Павелонь сёрмац Ефесу 1 - Од Соткс Новый Завет на мордовском-мокша языке 2016

Шумбракстомась

¹ Павел, Шкайть мяленц коряс Иисус Христость апостолоц, кучи пара вал Ефесса эряй иняру ломаттненди, конат ванфнесазь эсь кемамаснон Иисус Христости.

² Мон арьсян тейнть пароказне и сетьмоши Шкайть Аляньконь и Иисус Христос Азороньконь эзда!

Пежетнень эзда идемась Иисус Христосса

³ Улеза шнаф Шкайсь, Иисус Христос Азороньконь Аляц! Христость эса Сон ни бславамазь минь менельса эрь кодама ваймопожфонь бславамаса.

⁴ Нинге масторлангть тиемдонза инголе Сон минь кочкамазь сембонь ёткста Христость эса улемать вельде. Тяфта минь ульхтяма инярукс и афсатыксфтомокс Сонь инголенза, и эрятама кельгомаса.

⁵ Сон Иисус Христость вельде минь инголькиге ладямазь Эстейнза идькс. Тя Сонь пара мялец.

⁶ Тяфта шнави Шкайть иневалдонь пароказнец, конань Сон казезе тейнек Эсь кельгома Цёранц вельде.

⁷ И Цёрать эса улемать вельде минь идефтяма Сонь версонза, лиякс, тейнек нолдафт пеженьке. Тяфтама козя Шкайть пароказнец!

⁸ Тя пароказнеть Шкайсь максозе тейнек апак ужяльтть эрь кодама смузьшинди и шарьхкодеманди.

⁹ Шкайсь пара мяленц коряс панжезе тейнек Эсь мяленц салавашинц, конань инголькиге путозе-ладязе пяшкодемс Христость эса

¹⁰ и кона тиевсь-пяшкодевсь, мзярда сась виде пингсь: Шкайсь сотозе марса семботь, мезе ули модать лангса и менельса, и максозе Христость кядялу.

¹¹ Сонь эсонза минь кочкамазь и тейнек аноклазь сембе ся паротнень, конат максовихть Шкайть ломанензонды. Тя ульсь Шкайть инголькиге арьсефонц коряс, Шкайть, кона семботь тиендьсы Эсь мяленц и ладяфонц коряс.

¹² Сяс мес Сонь мялецоль: минь, кит васенцекс путозь эсь надиямаснон Христость лангс, эрялеме Шкаень иневалдть шнаманц инкса.

¹³ Тиньге араде кемайкс Христости, мзярда кулесть видешинь валть, Пара кулять идемантень колга. И арамок кемайкс Христости, тейнть максовсь надияфтф Иняру Ваймопожфть тяштьксоц.

¹⁴ И сяс мес эсонк ули Иняру Ваймопожфсь, минь кемоста содасаськ: сембе ся паротне, конат аноклафт тейнек, улихть максфт, мзярда Шкайсь идесыне ломанензон Эсь иневалдонц шнаманкса.

Павелонь озондомац

¹⁵ Сяс монга, кулемок тинь кемамантень колга Иисус Азороньконди и кельгомантень колга сембе иняру ломаттненди,

¹⁶ апак лотксек сюконякшнян инксонт Шкайти, и лятфнетядязь тинь эсь озондомасон.

¹⁷ Катк Иисус Христос Азороньконь Шкаец, иневалдонь Алясь, максы тейнть смузьшинь Ваймопожф и Шкайть эзда панжема, и тяфта тейнть содави-шарьхкодеви Сон.

¹⁸ Катк Сон валдоптсыне тинь шарьхкодемантень сельмонзон, эста тинь няйсасть, кодама ся надиямась, конанди Сон тердедязь, и конашкава козя Сонь иневалдонь аноклафоц иняру ломаттненди,

¹⁹ и конашкава аф ункстави Сонь виец, кона покоди минь, Христости кемайхнень эса. Тя сяка инь оцю вийсь,

²⁰ конань вельде Шкайсь вельмафтозе Христость кулофнень эзда и озафтозе Сонь менельса види кяденц шири,

²¹ и путозе Сонь семботь коряс сяда вяри: эрь кодама ваймопожфонь оцюняда и азорксшида, вийда и вятида, и эрь кодама лемда, кона лятфневи аф аньцек тя пингонь эряфса, но и сай пингонь.

²² И Шкайсь семботь путозе Сонь пильгонзон алу и ладязе Сонь семботь лангса Азоркс, кемаень пуромксонь прякс.

²³ Кемаень пуромкссь – тя Христость ронгоц и пяшксешиц, Христость, конац пяшкотькшнесы семботь сембоса.