Павелонь сёрмац Галатияв 5 - Од Соткс Новый Завет на мордовском-мокша языке 2016

Христос максы воляши

¹ Христос минь нолдамазь воляшис. Сяс, ащеда кемоста и оду тясть эцекшне прянтень урексшис.

² Кулхцондода, мезе мон, Павел, азан тейнть: тиендярятада киськопень керфтома, кодамовок лезкс тейнть аф ули Христость эзда.

³ Мон тага весть кемоста азса тейнть: эрти, кие тифти киськопень керфтома, эряви пяшкодемс марнек койсь.

⁴ Тинь, конат ёрайхть арамс Шкайть инголе видексшинь ломанькс койть ванфтоманц вельде, – тинь яводе Христость мархта, аердоде Шкаень пароказнеть эзда.

⁵ Но минь ули надияманьке: Шкайсь лувсамазь минь видексшинь ломанькс кемаманьконь инкса, и тянь минь пяк учсаськ Ваймопожфть вийса.

⁶ Вдь, кда минь сотофтама Христос Иисусонь мархта, эста сембе сяка – керф киськопеньке али аф. Эряви аньцек кемама, кона няфтеви кельгомаса.

⁷ Тинь лац ушедость кинтень. Кие шорясь тейнть и тиедязь видешити аф кулхцондыкс?

⁸ Кие корхтадязь тинь, вдь тяфтама мяльхне састь тейнть аф Шкайть эзда, конац терди эсонт.

⁹ Аф лама шапафтома вельде срхкафтови сембе шапакссь.

¹⁰ Мон Азорть лангс нежедезь кеман, тинь аф карматада лиякс арьсема. А ся, кие тапаряй эсонт, кие сон тяза уле, ули судендаф.

¹¹ Кемай ялгат, кда мон тянинге тонафтолень киськопень керома, эста мезенкса монь эсон панцихть? Эста Христость крёзоц афоль уле ни пупордамань кевкс.

¹² А конат тапаряйхть эсонт киськопень керфтомаснон мархта, сят катк эстейст сембоснон прокс керсазь!

¹³ Кемай ялгат, тинь уледе тертьфт воляшити. Аньцек тясть шарфне тя воляшить эсь пежу мялентень топафтоманкса. Меколанкт, кельгозь покодеда фкя-фкянди.

¹⁴ Вдь марнек койсь сюлмаф фкя-тяка валхнень эса: «Кельк маластоцень, кода эсь пряцень».

¹⁵ А кда порьхтяда и сивозь сифтяда фкя-фкянь, эста ванода, афоледе машфта фкя-фкянь.

Эряда Ваймопожфть коряс

¹⁶ Мон корхтан тейнть: эряда Ваймопожфть коряс, и эста тинь аф карматада якама пежу обуцянтень мельге.

¹⁷ Пежу обуцянте кепси Ваймопожфть каршес, а Ваймопожфсь – пежу обуцянтень каршес. Синь фалу каршект фкя-фкянди. Сяс тинь тиендьсасть аф сянь, мезе мяленте тиемс.

¹⁸ А кда тинь эсонт вяти Ваймопожфсь, эста тинь ни аф койть азорксшинц алотада.

¹⁹ Ломанень пежу обуцять тевонза содафт, нят: мирдень али рьвянь полафтомась, усксевомась, аф арушись, визьксонь мяльхне,

²⁰ аф афкуксонь шкайхненди сюконякшнемась, колдавамась, кяжень кирдемась, сялондомась, сельмонь каямась, кяжиста юватькшнемась, пялькстомась, мяльса явомась, васькафни тонафтоматне,

²¹ фкя-фкянь аф няемась, шавондоматне, симондемась, иреденьбачк кедьста лисендемась и стак тов. Мон инголивок тянь колга корхнень, тянивок корхтан: кивок тяфта тиендихнень эзда аф сувави Шкаень Оцязорксшити.

²² Но Ваймопожфсь касфтсы Эсь иможенц. Тя: кельгомась, кенярдемась, сетьмошись, куватьс кирдемшкась, парошись, ляпошись, кемамась,

²³ сятявшись, эсь прянь кирдемась. И нятне койти аф судендавихть.

²⁴ Сят, конат Христосонь ломатть, крёз лангс эськодезь ломанень пежу обуцять сембе визьксонь и кальдяв мялензон мархта.

²⁵ И кда минь эрятама Ваймопожфть коряс, эста тейнек эряви тиендемска Ваймопожфть вятеманц коряс.

²⁶ Сяс эрьда, аф карматама эсь прянь оцюлгофнема, фкя-фкянь лангс кяжень сафнема и сельмонь каяма.