Матфей 4 - Од Соткс Новый Завет на мордовском-мокша языке 2016

Идемэвозсь тяряфнесы сувафтомс Иисусонь пежес

¹ Тяда меле Ваймопожфсь вятезе Иисусонь шавмодав вага мезенди: тоса идемэвозсь тяряфнезе сувафтомс Сонь пежес.

² Нильгемонь ши и нильгемонь ве ащесь Иисус апак ярхцак и пяк вачсь пекоц.

³ Маладсь Тейнза варчсись и мярьгсь: «Кда Тон Шкаень Цёрат, мярьк ня кефненди арамс кшикс».

⁴ Но Иисус каршезонза мярьгсь: «Сёрматф: "Аф аньцек кшить вельде эряй ломанць, а эрь валть вельде, кона лиси Шкайть кургста"».

⁵ Тяда меле идемэвозсь вятезе Сонь иняру ошу и стяфтозе Шкаень кудть пряс,

⁶ и корхтай Тейнза: «Кда Тон Шкаень Цёрат, ёрдак пря алу, вдь сёрматф: "Шкайсь кошардсыне ангелонзон ванфтомс тонь, и кядьсост канттядязь тонь, афоль пупорда тонь пильгце кев лангс"».

⁷ Иисус мярьгсь тейнза: «Тоса тяфтавок сёрматф: "Тяк варчсе Азорть, Тонь Шкайцень виенц"».

⁸ Эста тага идемэвозсь сявондьсы Иисусть серидонга сери панда пряс, няфнесыне Тейнза модалангонь сембе масторхнень и синь мазышиснон-козяшиснон,

⁹ и корхтай Тейнза: «Сембонь тянь максса Тейть, кда праят пильгозон и сюконят тейне».

¹⁰ Иисус каршезонза мярьгсь: «Аертт эздон, Сатана; вдь сёрматф: "Азорти, эсь Шкайцти сюконякшнек и аньцек Тейнза покотть"».

¹¹ Эста идемэвозсь кадозе Иисусонь, и вов, ангелхне састь и кармасть лездома Тейнза.

Иисус ушедозе Эсь покодеманц Галилеяса

¹² Мзярда Иисус марязе: Иоанн Кстиндайсь пякстамгудса, Сон мрдась меки Галилеяв.

¹³ Кадозе Назаретть и кармась эряма Капернаум ошса, кона ащи Галилеянь эрьхкть трваса Завулон и Неффалим масторса.

¹⁴ Тяфта лиссь, сяс мес эрявсь пяшкодемс Исаия пророкть вельде азф валхнень:

¹⁵ «Завулон масторсь и Неффалим масторсь, конат ащихть оцюведти вяти кить лангса, Иорданть фтала, лия ломаньтналонь Галилеясь –

¹⁶ шобдашиса эряй ломаттне, няйсть оцю валда, и куломань цильфса эряйхнень валдоптозень валдсь».

¹⁷ Эстоньбере Иисус ушедсь кулянь пачфнема: «Шарфтода Шкайти, Менелень Оцязорксшись маласа».

Иисус тердьсыне васенце тонафнихнень

¹⁸ Галилеянь эрьхкть трвава ётамста Иисус няйсь кафта братт, Симононь, конань лемнезь Пёторкс, и сонь брадонц, Андреень. Синь ульсть калонь кунцихть и ёрязь эрьхкти калонь кундаматнень.

¹⁹ Иисус мярьгсь тейст: «Моледа мельган, и Мон тихтядязь тинь ломанень кунцикс».

²⁰ Синь эстокиге кадозь калонь кундаматнень и тусть мельганза.

²¹ Иисус тусь тоста сяда тов и няйсь лия кафта братт, Иаковонь и сонь Иоанн брадонц, Зеведеень цёранзон. Синь венчса аляснон мархта петнезь калонь кундамаснон. Иисус синьге тердезень.

²² Сятка кадозь венчть, аляснон и эстокиге тусть Сонь мельганза.

Иисус пчкафнесыне сярядихнень

²³ Иисус якась сембе Галилеява, тонафтсь синагогава, пачфнесь Пара куля Шкаень Оцязорксшить колга и пчкафнезень ломаттнень эрь кодама урмада и сярятьфта.

²⁴ Иисусонь колга кулясь срадсь марнек Сириять келес; и вятнезь Тейнза сембе сярядихнень и эрь кодама урмаса маятайхнень, кяжи ваймопожфса колафнень, эсь урмаса сярядихнень, параличса колафнень, и Сон пчкафнезень синь.

²⁵ Иисусонь мельге мольсь пяк лама ломаньда Галилеяста, Кемонь Ошень аймакста, Иерусалимста, Иудеяста и Иорданть омбокста.