Матфей 7 - Од Соткс Новый Завет на мордовском-мокша языке 2016

Судендамать колга

¹ «Тяда суденда, эста тиньге аф ульхтяда судендафт;

² сяс мес кодама судса судендатада, Шкайсь стама судса тиньге судендатядязь. И кодама унксса ункстатада, стама унксса тиньге ункстатядязь.

³ Кода тон няйсак сардть кемай ялгацень сельмоса, но аф няйсак шочкть эсь сельмосот?

⁴ Кода тон мярьговат кемай ялгацти: "Макск, таргаса сардть сельмостот", мзярда тоньцень сельмосот шочка?

⁵ Шамафксонь канни! Васенда таргак шочкть эсь сельмостот, и эста няйсак, кода таргамс ялгацень сельмоста сардть.

⁶ Тяда макссе пинетненди мезевок иняру – синь комотихть лангозонт и сязенттядязь. Тяда ёря тувотнень инголи питни ожнат – синь тапсесазь ожнатнень пильгалост».

Анада, вешеда, чакада

⁷ «Анада, и тейнть максови; вешендеда, и мутада; чакада, и тейнть панжеви.

⁸ Эрь анайти максови, вешендись муй и чакайти панчсазь.

⁹ Кие эздонт эсь цёранцты максы кев, кда сон анай кядьстонт кши?

¹⁰ И анандяряй кал, максы тейнза куй?

¹¹ Кда тинь, кяжи ломатть, машттада шабантенди паронь максома, эста сядонга Менелень Алянте максы парот сятненди, кит анайхть Сонь кядьстонза.

¹² Тяфта, сембоса тиендеда ломаттнень мархта стане, кода мяленте синь тиендельхть мархтонт. Тяса койть и пророкнень тонафтомаснон смузьсна».

Тяйня ортась

¹³ «Сувседа тяйня ортава, сяс мес кели ортась и оцю кись вятихть аду, и ламотне молихть эзгаст;

¹⁴ а тяйня ортась и тяйня кись вятихть эряфти, и аф ламотне мушендсазь тя кить».

Шуфтсь содави иможензон коряс

¹⁵ «Пеледа прорококс прянь тиендида, конат сашендыхть тейнть учань кедьса, а потмоваст синь – пяляз врьгаст.

¹⁶ Тевснон коряс содавихть синь. Дяряй кочксихть сялги тишеста виноград али кумбаравста инжир?

¹⁷ Цебярь шуфтсь максы цебярь имошт, а кальдяв шуфтсь – кальдяфт.

¹⁸ Цебярь шуфтть лангса аф эрсихть кальдяв имошт, а кальдяв шуфтть лангса – цебярьхть.

¹⁹ Эрь шуфтть, кона аф максси цебярь имошт, керсесазь и ёрясазь толс.

²⁰ Сяс иможснон коряс содасасть синь.

²¹ Аф эрсь, кона корхтай Тейне: "Азор! Азор!", пови Менелень Оцязорксшити, а ся, кона пяшкотькшнесы Менелень Алязень мяленц.

²² Ся шиня ламотне мярьгихть Тейне: "Азор! Азор! Дяряй аф Тонь лемсот минь пророчендаме? Аф Тонь лемсот панцеськ кяжи ваймопожфнень ломаттнень эзда? Аф Тонь лемсот тиендеме лама лия вии тевда?"

²³ И эста азса тейст: "Мон мзярдовок тинь ашедязь сода; ворьда маластон, коень колайхть"».

Валвеляфкс кафта кудонь путыхнень колга

²⁴ «Тяфта, кие кулхцондсыне Монь ня валнень и тии синь коряваст, ули ёню ломань лаца, кона путозе эсь кудонц кев лангс.

²⁵ Тусь пизем, лиссть трвастост ляйхне, уфазевсть варматне и эрьхтсть ся кудть лангс; но сон ашезь калада, сяс мес путфоль кев лангс.

²⁶ А кие кулхцондсыне Монь ня валнень и аф тии синь коряваст, ули ёньфтома ломань лаца, кона путозе эсь кудонц шувар лангс.

²⁷ Тусь пизем, лиссть трвастост ляйхне, уфазевсть варматне и эрьхтсть ся кудть лангс, и сон каладсь, и марнек срадсь».

²⁸ Мзярда Иисус аделазе корхтаманц, ломаттне дивандакшнесть Сонь тонафтоманцты,

²⁹ сяс мес Сон тонафтозень синь аф стане, кода койти тонафтыхне и фарисейхне, а кода ломань, конань ули азорксшиц.