Павелонь сёрмац Колоссав 3 - Од Соткс Новый Завет на мордовском-мокша языке 2016

Ташта и од эряф

¹ Тяфта, сяс мес тинь уледе вельмафтфт Христость мархта, вешендеда сянь, мезе менельса, коса Христоссь озаф Шкайть види кяденц ширеса.

² Арьседа менеленнеть колга, а аф масторлангоннеть колга.

³ Вдь тинь кулоде тя масторлангти и ташта эряфонте аделавсь. Тяни тинь ули од эряфонте, кона кемоста сотф Христость мархта, но тя од эряфсь нинге аф няеви, сон кяшф Шкайса.

⁴ Христоссь – тинь эряфонте, и мзярда Сон эвондай, эста тиньге эвондатада Сонь мархтонза иневалдса.

⁵ Сяс, кулофтость эсь эсонт сянь, мезсь масторлангонне: усксевомать, аф арушить, визькс мяльхнень, кяжи ёраматнень и ярмаконь кельгомать, кона фкя сяка аф афкуксонь шкаенди сюконямать-покодемать мархта.

⁶ Семботь тянь инкса Шкаень кяжсь прай аф кулхцондыхнень лангс.

⁷ Инголи тиньге эряде ня пежетнень коряс.

⁸ А тяни тейнть эряви кадомс семботь тянь: кяжть, пялязшить, кальдявшить и рдазу валса сялдомать.

⁹ Тяда васькафне фкя-фкянь. Вдь тинь каясть-ёрдасть эсь лангстонт ташта ломанть сембе сонь тевонзон мархта

¹⁰ и щафтоде эсь лангозонт од ломань, кона шиста-шис одкстомкшни. Тянь вельде тейнть сяда лац шарьхкодеви-содави Шкайсь, минь Тииеньке, и тинь аратада Сонь лацонза.

¹¹ И тя од эряфсонт аш явома: грек тя али еврей, керф али апак керхт, варвар, скиф, уре али воляшистонь. Ули аньцек Христоссь – Сон сембось и семботь эса.

¹² Тинь Шкаень кочкафне, Сонь иняру и кельгома ломаненза. Сяс уледа кельгозь ужяльдикс, лиянди паронь тиикс, сятявкс, ляпе седикс и куватьс кирдикс.

¹³ Эряда фкя-фкянь мархта ладязь и нолнеда пежет, кда фкя-фкянь обжатада. Кода Христос нолдазень тинь пежентень, тяфта тиньге тиендеда.

¹⁴ А сембодонга пяк уледа кельгикс, сяс мес кельгомась семботь сотсы марса и семботь тисы афсатыксфтомокс.

¹⁵ И катк азорондай тинь седисонт Шкаень сетьмошись, конанди тинь уледе тертьфт кода фкя ронгонь пялькст. Эрь пингста уледа сюконяйкс!

¹⁶ Катк Христость валоц козяста эряй тинь эсонт, эрь кодама смузьши мархта. Тонафнеда фкя-фкянь и максседа фкя-фкянди ётть, уледа седи ваксста сюконяйкс Шкайти и морседа Тейнза псалопт, шнамань и ваймопожфонь морхт.

¹⁷ И семботь, мезе тиенттяда валса али тевса, семботь тиендесть Иисус Христос Азорть лемса, сюконязь Сонь вельденза Шкай Аляти.

Тонафтомат фкя кудботмоса эряй ломаттненди

¹⁸ Рьват, уледа анококс кулхцондомс эсь мирдентень, кода ладяй Азорти кемайхненди.

¹⁹ Миртть, кельгода эсь рьвантень эса, и тяда уле синь мархтост казямокс-кяжекс.

²⁰ Итть, сембоса уледа кулхцондыкс эсь алянтенди-тядянтенди, вдь тя Шкайть мялезонза.

²¹ Алят, пефтома тясть сюцекшне эсь идентень, вдь тянкса синь нолдасазь эсь нярьснон.

²² Урет, сембоса уледа кулхцондыкс масторонь азоронтенди. Тяфта тиендеда аф сельме инголе няфтеманкса и аф ломанень мяльс туманкса, а ару седиста, Шкайть эзда пелезь.

²³ И мезе тинь афоледе тие, тиендесть ся тевть седиень путозь, кода Азорти, а аф кода ломаттненди.

²⁴ Тинь содасать: тейнть максови надияфтф казнесь, кона аноклаф Азорть ломанензонды. Вдь тинь покоттяда Христос Азорть лангс.

²⁵ А кие аф видеста тиенди, сянди пандови аф видеста тиф тевонзон коряс, сяс мес Шкайть инголе сембе ломаттне фкат.