Павелонь сёрмац Галатияв 1 - Од Соткс Новый Завет на мордовском-мокша языке 2016

Шумбракстомась

¹ Мон, Павел, кона арась апостолкс аф ломаттнень эзда и аф ломань вельде, а Иисус Христость эзда и Шкай Алять эзда, кона вельмафтозе Иисусонь кулофста.

² Мон кучан пара вал Галатиянь кемаень пуромксненди эсь эздон и тястонь сембе кемай ялгатнень эзда.

³ Арьсян тейнть пароказне и сетьмоши Шкай Алять эзда и Иисус Христос Азороньконь эзда.

⁴ Сон максозе Эсь прянц минь пеженьконь инкса, сяс мес Сонь мялец идемс минь кяжи вийть эзда, кона азорондай тяни масторлангса. Тя ульсь Шкайть, минь Аляньконь, мяленц коряс,

⁵ конанди улеза шнама пефтома пингс! Аминь.

Аш лия Пара куля

⁶ Мон дивас прашендан, кода тинь тяшкава курок аердоде Шкайть эзда, кона тердедязь тинь Христосонь пароказнеса, и арьседе молемс кати-кодама лия пара куля мельге.

⁷ Аш лия пара куля! Но улихть ломатть, конат шорсесазь прянтень, ёрайхть тапарямс-гастямс Христость Пара кулянц смузенц.

⁸ Кда кивок кармай пачфнема тейнть пара куля, но аф сянь, конань минь инголи пачфтеськ, улендярян тя мянь мон али менельста ангел, – улеза ся сюдоф!

⁹ Минь ни азоськ тяда инголе и тага весть азса тейнть: улеза сюдоф ся, кие канды тейнть лия пара куля, аф сянь, конань тинь сявость седиезонт!

¹⁰ Мезе мон ёран сатомс: шнама ломаттнень эзда али Шкайть? Пади тинь арьсетяда: мон ёран ваномс ломаттнень мяльснон? Кда мон тянемс ванондолине ломаттнень мяльснон, мон афолень уле Христосонди покодикс.

Павел пачфнесы Христость Пара кулянц

¹¹ Содасть ина, кемай ялгат, Пара кулясь, конань мон азондыне, аф ломанень пряса арьсеф,

¹² и аф ломаттне максозь сонь тейне, афи ломаттне тонафтомазь тейнза. Тя Кулять максозе тейне Сонць Иисус Христоссь, мзярда эвондась тейне.

¹³ Тинь, арьсян, кулесть: монь ингольдень эряфозе ульсь евреень кемамать сембе коензон коряс и мон сембе вийса панцине Шкаень кемаень пуромкснень, мялезель машфтомс-тапамс синь.

¹⁴ Эсь ломаньтналсон фкя кизонь ялганень ёткса мон улень сембода инголе евреень кемамаса. Мон вельф псиста аралань-пяшкодень койхнень, конатнень тейнек кадозь кунардонь пингонь аляньке.

¹⁵ Но Шкайсь Эсь пароказненц коряс кочкамань монь нинге тядянь пекста шачемдон инголе и ладямань Эстейнза покодикс. Сон сась мяльс

¹⁶ панжемс тейне Эсь Цёранц и кучемс монь лия ломаньтналхненди: азондолине тейст Пара кулять Цёранц колга. Эста мон ашень веше ёнь ломаттнень кядьста,

¹⁷ и ашень моле Иерусалиму сятненди, кит арасть апостолкс мондедон инголи, а тунь Аравияв, сяльде меки мрдань Дамаску.

¹⁸ Меле, колма кизонь ётазь, мон молень Иерусалиму Пёторонь мархта васедема, и улень пялонза кеветиешка ши.

¹⁹ Лия апостолхнень эзда киньге ашень няе, Азороньконь Иаков брадтонза башка.

²⁰ Шкайсь няйсы: мон сёрмадса тейнть видеть, аф васькафнян.

²¹ Тяда меле мон тунь Сирияв и Киликияв.

²² Иудеяса Христосонь кемаень пуромксова монь шамас ашемазь сода.

²³ Синь аньцек кулендезь: вчёк ся, кие инголи панцесь эсонк, тяни азонды кемамать колга, конань инголи ёрась машфтомс.

²⁴ И шназь Шкайть сянкса, мес тяфта лиссь мархтон.