Матфей 27 - Од Соткс Новый Завет на мордовском-мокша языке 2016

Иисусть вятьсазь Пилатонди

¹ Валдашкодомшовор сембе озксвятиень оцюнятне и ломаньтналонь оцюнятне эсь ётковаст корхтамста састь мяльс шавомс Иисусонь.

² Синь сотнезь Сонь, лихтезь тоста и максозь Римонь оцюняти Понтий Пилатонди.

Иудать куломац

³ Мзярда Иуда, Иисусонь мииец, няезе: Иисус судендаф куломас, сон каендась и мрдафтозе сиянь колмогемонь ярмакть озксвятиень оцюнятненди и ломаньтналонь оцюнятненди,

⁴ и мярьгсь: «Мон сувань пежес, мийне аф муворуть». Но синь тейнза корхтайхть: «Кодама минь тевоньке? Тя тевсь тонне».

⁵ Эста Иуда ёрдазень ярмакнень Шкаень кудть кияксонцты, лиссь и пондазе прянц.

⁶ Озксвятиень оцюнятне кочказь ярмакнень и мярьгсть: «Койть коряс ня ярмакнень аш кода путомс Шкаень кудть ярмаконзон ёткс, сяс мес инксост валфоль вер».

⁷ Синь корхтасть эсь ётковаст и састь мяльс рамамс ня ярмакнень лангс сяканянь тиендить паксянц лия масторонь ломаттнень калмама вастонди.

⁸ Сяс и тячити самс ся вастсь лемневи Веронь Паксякс.

⁹ Тяфта пяшкодевсть Иеремия пророкть вельде азф валхне: «Синь сявозь сиянь колмогемонь ярмакть – питнеть, конань путозь Сонь инксонза Израилень ломаттне,

¹⁰ и рамазь лангозост сяканянь тиендить паксянц, кода кошардомань Азорсь».

Иисус Пилатонь инголе

¹¹ Иисус ащесь Пилат Римонь оцюнять инголе и ся кизефнесь эсонза: «Тон еврейхнень Оцязорснат?» «Тя тон тяфта корхтат», – мярьгсь каршезонза Иисус.

¹² А мзярда озксвятиень оцюнятне и ломаньтналонь оцюнятне муворгофнезь Сонь, Сон каршезост мезевок изь корхта.

¹³ Эста Тейнза корхтай Пилат: «Дяряй Тон аф кульсак, мзяра муворгофнема лангозт таргасть?»

¹⁴ Но Иисус каршезонза фкявок вал ашезь аза, мезсь пяк дивандафтозе Пилатонь.

Иисусонь куломас судендамац

¹⁵ Римонь оцюнять ульсь коец Очижинь иласта нолнемс пякстафнень эзда фкять, сянь, кинь кочксезь ломаттне.

¹⁶ Ся пингть нинге пякстафоль сембонди содаф Вараввась.

¹⁷ Мзярда ломаттне пуромсть, Пилат кизефтезень синь: «Кинь ёратада кядьстон нолдафтомс: Вараввань али Иисусть, кона лемневи Христоскс?»

¹⁸ Вдь Пилат содазе: Иисусонь максозь сонь кядезонза сельмонь каямать инкса.

¹⁹ Мзярда Пилат озафоль судендама вастозонза, сонь рьвац кучсь тейнза вал: «Мезевок тят тие тя Видексшинь Ломанти, сяс мес тячи онстон мон лама сталма кирдень Сонь инксонза».

²⁰ Но озксвятиень оцюнятне и ломаньтналонь оцюнятне корхтазь ломаттнень нолдафтфтомс Вараввать, а Иисусонь максфтомс шавомс.

²¹ Пилат оцюнясь кизефтезень синь: «Кинь ня кафттнень эзда тинь мяленте нолдафтомс кядьстон?» «Вараввать!» – ювадсть ломаттне.

²² Пилат корхтай тейст: «А мезе тейне тиемс Иисусть мархта, кона лемневи Христоскс?» Сембе каршезонза ювадсть: «Эськотьк Сонь крёзти!»

²³ Пилат кизефнесыне: «Мезень кальдяв Сон тись?» Ломаттне нинге сядонга пешкодсть: «Эськотьк Сонь крёзти!»

²⁴ Пилат няйсы: мезевок тейнза аф тиеви, аньцек сядонга пяк кепси ломанень кяжсь. Сон кантфтсь ведь, ломаттнень ингольде штазень кядензон и мярьгсь: «Мон аф муворуван тя Видексшинь Ломанть куломаса. Ваность тинць».

²⁵ Сембе ювадсть каршезонза: «Катк Сонь вероц ули минь лангсонк и минь шабаньконь лангса!»

²⁶ Эста Пилат нолдазе тейст Вараввань, а Иисусонь мярьгсь пикссемс и эськодемс крёз лангс.

Ушматтне пеетькшнихть Иисусонь лангса

²⁷ Тяда меле Пилатонь ушманонза вятезь Иисусонь оцюнять кудс и пуроптозь перьфканза сембе ушман ялгаснон.

²⁸ Синь каяфтозь лангстонза щамонзон и щафтсть шобдаза-якстерь тюсса щам.

²⁹ Сяльде кодасть сялги тишеста каштаз, щафтозь прязонза, а види кядезонза макссть нюдинь байдек и ушедсть лангсонза пеетькшнема. Прашендсть инголенза плманжа лангс и рахсезь корхтасть: «Ульхть шумбра, еврейхнень Оцязорсна!»

³⁰ Синь сельгондсть лангозонза, сявозь кядьстонза байдекть и пикссезь Сонь пря ланга.

³¹ Мзярда топодемс рахсесть лангсонза, синь каяфтозь лангстонза якстерь щамть, щафтозь меки Сонцень щамонзон и сявозь крёз лангс эськодемс.

Иисусонь крёз лангс эськодемац

³² Ошста лисемста синь васьфтсть Киринеянь ломань, конань лемоцоль Симон. Синь кошардозь сонь кандомс Иисусонь крёзонц.

³³ Мзярда синь састь ся вастти, конань лемнезь Голгофакс, лиякс мярьгомс, Пряпакарь вастокс,

³⁴ синь макссть Иисусонди симомс сяпе мархта шоряф винада. Сон варжазе и ашезь карма симома.

³⁵ Иисусонь крёз лангс эськодемада меле ушматтне каясть жерьба и вельденза явозь эсь ётковаст щамонзон,

³⁶ и озасть ванфтомонза.

³⁷ Прянц вельхксс повфтасть сёрматфкс, коса азфоль мезьса Сон мувору: «Тя Иисус, Еврейхнень Оцязорсна».

³⁸ Иисусонь мархта крёз лангс эськотьфтольхть кафта салайхть-шавихть, фкясь види кядь, омбоцесь кержи кядь ширезонза.

³⁹ Вакска ётайхне сялдозь Иисусонь и прянь шуказь корхтасть:

⁴⁰ «Эх, Шкаень кудонь срафты и колма шиста меки тии! Идек Эсь пряцень. Кда Тон Шкайть Цёрацат, валк крёзть лангста!»

⁴¹ Тяконь лаца Иисусонь лангса рахсесть озксвятиень оцюнятне, койти тонафтыхне, ломаньтналонь оцюнятне и фарисейхне. Синь корхтасть:

⁴² «Лиятнень идекшнезень, а Эсь пряц аф идеви! Кда Сон Израилень Оцязорсь, катк тяни валги крёзть лангста и эста минь Тейнза кематама.

⁴³ Сон надиясь Шкайть лангс, катк Шкайсь Сонь и идесы, кда Тейнза Сон эряви. Вдь Сон лемнезе Эсь прянц Шкаень Цёракс».

⁴⁴ Тяконь лаца Сонь сялдозь салайхне-шавихневок, конат эськотьфтольхть мархтонза крёз лангс.

Иисусонь куломац

⁴⁵ Котоце частста сявомок вейхксоце частти молемс сембе масторть вельхтязе шобдась.

⁴⁶ Вейхксоце частть малава Иисус кайгиста ювадсь: «Или́, Или́! Лама́ савахфани́?» – кона шарьхкодеви: «Шкаезе, Шкаезе! Мес Тон кадомайть Монь?»

⁴⁷ Тянь кулемста тоса ащихнень эзда кой-конат мярьгсть: «Сон Илиянь тернесы».

⁴⁸ Эстокиге фкясь эздост ласьксь, сявсь ведьбангоня, начфтозе шапама винаса, ашкодозе байдек пес и ёразе симдемс Иисусонь.

⁴⁹ Лядыхне корхтасть: «Ожу, ванцаськ, сай али аф Илиясь идемонза!»

⁵⁰ Иисус тага кайгиста пешкодсь, и ваймоц лиссь.

⁵¹ Эстокиге Шкаень кудса котфонь перяфкссь сязевсь кафтова, вярде алу; шерьхкозевсь модась и лазовсть кевбанттне.

⁵² Панжевсть калмотне; ламоц иняру ломаттнень ронгсна вельмасть

⁵³ и лиссть калмоста. Иисусть вельмамдонза меле, тусть иняру ошу, коса синь няезь лама ломань.

⁵⁴ Мзярда сядонь оцюнясь и сят, кит мархтонза ванфтозь Иисусонь, няезь модать шерьхкоманц и сембонь, мезе лиссь, синь пяк эводсть и мярьгсть: «Тя Ломанць афкукс ульсь Шкайть Цёрац!»

⁵⁵ Тоса тяфта жа ульсть ламоц аватне, конат мольсть Иисусонь мельге Галилеяста самстонза и лезнесть Тейнза. Синь ванцть семботь лангс ичкозде.

⁵⁶ Ётксост ульсть Магдаласта Мария, Иаковонь и Иосиень Мария тядясна и Зеведеень цёранзон тядясна.

Иисусонь калмамац

⁵⁷ Илять сась Иосиф, Аримафея ошень козя ломань. Сонга ульсь Иисусонь тонафниец.

⁵⁸ Сон мольсь Пилатонди и аназе Иисусонь ловажанц. Эста Пилат мярьгсь максомс.

⁵⁹ Иосиф сявозе ловажать, ашкодозе ару иляназонь котфс

⁶⁰ и калмазе сонь эсь од калмозонза, конань аф кунара шувфтозе кевбандс. Калмос сувама вастти сон веляфтсь оцю кев и тусь.

⁶¹ Тоса ульсь Магдаласта Мария и омбоце Мариясь. Синь озафтольхть калмоть каршеса.

Пилат максы ванфтыхть Иисусонь калмонцты

⁶² Омбоце шиня, ваймамань шиста, Пилатонди састь озксвятиень оцюнятне и фарисейхне

⁶³ и мярьгсть: «Азор! Минь лятфтаськ, кода тя васькафнись нинге шиса улемстонза мярьгсь: "Колма шида меле Мон вельман".

⁶⁴ Сяс мярьк ванфтомс калмоть колмоце шить самс, афток сайхть веть Сонь тонафниенза и саласазь ловажать, и сяльде кармайхть корхтама ломаттненди: "Сон вельмась кулофста". И мекольце васькафнемась ули сядонга кальдявкс васенцеть коряс».

⁶⁵ Пилат корхтай тейст: «Вага тейнть ванфтыхть. Арда и ванфтость калмоть стане цебярьста, кода машттада».

⁶⁶ Синь мольсть, путсть кевть лангс тяштькс, и кадсть калмоть ваксса ванфтыхть.