Матфей 8 - Од Соткс Новый Завет на мордовском-мокша языке 2016

Иисус пчкафтсы наксафты урмаса сярядить

¹ Мзярда Иисус валгсь панда пряста, Сонь мельганза тусь лама ломань.

² И вов, маладсь Тейнза наксафты урмаса сяряди, прась плманжа лангс и мярьгсь: «Азор! Тейть аруяфтован, улеза мяльце».

³ Иисус венептезе кяденц, токафтозе ломанти и мярьгсь: «Мялезе – аруяк». И сянь наксафты урмац эстокиге ётась.

⁴ Иисус корхтай тейнза: «Ватт, киндинге тянь колга тят азонда, а архт, няфтьк пряцень озксвятиенди и кантт Шкайти озксказне, конань мярьгсь кандомс Моисей, и катк сембе няйсазь пчкамацень».

Римонь сядонь оцюнять кемамац

⁵ Мзярда Иисус сась Капернаум ошу, Тейнза маладсь Римонь сядонь оцюнясь и эняльдсь:

⁶ «Азор! Кудса покодиезе урмаськодсь, пильге лангска аф стякшни и кирди оцю сярятьф».

⁷ Иисус корхтай тейнза: «Мон саян и пчкафтса сонь».

⁸ Сядонь оцюнясь каршезонза мярьгсь: «Азор! Мон аф кондястян Тонь сувафтомс эсь кудботмозон; аст аньцек вал, и покодизе пчкяй.

⁹ Монь моньценьге лангсон улихть оцюнят, и монцьке оцюнян ушматтнень лангса. Мярьган фкяти: "Мольхть", – и сон моли; омбоцети: "Сак", – и сай; тейне покодити мярьган: "Тик сянь", – и тисы».

¹⁰ Тянь кулемста Иисус дивандась, шарфтсь мельганза моли ломаттненди и мярьгсь: «Видеста корхтан тейнть: Израильса Мон ашень васьфне тяфтама кемама.

¹¹ Корхтан тейнть: ламотне сайхть шинь стяма и шинь валгома ширде и озайхть илань шрать ваксс Менелень Оцязорксшиса марса Авраамонь, Исааконь и Иаковонь мархта.

¹² А сят, кинди аноклафоль Оцязорксшись, улихть ёрдафт тоста шобдати, коса синь кармайхть авардема и пеень мчкорфтома».

¹³ И Иисус мярьгсь сядонь оцюняти: «Архт куду и улеза тейть кемамацень коряс». И сянь покодиец эстокиге пчкясь.

Иисус пчкафтсы Пёторонь авозенц и лия сярядихнень

¹⁴ Мзярда Иисус сась Пёторонь пяли, Сон няезе: Пёторонь авозец матфоль васту и сярядсь пси урмаса.

¹⁵ Иисус токазе авать кяденц, и пси урмась кадозе сонь. Авась стясь и кармась синь перьфкаст шарома.

¹⁶ Мзярда сась илядьсь, Иисусти вятсть кяжи ваймопожфса лама колафта. Сон валса панезень кяжи ваймопожфнень и пчкафтозень сембе сярядихнень.

¹⁷ Сяс мес эрявсь пяшкодемс Исаия пророкть вельде азфсь: «Сон сявозень Эсь лангозонза минь урманьконь и кандозень сярятьфоньконь».

Иисусонь мельге молемать питнец

¹⁸ Мзярда Иисус няезень перьфканза ащи ламодонга лама ломаттнень, Сон мярьгсь тонафниензонды ётамс эрьхкть омба трвас.

¹⁹ Эста койти фкя тонафтысь маладсь Иисусти и мярьгсь: «Тонафты! Мон молян мельгат, коза Тон афолеть моле».

²⁰ Иисус корхтай тейнза: «Келаснень улихть варясна, менелень нармоттнень – пизосна, а Ломанень Цёрати аш коза путомс прянц».

²¹ Лия тонафниец мярьгсь Тейнза: «Азор! Нолдамак монь васенда куду алязень калмама!»

²² Но Иисус мярьгсь тейнза: «Мольхть мельган, и катк кулофне калмосесазь эсь кулофснон».

Иисус сетьмолгофтсы даволть

²³ Мзярда Иисус озась венчти, мархтонза озасть тонафниензовок.

²⁴ Апак учсек кеподсь вишке варма, и ведсь тяфта комболгодсь, нльне венчсна ваякшнесь. А Иисус удось.

²⁵ Эста тонафниенза маладсть Тейнза и стяфтозь Сонь, мярьгсть: «Азор! Идемасть минь: ваятама».

²⁶ Иисус корхтай тейст: «Мес тинь тяшкава пельхтяда? Вай, конашкава ёмла тинь кемаманте!» Сяльде Сон стясь, кардазень вармать и ведень комболкснень, и арась пяк сетьме.

²⁷ Ломаттне дивандасть и корхтасть: «Кие Сон тяфтамсь, нльне варматне и ведсь Сонь кулхцондсазь?»

Иисус панцы кяжи ваймопожфть ломанть потмоста

²⁸ Мзярда Иисус пачкодсь эрьхкть омба трвасонза ащи Гадарина мастору, каршезонза кевботмаронь калмоста лиссть кяжи ваймопожфса колаф кафта ломатть. Синь ульсть сяшкава кяжихть, нльне кивок ашезь ётнев тя киге.

²⁹ Синь ювадсть: «Мезе Тейть эздонк эряви, Иисус, Шкайть Цёрац? Тон пингта инголе сать минь маятафтомонк?»

³⁰ Синь эздост аф пяк ичкозе ванцть тувонь оцю стада.

³¹ И кяжи ваймопожфне эняльгодсть Иисусти: «Кда панцамасть, кучемасть тувонь стадав».

³² Сон мярьгсь тейст: «Арда». Эста кяжи ваймопожфне кадозь колафнень и сувасть тувотнень потмос. И эстокиге сембе стадась сери эрьхке трваста ёрдась пря ведьс и ваясь.

³³ Тувонь ваныхне ворьгодсть. Синь састь ошу, коса синь азондозь семботь, и сяньге, мезе ульсь кяжи ваймопожфса колафнень мархта.

³⁴ Эста сембе ошсь лиссь Иисусонь васьфтема. Сонь няемстонза синь эняльгодсть Тейнза кадомс аймакснон.