Павелонь сёрмац Галатияв 4 - Од Соткс Новый Завет на мордовском-мокша языке 2016

¹ Мон ва мезе нинге азан: мзярс идень пингса ся, конанди меле максови алянц уликс-пароц, сон мезьсонга аф явови уреть эзда, хуш сон – семботь лангса азор.

² Сонь мельганза ваныхть кудвятихне и мельганза якайхне, мзярс аф сай пингсь, конань ладязе аляц.

³ Тяфта миньге, мзярс ашеме ара кемайкс, улеме шаба лаца, и улеме урекс тя масторонь вяти вийхненди.

⁴ Но мзярда сась ладяф пингсь, Шкайсь кучезе Эсь Цёранц. Сон шачсь ломанькс авань эзда и эрясь койть ала ва мес:

⁵ нолдамс минь воляшис койть азорксшинц алда и тиемс минь Шкаень идькс.

⁶ Тяни ни тиньге Шкаень иттяда. Тянь няфтеманкса Шкайсь кучезе тинь седиезонт Эсь Цёранц Ваймопожфонц, кона тердьсы Шкайть: «Авва! Аляй!»

⁷ Тяфта, тон тяни аф урят, а Шкаень идят; а кда идят, эста Иисус Христосонь инкса тейть максови уликс-парось, конань Шкайсь надияфтозе Эсь идензонды.

Павел пичеди Галатиянь кемайхнень инкса

⁸ Тяда инголи, мзярда тинь нинге ашесть сода Шкайть, тинь уледе урекс шкайхненди, конат прокс аф шкайхть.

⁹ Ина тяни, мзярда тинь содасть Шкайть, сяда лац азомс, мзярда Шкайсь содадязь тинь, кали тинь меки ёратада мрдамс ня лафча и асуфтома вийхненди? Кали меки ёратада арамс тейст урекс?

¹⁰ Тинь лувонттада-тяштькснетяда шит, кофт, пинкт и кизот, арьсемок: тяфта тинь покоттяда Шкайти!

¹¹ Пелян, монь покодемазе тинь ширесонт ётась стакащемда.

¹² Эняльдян тейнть, кемай ялгат, тиеда монь лацон – лиседа койть азорксшинц алда, сяс мес монга арань тинь лацонт. Тинь монь мезьсонга ашемасть обжа.

¹³ Тинь содасасть, васенцеда мон сань ширезонт, сяс мес сярятькстонь. Самай эста азондыне тейнть Пара кулять.

¹⁴ Катк эста монь сярядемазе ульсь тейнть стака канксокс, тинь сяка ашеде шарфта безярдезь эздон. Меколанкт, тинь седи ваксста васьфтемасть монь кода Шкаень ангел, кода Сонцень Иисус Христость.

¹⁵ Коза ина юмась тинь кенярдеманте? Мон кемоста азса, инголи тинь эсь сельмонтеньге аноктоледе максомс тейне, кда максовольхть.

¹⁶ Мезе ина? Кали видеть корхтамста мон арань тейнть душманкс?

¹⁷ Ня ломаттне ёладозь шарыхть перьфкант, но аф паронди эсонт ускихть эсь ширезост: ёрайхть явфтомс тинь монь эздон и тиемс тинь синцень перьфкаст шарыкс.

¹⁸ Сянь эса кальдяв аш, мзярда кивок шары перьфкант паронь арьсезь. Катк тяфта ули фалу, а аф аньцек эста, мзярда мон тинь мархтонтан.

¹⁹ Идне монь, тинь инксонт мон тага кирдян маятамат, кодапт кирди авась шачфтомста, мзярс тинь аф тиефтяда Христость лаца.

²⁰ Монь пяк мялезе тяни улемс тинь ётксонт и корхтамс мархтонт сяда ляпоста. Мон прокс аф содаса, мезе мархтонт тиемс.

Агарь и Сарра

²¹ Сят тинь эздонт, конатнень мяльсна эрямс койть азорксшинц ала, азость тейне, кали тинь аф кульсасть, мезе корхтай койсь?

²² Вдь эсонза сёрматф: Авраамонь ульсть кафта цёранза, фкясь Агарень, уре авать эзда, омбоцесь Саррань, волястонь авать эзда.

²³ Уре авать шабац шачсь кода шачендыхть сембе шабатне, а волястонь авать эзда шачись шачсь Шкаень надияфтомать коряс.

²⁴ Тя азксса ули валвеляфкс: ня кафта аватне ащихть кафта сотксонь няфтемакс. Агарь авась, конань иденза шачихть урексшис, няфтьсы ся сотксть, кона ульсь тиф-кемокстаф Синай панда пряса.

²⁵ Агарь – тя Синай пандсь, кона Аравияса. Сон тяниень пингонь Иерусалимсь, кона эсь идензон мархта эряй урексшиса,

²⁶ а менелень Иерусалимсь – воляшиса, и тя сон минь тядяньке.

²⁷ Сонь колганза азф Сёрматфксса: «Кеняртть, аф шачфтови и идьфтома ава! Кенярдезь юватькшнек, шачфтома маятамань аф содай! Вдь катфть сяда лама идьтонза мирде мархта эряйть коряс».

²⁸ Миньге, кемай ялгат, стама иттяма, конат Исааконь лаца шачсть надияфтомать коряс.

²⁹ Но кода эста ломанень вийса шачф идсь панцезе Ваймопожфонь вийса шачфть, тяфта моли тянивок.

³⁰ Мезе ина корхтай Сёрматфкссь? «Паньк уре авать-цёранек. Уре авать цёранцты аф максови алянц уликс-пароц. Алять уликс-пароц катк ляды аньцек воляшистонь авать цёранцты».

³¹ Тяфта, кемай ялгат, минь аф уре авать идензотама, а воляшистоннеть.