Матфей 5 - Од Соткс Новый Завет на мордовском-мокша языке 2016

Кие павазу?

¹ Лама ломанень няемста, Иисус куцсь панда пряс. Сон озась, и Тейнза маладсть тонафниенза.

² Иисус кармась тонафтомост:

³ «Павазуфт Азорть инголе ашу ваймотне, сяс мес синне Менелень Оцязорксшись.

⁴ Павазуфт ризнайхне, сяс мес Шкайсь синь кеняртьфтсыне.

⁵ Павазуфт сятяв ваймотне, сяс мес синне ули масторлангсь.

⁶ Павазуфт сят, конат сембе вийса вешендьсазь Шкайть мяленц пяшкодеманц, сяс мес Шкайсь пяшкодьсыне синь вешфксснон.

⁷ Павазуфт ломанень кельгозь ужяльдихне, сяс мес синь улихть кельгозь ужяльтьфт.

⁸ Павазуфт сят, кинь аруфт седисна, сяс мес синь няйсазь Шкайть.

⁹ Павазуфт ломаттнень ёткса ладямань тиихне, сяс мес Шкайсь лемдьсыне синь Эстейнза шабакс.

¹⁰ Павазуфт сят, кинь эса панцихть Шкайть мяленц коряс эряманкса, сяс мес синне Менелень Оцязорксшись.

¹¹ Павазуфтада тинь, мзярда тинь сялттядязь и панцетядязь, валонттядязь рдазса Монь инксон.

¹² Кеняртькшнеда и пеедеда, сяс мес менельса эсонт учи оцю казне. Тяфта панцезь пророкненьге, конат эрясть тиндедонт инголи».

Салсь и валдсь

¹³ «Тинь – модать салоц. Кда салсь юмафтсы таньфонц, кода тисак сонь меки салукс? Сон козовок ни аф кондясти, лядонды аньцек ёрдамс ломанень пильгалу.

¹⁴ Тинь – масторлангса валдсь. Панда пряса ащи ошсь аф кяшеви ломанень сельмода.

¹⁵ Мзярда крьвяснесазь штатолть, сонь аф кяшендьсазь кядьгоня алу, а путнесазь штатолонь кирдемас – и сон кудса сембонди валдопты.

¹⁶ Тянь лаца катк тиньге валдонте валдопты ломаттненди, катк синь няйсазь тинь пара тевонтень и шнакшнесазь Алянтень, кона менельса».

Христос сась пяшкодемс койть

¹⁷ «Тяда арьсе, бта Мон сань койть али пророкнень сёрматфснон колама; аф коламост сань, а пяшкодемост.

¹⁸ Видеста корхтан тейнть: мзярс менельсь и модась аф юмайхть, фкявок буквась и фкявок китькскясь койста аф юмай, мзярс сон педа-пес аф пяшкодеви.

¹⁹ Ся, кие коласы ня кошардомвалхнень эзда хуш инь ёмлать и тянди тонафтсыне лиятнень, ся лувови инь ёмлакс Менелень Оцязорксшиса, а кие пяшкодьсыне кошардомвалхнень и тонафтсыне тянди лиятнень, ся ули Менелень Оцязорксшиса пяк оцюкс.

²⁰ Корхтан тейнть, кда тинь аф пяшкодьсасть Шкайть мяленц сяда лац фарисейхнень и койти тонафтыхнень коряс, эста тинь аф сувафтада Менелень Оцязорксшити».

Кяжть колга

²¹ «Тинь кулесть, мезе азфоль атянь-атяньконди: "Тят шавонда; кие шави, ся ули судендаф".

²² А Мон корхтан тейнть: эрсь, кие туфталфтома кяжиякшни кемай ялганц лангс, ся ули судендаф; кие мярьги кемай ялганц лангс: "Шава пря", ся судендави Оцю пуромксса; а кие мярьги: "Ёньфтома", ся пови адонь толти.

²³ Сяс, кда тон кандат казне Шкайти и алтарть ваксса лятфтасак: лангозт кирди кяж тонь кемай ялгаце,

²⁴ эста катк казнецень алтарть ваксс и архт, васенда мирендак кемай ялгацень мархта, и аньцек тяда меле мрдак и макск казнецень Шкайти.

²⁵ Кда кивок судендай мархтот и вяти эсот судс, ладяк мархтонза ки кувалма, афток лангозт молись вяттянза судьяти, а судьясь макстанза пякстафнень ваныснонды, и тонь ёрдатядязь пякстамгудс.

²⁶ Видеста корхтан тейть: тоста аф лисят, мзярс аф пандсак сембе шумоцень трёшниконьбес».

Полань полафтомать и явомать колга

²⁷ «Тинь кулесть, мезе азфоль: "Тяк полафне полацень".

²⁸ А Мон корхтан тейнть: ся, кие ваны авать лангс и ёрай удомс мархтонза, ся седисонза полафтозе ни рьванц.

²⁹ Кда види сельмоце вяттянза пежес, таргак сонь и ёрдак; тейть сяда пара ули, кда юмай ронгцень пяльксоц, а аф сембе ронгце ули ёрдаф аду.

³⁰ И кда види кядце вяттянза пежес, керк сонь и ёрдак; тейть сяда пара ули, кда юмай ронгцень пяльксоц, а аф сембе ронгце ули ёрдаф аду.

³¹ Нинге азфоль: "Кда кие яви рьванц мархта, катк максы тейнза явомать колга кагод".

³² А мон корхтан тейнть: кие яви рьванц мархта аф полань полафтоманкса, а лия кодамовок туфталонкса, ся мирдсь вятьсы катф рьванц полань полафтомати, и кие рьвяяй явф авань лангс, ся – полань полафты».

Варамать колга

³³ «Нинге тинь кулесть, мезе азфоль атянь-атяньконди: "Тяк колсе варамацень. Тик семботь, мезе надияфнеть Шкайти".

³⁴ А Мон корхтан тейнть: ёфси тят вара – аф менельса, сяс мес сон Шкайть азорондама вастоц;

³⁵ аф модаса, сяс мес Шкайти сон пильгонь путома васта; аф Иерусалимть лемса, сяс мес сон инь оцю Оцязорть ошец;

³⁶ эсь лемсотка тят вара, сяс мес эстейть аф тиеви фкявок шяярня аф акшекс, аф равжекс.

³⁷ Кда мяленте мярьгомс "тяфта", мярьгода – "тяфта", кда мяленте мярьгомс "аф", мярьгода – "аф". А мезе лия тянди поладови – ся Кальдявть эзда».

Кяжень пандомать колга

³⁸ «Тинь кулесть, мезе азфоль: "Сельмонкса – сельме, пеенкса – пей".

³⁹ А Мон корхтан: кяж кяжса тят панда. Кда кивок лкштаттянза види щёка ланга, ладяк лкштадемс кержитьке.

⁴⁰ Ёрандяряй кивок суд вельде сявомс тонь панарцень, макск тейнза вярде щамценьге.

⁴¹ И кда кивок кошарттанза тонь ётамс мархтонза вайгяльбе, ётак кафта.

⁴² Кядьстот анайти – макст, и тят шарфне сянь эзда, кие ёрай сявомс кядьстот пандомда».

Душманонди кельгомать колга

⁴³ «Тинь кулесть, мезе азфоль: "Кельк маластоцень и тяк кельге душманцень".

⁴⁴ А Мон корхтан тейнть: кельгость душманонтень, бславакшнесть сюдыентень, тиендеда цебярь аф кельгиентенди и озондода сялдыентень инкса и сятнень инкса, кие панци эсонт.

⁴⁵ Аньцек эста ульхтяда шабакс Менелень Алянтенди, сяс мес Сон шити мярьгонди лисендемс кальдяфнень и цебярьхнень вельхксс, кучси пизем видексшинь ломаттнень лангс и пежуфнень лангс.

⁴⁶ Кда карматада кельгомост аньцек сятнень, кит тинь кельктядязь, эста мезенкса тинь казендемс? Тяфта вдь тиендихть каяфксонь кочкайхневок!

⁴⁷ И кда тинь шумбрандатада аньцек эсь кемай ялгантень мархта, мезе ни пяк тяфтама тиенттяда? Тяфта вдь тиендихть сятка, кит афкуксонь Шкайти аф кемайхть!

⁴⁸ Сяс, уледа сембе ширде цебярькс, кода сембе ширде цебярь тинь Менелень Алянте».