Матфей 23 - Од Соткс Новый Завет на мордовском-мокша языке 2016

Тяда уле шамафксонь канникс и тясть оцюлгофне эсь прянтень

¹ Сяда меле Иисус кармась корхтама ломаттненди и Эсь тонафниензонды:

² «Койти тонафтыхне и фарисейхне арасть Моисеень вастс койть смузенц панчсема.

³ Сяс кулхцондость синь и сембоса тиеда стане, кода мярьгихть. Но синь тевснон лаца тефт тяда тиенде, сяс мес синь корхтайхть фкя, а тиихть лия.

⁴ Синь веляфнесазь аф кандови и стака канкснень ломаттнень лафтуснон лангс, а синць сурснонга аф шерьхфтьсазь лездомс тейст.

⁵ Семботь тиендьсазь аньцек ломаттненди няфтеманкса. Кодама оцюфт и келихть Сёрматфксть мархта коробканясна и кодама кувакат панарсост цёкне!

⁶ Синь кельгсазь озсемать эзембряв иласа и васенце васттненди синагогаса,

⁷ кельгсазь мишендема-рамсема вастова шумбракснема-шнама валонь кочксемать, и мзярда ломаттне лемнесазь: "Тонафтыеньке!"

⁸ А тинь тяда мярьгонде лемнемс эсь прянтень тонафтыкс, сяс мес тонафтыенте фкя – Христоссь, а фкя-фкянди тинь сембе – браттада.

⁹ Алякска мастор лангса тясть лемне киньге, сяс мес тинь аньцек фкя Алянте, кона менельса.

¹⁰ Вятикска катк аф лемнетядязь тинь, сяс мес тинь вятиенте фкя – Христоссь.

¹¹ Ся, кие ёткстонт сембода оцю, катк ули тейнть покодикс.

¹² Сяс мес, кие оцюлгофнесы эсь прянц, ся ёмлалгофтови, а кие ёмлалгофнесы эсь прянц, ся оцюлгофтови».

Кальдяв тейнть, койти тонафтыхть и фарисейхть!

¹³ «Кальдяв тейнть, койти тонафтыхть и фарисейхть! Шамафксонь каннихть! Тинь сёлгондсасть ломаттнень эзда Менелень Оцязорксшить. Тинцьке аф сувсетяда и сятненьге, кинь мяльсна сувамс, аф нолясасть.

¹⁴ Кальдяв тейнть, койти тонафтыхть и фарисейхть! Шамафксонь каннихть! Тинь сивондьсасть-ётафнесасть удаватнень мекольценяснон и прянь няфтеманкса куватьс озонкшнетяда. Тянкса Шкайсь нинге сяда кемоста судендатядязь.

¹⁵ Кальдяв тейнть, койти тонафтыхть и фарисейхть! Шамафксонь каннихть! Эсь кемамазонт хуш фкя ломанень сувафтоманкса тинь ётнесасть оцюведть и масторть. И мзярда сувафтсасть, тиендьсасть сонь аду повикс, кафксть сяда кальдявкс эсь корязонт.

¹⁶ Кальдяв тейнть, сокор вятихть! Тинь тонафттада: "Кда кие варай Шкаень кудть лемса, тя нинге мезевок аш, а кда варай Шкаень кудть зрнянц лемса, эста тейнза валонц эряви кирдемс".

¹⁷ Вай, ёньфтомот и сокорхт! Мезсь сяда оцю, зрнясь али Шкаень кудсь, кона тя зрнять иняруяфтсы?

¹⁸ И нинге тонафттада: "Кда кие варай алтарть лемса, тя нинге мезевок аш, а кда кие варай алтарти кантф озксказнеть лемса, сянди валонц эряви кирдемс".

¹⁹ Сокорхт! Мезсь сяда оцю, алтарти кантфсь али алтарсь, кона тя кантфть иняруяфтсы?

²⁰ Тяфта, кие варай алтарть лемса, варай и алтарти кантфть лемсовок.

²¹ И ся, кие варай Шкаень кудть лемса, ся варай и Шкаень кудса Эряйтьке лемса.

²² И кие варай менельть лемса, ся варай Шкайть озама вастонцка лемса и Сянь лемса, кие озаф лангсонза.

²³ Кальдяв тейнть, койти тонафтыхть и фарисейхть! Шамафксонь каннихть! Тинь макссесасть Шкайти кемонце пяльксть ярхцама тишетнень эзда: путлекста, капёрста, камбраздишеста, а койста инь эрявиксть юкснесасть – видешить, кельгозь ужяльдемать, Шкаень мялень ваномать. Тявок эряви тиемс, и сяньге колга аф юкснемс.

²⁴ Сокор вятихть! Тинь сяськть педясасть, а ишимть нильсасть!

²⁵ Кальдяв тейнть, койти тонафтыхть и фарисейхть! Шамафксонь каннихть! Тинь аруяфнесасть кядьготнень и шаватнень лангснон, а потмосна пяшксет сяда, мезе тинь сатоде салазь и васькафнезь.

²⁶ Сокор фарисей! Васенда аруяфтк кядьготь и шавать потмонц, эста лангоцка аруяй.

²⁷ Кальдяв тейнть, койти тонафтыхть и фарисейхть! Шамафксонь каннихть! Тинь кода акшептф лазксне, конат уша ширде няевихть мазыста, а потмосна пяшксет кулофонь пакарьда и наксаткста.

²⁸ Стане тиньге: лангозонт ванозь, няефтяда ломаттненди видексшинь ваймокс, а потмоширде – шамафкссотада и пяшксетяда коень колай тевда.

²⁹ Кальдяв тейнть, койти тонафтыхть и фарисейхть! Шамафксонь каннихть! Тинь тиенттяда мялямгефт пророкнень калмоснон лангса и мазопнесасть видексшинь ломаттнень калмолангснон.

³⁰ Тинь корхтатада: "Кда минь эрялеме атянь-атяньконь пингста, эста афолеськ шудефте синь мархтост пророкнень верснон".

³¹ Тяфта тинь тинць корхтатада эсь лангозонт, няфтьсасть: тинь сятнень цёраснотада, конат шавондозь пророкнень.

³² Стане шумордасть сянь, мезть ушедозь тинь алянте!

³³ Куйхть, пупай куень лефкст! Кодавок аф ворьгодефтяда судендамать и аду повомать эзда.

³⁴ Кулхцондода! Мон кучан тейнть пророкт, смузю ломатть и койти тонафтыхть. Кой-конатнень синь ёткстост тинь шавсасть и эськодьсасть крёз лангс, а лиятнень карматада пикссемост эсь синагогавант и панцемост ошста ошс.

³⁵ Тинь лангозонт прай муворшись сембе пророкнень верснон инкса, кона валовсь масторлангса, ушедомок видексшинь Авелень веронц эзда и Захариянь, Варахиять цёранц веронц самс, конань тинь шавость Шкаень кудть и инголенза ащи алтарть ёткса.

³⁶ Видеста корхтан тейнть: тя пингонь ломаттненди сави пандомс сембе ня кальдяв тефнень инкса».

Иисусонь ризнай седиец Иерусалимть инкса

³⁷ «Иерусалим, Иерусалим! Пророкнень шавондысна и тейть кучфнень кевса пикссисна! Мзярксть Мон ёрань кочкамс тонь эряйхнень, кода нармонць кочксесыне эсь пацянзон алу лефксонзон, но тинь ашель мяленте.

³⁸ И вов, тинь кудонте кадови шава.

³⁹ Корхтан тейнть: тячиста сявомок тинь Монь аф няйсамасть снярс, мзярс аф мярьктяда: "Бславаф Азорть лемса Сайсь!"»