Матфей 24 - Од Соткс Новый Завет на мордовском-мокша языке 2016

Иисус аноконди азонды Шкаень кудть срафтоманц колга

¹ Иисус лиссь Шкаень кудста. Тоста молемста Тейнза нажядсть тонафниенза, синь мяльсноль няфтемс Тейнза Шкаень кудть сембе ширде.

² Иисус мярьгсь тейст: «Няйсасть сембонь тянь? Видеста корхтан тейнть: тяса кев лангс кевга аф ляды, сембось ули срафтф-калафтф».

Мекольдень пинкнень тяштьксна

³ Мзярда Иисус ащесь озада Вайшуфта пандть лангса, нажядсть Тейнза ськамост тонафниенза и кизефтезь: «Азк тейнек, мзярда тя кармай улема? И кодама тяштьксонь коряс минь содасаськ Тонь самацень и тя пингть пенц?»

⁴ Иисус каршезост корхтай: «Ванода, кивок афоледязь васькафта.

⁵ Ламотне кармайхть сашендома Монь лемсон и корхтама: "Мон – Христоссян", и ламотнень васькафтсазь.

⁶ Тинь марятада тюремань зярьфт и тюремань колга кулят. Ванода, тяда эводе, тянди эряви улемс, но тя нинге аф песь.

⁷ Ломаньтналсь кеподи ломаньтнал лангс, масторсь – мастор лангс, сайхть вача пингт и куломань урмат и васток-васток шерьхкозеви модась.

⁸ Сембось тя ули, кода шачфтомъётконь маятаматнень ушеткссна.

⁹ Тинь фатятядязь, макстядязь маятамас и шафтядязь, и Монь лемозень инкса сембе ломаньтналхне кармайхть аф кельгомонт.

¹⁰ Эста ламотне аердыхть кемамать эзда, фкя-фкянь эса кармайхть мишендема и фкя-фкянь аф кельгома.

¹¹ Ся пингть сай лама аф афкуксонь пророкта и ламотнень васькафтсазь.

¹² Коень коламась кармай касома, тянкса ламотнень эса кельми кельгомась.

¹³ А кие кирди петь самс, ся идеви.

¹⁴ И тя Пара кулясь Оцязорксшить колга ули пачфтьф марнек масторть келес сембе ломаньтналхненди азондоманкса, и аньцек эста сай пингонь песь».

Оцюдонга оцю ризфсь

¹⁵ «Мзярда тинь няйсасть иняру вастти путф гастямань нулготьксть, конань колга азфоль Даниил пророкть вельде, – лувись катк тянь лац шарьхкодьсы, –

¹⁶ эста сят, кит улихть Иудеяса, катк ворьгодихть панттненди.

¹⁷ Ся, кие тя пингть кармай улема кудбрясонза, катк куду мезеньге сявома аф валгонды,

¹⁸ кие кармай улема паксяса, катк куду эсь щамонзон инкса аф мртци.

¹⁹ Вай, конашкава стака ули ся шитнень пекихненди и идень потяфтыхненди!

²⁰ Озондода, афоль уле ворьгодеманте тялонда али ваймамань шиня.

²¹ Ся шитне пяшкодихть оцю ризфса, кодама ашель масторть тиемста сявомок и тячиень шить самс, и афи кармай улема.

²² И кда афольхть кирьфтав ся шитне, эста кивок афоль идев, но кочкафнень инкса кирьфтавихть ся шитне.

²³ Эста, кда кивок тейнть мярьги: "Вага, тяса Христоссь али вона тоса", – тяда кема,

²⁴ сяс мес сайхть аф афкуксонь христост и аф афкуксонь пророкт, конат кармайхть тиендема оцю тяштькст и дивань тефт кочкафнень васькафтоманкса, кда васькафтовольхть.

²⁵ Вага, Мон аноконди азондыне тейнть тянь.

²⁶ Сяс, кда кие тейнть мярьги: "Ватт, Сон шавмодаса", – тяда яка тоза; али: "Ватт, Сон тя кудботмоса", – тяда кема.

²⁷ Кода ёндолсь кфчяди шинь стяма ширеста и няеви шинь валгома ширеть молемс, тяфтама ули Ломанень Цёрать самац.

²⁸ Коса кулофсь, тоза пуромихть ловажада ярхцай нармоттневок».

Ломанень Цёрать самац

²⁹ «Эстокиге, ся ризфонь шитнень меле, ши валдсь шобдалгоды, ковське аф кармай валдоптома, тяшттневок прайхть менельста, менелень вийхневок шерьхкозевихть.

³⁰ Эста менельса эвондай Ломанень Цёрать тяштьксоц. Масторлангонь сембе ломаньтналхне аварьгодыхть вярьгак вайгяльхть, мзярда няйсазь Ломанень Цёрать, кона сай менелень коволхнень лангса Эсь вийсонза и оцюдонга оцю иневалдсонза.

³¹ И торамань кайги вайгяльса Сон кучсыне ангелонзон пуроптома Эсь кочкафонзон сембе масторста – фкя менель песта сявомок омбоцети молемс.

³² Кепотьксонди сявость смоква шуфтть: мзярда сонь тарадонза путькияйхть и нолдайхть лопат, эста содасасть: кизось маласа.

³³ Стане тиньге семботь тянь няемста содасть: тя пингсь маласа, кенкшть лангса.

³⁴ Видеста корхтан тейнть: тяниень пингонь эряйхне аф кенерихть юмамс, кода сембось тя ули.

³⁵ Менельсь и модась юмайхть, но Монь валне аф юмайхть.

³⁶ А мзярда сай ся шись и пингсь, кивок аф содасы, менелень ангелхневок аф содасазь, а аньцек ськамонза Алязе содасы тянь.

³⁷ Кода ульсь Ноень пингста, стане ули Ломанень Цёрать сама шистонзовок.

³⁸ Оцюдонга оцю шадоть самдонза инголе ломаттне ярхцесть, симондсть, рьвяйсесть, рьвакс тушендсть, и тяфта ульсь ся шить самс, мзярс Ной изь сува оцю венчезонза.

³⁹ Ломаттне ашезь сода, мезе ули сай пингть, мзярс ашезь са оцюдонга оцю шадось и ашезень юмафта синь сембонь. Тяфта кармай улема и Ломанень Цёрать самстовок.

⁴⁰ Эста кафттне улихть паксяса: фкясь сявови, а омбоцесь кадови.

⁴¹ Кафта аватне кармайхть меленцяса яжама: фкясь сявови, а омбоцесь кадови.

⁴² Сяс ванода, уледа анокт, вдь тинь аф содасасть, кодама шиня сай Азоронте.

⁴³ Но тейнть содаф тя: кда кудазорсь содалезе, кодама пингоня сай салайсь, эста сон афоль мада и афолезе нолда салайть кудозонза.

⁴⁴ Сяс тиньге уледа анокт, сяс мес Ломанень Цёрась сай ся пингоня, мзярда тинь аф учсасть Сонь».

Цебярь и кальдяв покоди

⁴⁵ «Уледа ёню и кулхцонды покодить лаца, конань азорсь путозе сембе покодиензон лангса оцюнякс – эсь пингстонза ярхцамбялень макссема.

⁴⁶ Павазу ся покодись, конань азороц мрдамстонза сатсы тяфта тиендикс.

⁴⁷ Видеста корхтан тейнть: азороц путсы сонь оцюнякс марнек уликс-паронц лангса.

⁴⁸ А кда ся покодись ули кальдяв, сон эсь седисонза арьси: "Аф курок сай азорозе",

⁴⁹ и ушеды пикссемост эсь покоди ялганзон, ярхцема и симондема симилатнень мархта.

⁵⁰ Но ся шиня, мзярда сон аф учсы, и ся пингоня, мзярда сон аф арьси, сай азороц

⁵¹ и пялева керсы покодить, и ёрдасы тов, коза ёрдафт шамафксонь каннихневок. Тоса кармай улема авардема и пеень мчкорфтома».