Матфей 3 - Од Соткс Новый Завет на мордовском-мокша языке 2016

Иоанн Кстиндайсь аноклай ки Азорти

¹ Ся шитнень сась Иоанн Кстиндайсь и пачфнесь куля Иудеянь шавмодаса:

² «Шарфтода Шкайти, сяс мес маладсь Менелень Оцязорксшись».

³ Иоанн ульсь ся, конань колга корхтась Исаия пророксь: «Серьгядить вайгялец кайги шавмодаса: "Аноклада Азорти ки, видептесть Тейнза китнень-яттнень"».

⁴ Иоаннонь щамоц ульсь ишимонь понаста, перьфксоц карксафоль шнань карксса. Ярхцамбялькс тейнза ульсть паксянь циледихне и вирень медсь.

⁵ Тейнза сашендсь пяк лама ломань Иерусалимста, сембе Иудеяста и Иордан ляйть перьфста.

⁶ Сон кстиндакшнезень ломаттнень Иордан ляйса, мзярда синь виденцякшнесть эсь пежесост.

⁷ Сон ваны: кстиндама сашенды лама фарисейда и саддукейда, и мярьгсь тейст: «Пупай куень лефкст! Кие тонафтодязь тинь ворьгодемс Шкайть сай пингонь судонц эзда?

⁸ Эсь тевсонт няфтесть Шкайти шарфтомантень,

⁹ и тяда арьсе идемс прянтень валса: "Минь аляньке – Авраам". Корхтан тейнть: Шкайсь машты тиемс ня кефнень эзда Авраамонди итть.

¹⁰ Узерсь ащи ни шуфттнень юрснон ваксса: эрь шуфтть, кона аф канды цебярь имошт, керсазь и ёрдасазь толти.

¹¹ Мон кстиндатядязь тинь ведьса Шкайти шарфтомантень няфтеманкса, но мельган Молись мондедон вии. Мон аф кондястян кандомс Сонь сандалиянцка. Сон кармай кстиндамонт тинь Иняру Ваймопожфса и толса.

¹² Сонь кядьсонза каймоц, и Сон понжафтсы сёроть тинголангса. Тозерть кочкасы утому, а ювть плхтасы аф мадонды толса».

Иисусонь кстиндамац

¹³ Эста Иисус сась Галилеяста Иорданть трвас Иоаннонь кядьста прянц кстиндафтома.

¹⁴ Иоанн тяряфнесь лоткафтомс Сонь и мярьгсь: «Тя Тейть эряволь монь кстиндамс, а Тон сать тейне?»

¹⁵ Но Иисус каршезонза мярьгсь: «Катк тяни ули тяфта; тейнек эряви тиемс ся, мезе ёрай эздонк Шкайсь». Эста Иоанн тяфта и тись.

¹⁶ Кстиндамда меле Иисус эстокиге лиссь ведьста, и панжевсь Тейнза менельсь, и няезе Шкаень Ваймопожфть, кона гуляня лаца валгсь Сонь лангозонза.

¹⁷ И менельста кулевсь вайгяль: «Тя Монь кельгома Цёразе, Монь кенярдема вастозе».