Павелонь сёрмац Риму 1 - Од Соткс Новый Завет на мордовском-мокша языке 2016

Ингольце валсь и шумбракстомась

¹ Павел, Иисус Христосонь покодиец, конань Шкайсь тердезе улемс апостолкс и кочказе азондомс Шкаень Пара кулять,

² конань Шкайсь инголькиге надияфтозе Эсь пророконзон вельде иняру Сёрматфксса.

³ Тя Кулясь Сонь Цёранц колга, кона ломанень шачемас коре Давидонь уноконь-унокоц,

⁴ а инярушить Ваймопожфонц коре – Шкаень Цёра, конань Шкайсь няфтезе сембе вийсонза, вельмафтомок кулофнень эзда. Тя – Иисус Христос, минь Азороньке.

⁵ Сонь вельденза тейнек максфоль пароказнесь и апостолонь тевсь: вятелеськ сембе ломаньтналхнень Иисусонь лемс кемамати.

⁶ Синь лувксозост сувсетяда тиньге, конат тертьфт улемс Иисусоннекс.

⁷ Мон кучан пара вал сембе ся римэряйхненди, конатнень кельгсыне Шкайсь и конатнень Сон тердезень улемс иняру ломанькс. Мон арьсян тейнть пароказне и сетьмоши Шкай Аляньконь и Иисус Христос Азороньконь эзда.

Павелонь мялец повомс Риму

⁸ Васендакиге азан сюконяма Иисус Христосонь вельде монь Шкаезти сембонь тинь инксонт, сяс мес тинь кемамантень колга корхтави марнек масторлангса.

⁹ Мон Шкайти сединек-ваймонек покодян, азондомок Пара кулять Сонь Цёранц колга. Сон няйсы-содасы: мон фалу лятфнетядязь тинь

¹⁰ эсь озондомасон. И эняльдян Шкайти, кда тянди ули Сонь мялец: пади тяни коданга молеван тинь варжамонт.

¹¹ Вдь монь аф азовомшка оцю мялезе няемс тинь, мялезе максомс тейнть ваймопожфонь кодамовок казне и тянь вельде кемокстамс тинь,

¹² лиякс мярьгомс, улелеме нежекс фкя-фкянди минь марстонь кемамасонк: тинь улеледе нежекс тейне, а мон – тейнть.

¹³ Содасть, кемай ялгат, мон ламоксть срхксень молемс тейнть, но тянемс тефне-перяфксне шорясть тейне молемс ширезонт и кочкамс ётксонтка имошт, кода мон тиендень ни лия ломаньтналхненьге ёткса.

¹⁴ Мон шумуван грекнень и варвархнень, смузюфнень и аф содайхнень инголе.

¹⁵ Сяс, кда корхтамс монь колган, мон анокан азондомс Пара кулять тейнтьке, Римса эряйхненди.

Пара кулять виец

¹⁶ Мон аф виздян Христость Пара кулядонза, вдь тя Шкаень вий, кона идекшнесыне сембе кемайхнень, васендакиге еврейхнень, сяльде – лия ломаньтналхненьге.

¹⁷ Вдь тя Куляса панжеви: Шкайсь минь лувсамазь видексшинь ломанькс кемаманкса и аньцек кемаманкса. Сёрматфксса азф: «Видексшинь ломанць кармай эряма кемамать вельде».

Сембе ломаттне муворуфт-шумуфт

¹⁸ Шкайть кяжень пандомац валги менельста эрь кодама пежень и зиянонь тиихнень лангс, конат эсь кальдявшисост кяшендьсазь ломаттнень эзда видешить.

¹⁹ Ся, мезе ломанть вийса содамс Шкайть колга, няфтьф тейст, Сон Сонць панжезе тейст.

²⁰ Менельхнень-масторхнень тиемаснон эзда сявомок, Шкайть аф няевикс ширенза – Сонь пефтома виец и Шкайксшиц – няфтьфт ломаттненди Сонь тифонц вельде. Сяс ня ломаттненди аф аралави прясна Шкайть инголе!

²¹ Хуш синь содазь Шкайть, но сяка ашезь шна Сонь и ашесть азонда сюконяма Тейнза кода Шкаенди. Меколанкт, синь мяльсна-арьсемасна тиевсть шавокс, а ёньфтома седиснон ашкодозе шобдась.

²² Лемнемок эсь пряснон смузюкс, синь арасть шава прякс.

²³ Пефтома пингс эряй Шкайти сюконямать вастс синь сюконякшнихть аф афкуксонь шкайхненди, конат шаркстыхть кулы-наксады ломаненди, нармоненди, ниле пильгса жуватанди, куенди-ёзмолдыенди.

²⁴ Сяс Шкайсь кадозень синь аф арушис, визькс мялень топафнемас, тяфта синць максозь туткотксшити эсь ронгснон.

²⁵ Шкаень видешить синь полафтозь кяльготнемать лангс. Синь сюконякшнихть и покодихть Шкаень тифти, а аф Сембонь Тии Шкайти, кона шнаф-бславаф пефтома пингс. Аминь.

²⁶ Тянкса Шкайсь и максозень синь визькс мялень топафтомать кядялу. Авась ава мархта прашенды визькс тевс, мезсь моли эряфонь койть каршес.

²⁷ Тяфта алятневок, шарфтсть аватнень эзда и крьвязсть визькс мяльса фкя-фкянди. Алясь аля мархта тиенди визькс тефт, тянь мархта аноклайхть эстейст кяжень пандома, конань синць сатозь зияну тевснон инкса.

²⁸ Сяс мес синь ашель мяльсна содамс Шкайть, Шкайсь синь максозень синцень шоряф ёньцнонды тиендемс сянь, мезе тиендемс аф мярьгондеви.

²⁹ Синь пяшкодсть кодама-повсь аф видешида, усксевомада, кальдявда, аф топафневишида, кяжда. Синь эряфсна пяшкодсь сельмонь каямада, шавондомада, сялондомада, васькафнемада, кальдявонь арьсемада.

³⁰ Синь сялды валса корхтафтыхть, кяльготнихть ломаттнень лангс, синь Шкаень аф кельгихть, синь обжайхть-пиксыхть, прянь шнафтыхть, прянь няихть, докат кяжень тиемаса, тядянь-алянь аф кулхцондыхть,

³¹ аф шарьхкодихть, валонь аф кирдихть, кельгомань аф содайхть, кяжьбень кирдихть и аф ужяльдихть.

³² Синь содасазь, Шкаень видексшинь койть коряс тяфта тиендихне максовихть куломас. И сяка, синь аф аньцек синць тяфта тиендихть, но и шнасазь лацост тиендихнень.