Павелонь сёрмац Галатияв 6 - Од Соткс Новый Завет на мордовском-мокша языке 2016

Лездода фкя-фкянди

¹ Кемай ялгат, кда кивок прай пежес, тинь, кит эряйхть Ваймопожфть вятеманц коряс, лездода тяфтамти мрдамс видешинь кити. Тя тиендема сетьмоста и ляпоста. Тяка пингть эсь мельгантка ванода, тинцьке тяда васькафтов пежеса.

² Лездода фкя-фкянди стакашиса, тяфта тинь пяшкодьсасть Христость коенц.

³ Кда кивок эсь прянц путнесы кати мезькс, а сонць мезевок аш, ся васькафнесы эсь прянц.

⁴ Катк эрсь максы эрявикс питне эсь тевонцты, и эста тейнза шнави пряц сатфксонзон мархта, аф ваномок лиять тевонц лангс.

⁵ Вдь эрь ломанти кандома эсь канксоц.

⁶ Ся, кинь тонафтсазь Шкаень валти, катк максы уликс-паронц эзда эсь тонафтыенцты.

⁷ Тяда васькафнев: Шкайть аф васькафтсак. Мезе ломанць види, сянь и нуй.

⁸ Кда кие види эсь пежу обуцянцты, обуцять мяленц ваноманкса, ся нуй эздонза юмама-арама. А ся, кие види Ваймопожфть мяленц ваноманкса, Ваймопожфста нуй пефтома эряф.

⁹ Сяс паронь тиемста аф макссаськ пряньконь сиземати. Эста, кда аф потатама тя тевста, эсь пингстонза нусаськ сёроть.

¹⁰ Сяс, мзярс ули пинге, эрьда карматама сембонди тиендема цебярь, сембода пяк кемай ялгатненди.

Мекольце валхне

¹¹ Тяни мон сёрмадан тейнть эсь кядьсон – ваность оцюфт букване.

¹² Сят, конат кошардыхть эсонт киськопень керфтома, пяк ёрайхть тумс ломаттнень мяльс. Синь тянь тиендьсазь аньцек сяс, мес ёрайхть ванфтомс пряснон Христость крёзонц инкса панцемада.

¹³ Синь хуш керфт, но синць аф ванфтсазь койть. Синь мяльсна керфтомс тинь киськопентень, сяс мес тянь вельде ёрайхть шнафтомс эсь пряснон.

¹⁴ А монь аш мялезе шнамс эсь прязень мезьсовок, Иисус Христос Азороньконь крёздонза башка. Тя крёзть лангса масторлангсь эськотьф-кулоф тейне, и монцьке эськотьфан-кулофан тя масторлангти.

¹⁵ Вдь керфат тон али аф, тя мезевок аш Иисус Христосонь эса. Сембода эрявикссь – эряви арамс Шкаень од тифокс.

¹⁶ Сетьмоши и кельгозь ужяльдема сембонди, кит ванфтсазь тя ладяфксть, и Шкаень Израильти.

¹⁷ Катк оду кивок аф тии тейне седиень сярятьф, вдь мон каннян ронгсон аржет, конатнень тейне тиезь Иисус Азорти кемаманкса.

¹⁸ Кемай ялгат, Иисус Христос Азороньконь пароказнец улеза тинь ваймопожфонтень мархта! Аминь.