Матфей 9 - Од Соткс Новый Завет на мордовском-мокша языке 2016

Иисус пчкафтсы параличса колафть

¹ Эста Иисус озась венчти, уезе меки эрьхкть и пачкодсь ся ошти, коса эрясь.

² И вов, Тейнза кандсть ацам лангса сяряди, кона колафоль параличса. Мзярда Иисус няезе кемамаснон, мярьгсь сярядити: «Тят пеле, цёрай, тонь пежетне нолдафт».

³ Эста койти тонафтыхнень эзда кой-конат арьсесть: «Тя ломанць рахси Шкайть лангса».

⁴ Но Иисус шарьхкодезень синь арьсемаснон и мярьгсь: «Мес тинь тяфта кальдявста арьсетяда?

⁵ Мезсь сяда тёждя азомс: "Тонь пежетне нолдафт" али: "Стяк и якак"?

⁶ Но тяни содасть: Ломанень Цёрать модать лангса ули азорксшиц нолямс пежет». Эста Иисус мярьгсь параличса колафти: «Стяк, сявк ацамцень и архт эсь кудозт».

⁷ Ся стясь и тусь эсь кудозонза.

⁸ Тянь няемста сембе дивандасть и кармасть шнамонза Шкайть, кона макссь ломаттненди тяшка азорксши.

Иисус тердьсы Матфеень

⁹ Сяда тов молемста, Иисус няйсь ломань, кона озадоль каяфксонь кочкама вастть ваксса. Сонь лемоцоль Матфей. Иисус корхтай тейнза: «Мольхть Монь мельган». Матфей стясь и тусь Иисусонь мельге.

¹⁰ Мзярда Иисус ярхцась Матфеень пяле, тоза састь ламоц каяфксонь кочкайхне и лия пежуфне и озасть фкя шра ваксс Иисусонь и Сонь тонафниензон мархта.

¹¹ Фарисейхне няезь тянь и кармасть тонафнихнень кизефнема: «Мес тинь Тонафтыенте ярхцай каяфксонь кочкайхнень и лия пежуфнень мархта?»

¹² Иисус марязе тянь и мярьгсь: «Пчкафтысь эряви аф шумбрати, а сярядити.

¹³ Арда шарьхкодесть, кодама смузь кандыхть Сёрматфксонь ня валхне: "Мон учан эздонт кельгозь ужяльдема, а аф озксказнень каннема". Мон сань пежу ломаттнень Шкайти шарфтоманкса, а аф видексшиса эряйхнень».

Кизефкс постонь кирдемать колга

¹⁴ Эста Иисусти маладсть Иоаннонь тонафниенза и кизефтезь: «Мес минь и фарисейхне сидеста кирттяма пост, а Тонь тонафнихне – аф?»

¹⁵ Иисус мярьгсь тейст: «Кали пичедихть рьвяяма илань инжихне, мзярда рьвяяйсь мархтост? Но сайхть шит, мзярда рьвяяйть сявсазь ёткстост, и эста синь кармайхть поставама.

¹⁶ Кивок аф панни ташта щамти од щамста сязьф панкс; сяс мес од панкссь озай и варясь сядонга келеми.

¹⁷ Стане жа аф кайсихть и од вина кедень ташта кяскавс, сяс мес кедень кяскафне сязевихть, винась шуди и кяскафне юмайхть. Од винать кайсесазь кедень од кяскавс, эста и винаське и кяскафневок ванфтовихть».

Иисус вельмафтсы кулофста оцюнять стиренц и пчкафтсы сяряди авать

¹⁸ Мзярда Иисус корхтась тейст тянь колга, Тейнза маладсь фкя оцюня, прась пильгозонза и кармась корхтама: «Монь стирезе аньцек тяни кулось. Сак, путыть лангозонза кяттнень, и сон кармай эряма».

¹⁹ Иисус стясь и тусь мельганза, тонафниензовок мольсть мельгаст.

²⁰ Тя пингоня фкя авась, кона кемгафтува киза сярядсь веронь шудемаса, фталда маладсь Иисусонди и токазе Сонь щамонц пенц.

²¹ Авась эсь пачканза арьсесь: «Кда аньцек токаса Сонь щамонц, пчкан».

²² Иисус шарфтсь, няезе сонь и мярьгсь: «Стирняй, тят пеле, кемамаце пчкафтонзе тонь». И авась эстокиге пчкясь.

²³ Мзярда Иисус сувась оцюнять кудс и няезень нюдиса морайхнень и явсихнень,

²⁴ Сон мярьгсь тейст: «Лиседа тяста. Стирнясь ашезь кула, сон уды». Иисусть лангса кармасть пеетькшнема.

²⁵ Мзярда ломаттнень лихтезь, Сон сувась тоза, косоль кулофсь. Сявозе стирнять кядьта, и ся стясь.

²⁶ Тянь колга кулясь срадсь сембе ся аймакова.

Кафта сокорхнень пчкафтомасна

²⁷ Мзярда Иисус тусь тоста, мельганза мольсть кафта сокорхт и юватькшнесть: «Иисус, Давидонь Цёрац, ужяльдемасть минь!»

²⁸ Мзярда Иисус сувась кудботмос, сокорхне маладсь Тейнза. Иисус кизефтезень синь: «Тинь кематада, Тейне тиеви тя?» Сят корхтайхть Тейнза: «Кематама, Азор!»

²⁹ Эста Сон токазень сельмоснон и мярьгсь: «Катк ули тейнть кемамантень коряс», –

³⁰ и сокорхне кармасть няема. Иисус кемоста мярьгсь: «Ваность, катк тянь колга кивок аф кармай содама».

³¹ Синь лиссть тоста и сембе сяка азондсть Иисусонь колга сембе ся аймакова.

Аф корхтайть пчкафтомац

³² Ашесть кенере сят лисемс, кода Иисусти вятсть аф корхтай аля, конань колазе кяжи ваймопожфсь.

³³ Мзярда эздонза паньфоль кяжи ваймопожфсь, аф корхтайсь корхтазевсь. И ломаттне дивандазевсть: «Израильса тяфтама нинге мзярдовок ашель».

³⁴ А фарисейхне тянь каршес корхнесть: «Сон кяжи ваймопожфнень оцюняснон вийса панцесыне кяжи ваймопожфнень».

Нумада лама, а покайда кржа

³⁵ Иисус якась сембе ошева и велева, тонафтсь тостонь синагогава, азондсь Пара куля Оцязорксшить колга, пчкафнезень ломаттнень эрь кодама урмада и сярятьфта.

³⁶ Мзярда Иисус няезень пуромф ломаттнень, синь ужялькс арасть Тейнза, сяс мес ульсть пяк сизефт и сратфт, кода учат, конатнень аш ванысна.

³⁷ Эста Сон корхтай Эсь тонафниензонды: «Нумада лама, а покайда кржа;

³⁸ ина эняльдеда нумать Азоронцты, кучеза сёронь кочкайхть Эсь паксянц лангс».