрти, а юрсь тейть.

¹⁹ Тон мярьгат: «Тараттне синтьфтольхть монь петфтаманксон».

²⁰ Пара! Афкукс, синь синдезь аф кемамаснон инкса, а тон кирдят кемамацень вельде. Сяс вельф тяк кепсе пряцень, но пельхть.

²¹ Кда Шкайсь ашезень ужяльде шуфтть сонцень тарадонзон, арьсят, Сон ужяльттянза тонь?

²² Мяляфтк, Шкайсь ляпе седи и казяма. Казяма Сонь эздонза потайхненди, тейть ляпе седи, кда тонць сяда товга аф аердат Сонь ляпе седиенц эзда. А кда аердат, тонга улят керф.

²³ И кда еврейхне кадсазь эсь аф кемамаснон, эста синьге мрдафтовихть вастозост. Шкайти вийс коре петфтамс синь меки шуфтти.

²⁴ Кда тон керфолеть вирень вайшуфтста и перьфпяльти каршек молезь петфтафолеть иможбереннети, эста сяда тёждя Шкайти мрдафтомс синтьф тараттнень эсь шачем вайшуфтснонды.

Израильть идемац

²⁵ Кемай ялгат, монь мялезе панжемс тейнть фкя салаваши, кона ванфттядязь тинь надиямада аньцек эсь смузьшинтень лангс: седиень калготкстомась, кона сатозе Израилень ломаттнень финц пяльксснон, таргави аф сембе пингонди. Сон таргави аньцек снярс, мзярс аф пяшкоди лия тналонь ломаттнень лувкссна, конатненди сама Шкайти.

²⁶ И эста марнек Израильсь ули идеф, кода Шкайсь корхтай Сёрматфксса: «Сионцта сай Воляс Нолдайсь, Сон аердафтсыне Иаковонь поладыензон шкайфтома эряфда.

²⁷ И Мон ладяса мархтост тя сотксть, мзярда валхтсайне лангстост пежеснон».

²⁸ Синь ашезь сяве Пара кулять – и сяс синь Шкайти каршек молихть, тинь инксонт каршек молихть. Но синь – Шкаень кочкаф ломаньтнал, и Шкайсь кельгсыне синь, кельгсыне синь атянь-атяснон инкса.

²⁹ Шкайсь меки аф сявондьсыне Эсь казнензон и аф полафнесы мяленц ломанть тердемста.

³⁰ Тиньге мзярда-бди уледе Шкаень аф кулхцондыхть, но тяни, еврейхнень аф кулхцондомаснон сюнеда, Шкайсь кельгозь ужяльдедязь тинь.

³¹ Тяфта еврейхневок тяни Шкаень аф кулхцондыхть, и тейнть максф кельгозь ужяльдемать вельде тейстка нинге максови Шкаень кельгозь ужяльдема.

³² Шкайсь сембонь пякстазень аф кулхцондомас, тиезень пякстафокс эсь аф кулхцондомаснон потмос, сяс мес Сонь мялец кельгозь ужяльдемс сембе ломаттнень.

Шкаень смузьшить шнамац

³³ Вай кодама пефтома Шкаень козяшись, смузьшись и содамошись! Аф панжевихть Сонь мяленза-арьсеманза, аф кочксевихть кинза-янонза!

³⁴ Кие шарьхкодезе Азорть ёненц? И кие ульсь Тейнза ёньц путыкс?

³⁵ Кие макссь Тейнза мезьге, мезть инкса Тейнза эряволь пандомс?

³⁶ Вдь сембось Сонь эздонза, Сонь вельденза и Тейнза! Тейнза шнама пефтома пингс! Аминь.