Павелонь сёрмац Риму 10 - Од Соткс Новый Завет на мордовском-мокша языке 2016

Идемась максови сембонди, кит кемайхть Иисусти

¹ Кемай ялгат, монь седиваксстонь мялезе: идевольхть Израилень ломаттне. Тяконь колга эняльдян Шкайти.

² Мон виде ваймот азса, синь седи путыхть Шкайти покодемста, но афкуксонь содамошисна аф сатни.

³ Синь ашезь шарьхкоде, кода Шкайсь лувсыне ломаттнень видексшинь ломанькс, и ёрасть эсь тевснон вельде кемокстамс видексшиса улемаснон. Сяс синь ашезь макса пряснон Шкаень видексшити.

⁴ А вдь Христос педа-пес пяшкодезе койть, сяс тяни эрсь, кие кемай Тейнза, ули лувф видексшинь ломанькс Шкайть инголе.

⁵ Моисей сёрмады ся видексшить колга, кона сай койть пяшкодеманц вельде: «Ся, кие ванфтсыне койть сембе кошардоманзон, муй эсост эстейнза эряф».

⁶ Но кемамать вельде максф видексшить колга Сёрматфксса корхтави тяфта: «Тят арьсе эсь седисот: "Кие кеподеви менели?" – лиякс мярьгомс: Христость менельста валхтомс модать лангс.

⁷ Али тяфта: "Кие валги тонашинь потмаксфтома томбати?" – лиякс мярьгомс: вельмафтомс Христость кулофнень эзда».

⁸ Но вов мезе корхтай Сёрматфкссь: «Шкайть валоц тонь вакссот, кургсот и седисот», лиякс мярьгомс, кемамать колга валсь, вчёк ся, конань минь пачфнесаськ.

⁹ Кда тон эсь кургсот сембонь инголе азсак: Иисус – Азорсь, и кда седисот кармат кемама: Шкайсь кулофнень эзда вельмафтозе Сонь – эста улят идеф.

¹⁰ Сяс мес седиса кемамась вяти видексшити, а сембонь инголе кургса тянь азондомац – идемати.

¹¹ Сёрматфкссь корхтай: «Кивок Тейнза кемайхнень эзда аф прай визькс шамас».

¹² Тя азф сембонди, и еврейти, и лия ломаньтналоннети. Азорсь сембонди фкя, и козяста казьсыне сембонь, кие тердьсы Сонь.

¹³ Вдь сёрматф: «Эрсь, кие тердьсы Азорть, ули идеф».

¹⁴ Но кода тердьсазь Сянь, кинди аф кемайхть? Кода кемайхть Сянди, кинь колга ашесть куленде? Коста синь кульсазь, кда аш тянь колга азонды?

¹⁵ Кие кармай азондома, кда кивок аф ули кучф? Сёрматфкссь корхтай: «Вай, кодань пархт пильгсна сятнень, кит молихть Пара кулянь пачфнема!»

¹⁶ Но аф сембе сявозь седиезост Пара кулять. Тянь колга корхтай Исаия: «Азор, кие кемась сянди, мезе кульсь эздонк?»

¹⁷ Тяфта, кемамась сашенды Кулять марямста, а марясазь сонь тоса, коса азондови Шкайть валоц.

¹⁸ Но мон кизефнян: кали синь ашезь куле? Кулемс кулезь! Вдь Сёрматфксса азф: «Модать келес срадсь синь вайгяльсна, масторть пенцты пачкодсть валсна».

¹⁹ Мон тага кизефнян: кали Израильсь ашезь шарьхкоде? Нинге Моисей корхтась: «Мон сргозьфтян эсонт седиень палома сятнень вельде, конат ломаньтналкс аф лувовихть. Мон сргозьфтян эсонт кяж мезевок аф шарьхкоди ломаньтналть вельде».

²⁰ Исаия нинге сяда видеста азозе: «Монь мумазь сят, кит ашемазь вешенде. Мон няфтине Эсь прязень сятненди, конат ашесть кизефне Монь колган».

²¹ Но Израильть колга Сон корхтай: «Шиньберьф Мон венепнине Эсь кяднень аф кулхцонды и каршек моли ломаньтналти».