Павелонь сёрмац Ефесу 6 - Од Соткс Новый Завет на мордовском-мокша языке 2016

Тонафтомат иттненди и синь тядяснонды-аляснонды

¹ Итть, уледа кулхцондыхть тядянтенди-алянтенди, кода Азорть мельге молихне, сяс мес тя ули виде.

² «Ванк аляцень и тядяцень мяльснон» – тя васенце кошардомвалсь надияфтомань вал мархта:

³ «Эста кармай улема тейть цебярь, и кармат кувать эряма модать лангса».

⁴ И тиньге, алят, тясть сафне идентень кяжснон, а трясть-касфтость Азорть тонафтоманц и мярьгоманц коряс.

Тонафтомат уретненди и азорхненди

⁵ Урет, панжада ваймоса, мялень ванозь и трнатозь уледа кулхцондыкс модалангонь азоронтенди, кода и Христости.

⁶ Тяфта тиендеда аф аньцек сельме инголе няфтемать инкса, кода ломанень мялень ваныхне, но кода Христость уренза, седи ваксста тиендеда Шкайть мяленц коряс.

⁷ Покодеда мяль вельде, кода Азорти, а аф кода ломаттненди.

⁸ Тинь содасасть: Азорсь эрти максы ся цебярть коряс, конань сон тиезе, улендяряй сон урекс али воляшистоннекс.

⁹ Тиньге, азорхт, тиендеда урентень мархта тяконь лаца, кадость эвфнемантень, содамок, тинь тинцень лангсонт и синьге лангсост менельса ули Азор, конань инголе сембе ломаттне фкат.

Кемоста ащеда кяжть каршек

¹⁰ И мекольцесь, кемай ялгат, кемокснеда Азорса и Сонь инь оцю вийсонза.

¹¹ Щасть эсь лангозонт марнек тюремань щамть, конань максозе тейнть Шкайсь. Эста тинь карматада кемоста ащема идемэвозть кяжи арьсеманзон каршек.

¹² Сяс мес минь тюреманьке аф ломаттнень каршек, а кяжи ваймопожфонь оцюнятнень и азорхнень каршек, шобда вийхнень каршек, конат азорондайхть тя шобда пингонь масторлангса, и вярдень кяжи ваймопожфнень каршек.

¹³ Тянь инкса щада марнек тюремань щамса, конань максозе Шкайсь, и тяфта, кяжи шиста, тинь карматада кемоста ащема тейст каршек и, ётамок тюремать педа-пес, кирттяда.

¹⁴ Сяс ащеда кемоста: каркстасть перьфонтень видешинь карксса и щасть лангозонт видексшить, бта ваксарщам.

¹⁵ И катк карьсембялькс тейнть ули аноксшись пачфнемс Пара кулять сетьмошить колга.

¹⁶ Сембодонга пяк сявость кядезонт ванфтомань седяфть, лиякс мярьгомс, кемамать, конань вельде тейнть матовихть идемэвозть сембе палы налонза.

¹⁷ И сявость идемать, бта такия, и сявость Ваймопожфть торонц – Шкаень валть.

¹⁸ Тянь тиендесть эрь кодама озондомаса и эняльдемаса. Сембе пинкнень озондода Иняру Ваймопожфса. Уледа анокт и апак лотксек озондода Шкайти сембе иняру ломаттнень инкса.

¹⁹ И моньге инксон озондода: катк, мзярда мон ушедан корхтама, Шкайсь максы тейне виде валхт и мон аф пелезь карман панчсемонза Пара кулять салавашинц.

²⁰ Тя Кулять кандома мон кучфан и тяни сонь инксонза цинзерса пякстафан. Озондода, катк мон аф пелезь пачфнелине сонь, кода тейне и эряви тиендемс.

Мекольце валхне

²¹ Тихик, монь кельгома кемай ялгазе и Азорть валонь кирди покодиец, азондсы тейнть семботь монь колган. Эста тиньге карматада содамонза, мезе мон тиендян и кодамот монь тевне.

²² Мон кучине сонь тейнть тянкса: азондомс минь тевоньконь колга и ваймафтомс-кемокстамс седиентень.

²³ Шкай Алясь и Иисус Христос Азорсь катк максыхть тейнть, кемай ялгат, сетьмоши и кельгома мархта кемама!

²⁴ Улеза пароказнесь сембонь сятнень мархта, конат пефтома кельгомаса кельгсазь Азороньконь Иисус Христость! Аминь.