Матфей 22 - Од Соткс Новый Завет на мордовском-мокша языке 2016

Валвеляфкс рьвяямань илать колга

¹ Иисус сяда товга корхтась валвеляфксса. Сон мярьгсь:

² «Мезень лангс шары Менелень Оцязорксшись? Сон кода оцязорсь, кона аноклась эсь цёранцты рьвяямань ила.

³ Сон кучезень эсь покодиензон илас тертьфнень мельге, но сятнень ашель мяльсна самс.

⁴ Эста оцязорсь тага весть кучсь лия покодихть и мярьгсь: "Арда и азость тертьфненди: сембось анок илати; букатне и андонь васне печкфт, каванямбяльсь анок. Сада рьвяямань илас".

⁵ Но инжихне ашесть шарфта мяль тердемать лангс и сраткшнесть эсь тевснон тиема: кие – эсь паксязонза, кие – мишендема вастозонза.

⁶ А лиятне кундазь кучф покодиензон, пикссезь синь и шавозь.

⁷ Тянь кулемста оцязорсь пяк кяжиясь. Сон кучезе эсь ушмовиенц, машфтозень ся шавихнень и плхтазе синь ошснон.

⁸ Сяда меле сон мярьгсь эсь покодиензонды: "Каванямась анок, но сятнень, кинь мон тердине, тяса аф вастсна.

⁹ Арда тяни ки рашкненди и тернесть сембонь, кинь васьфттяда".

¹⁰ Покодихне тусть и вятезь сембонь, кинь васьфтезь: цебярьхненьге, кальдяфненьге. И пяшкодсь рьвяяма илань кудсь инжида.

¹¹ Мзярда оцязорсь лиссь инжиензон ванома, ёткстост сон няйсь аф илань щамса щаф ломань,

¹² и корхтай тейнза: "Ялгай, мес тон сать тяза аф илань щамса?" Но ся каршезонза мезевок ашезь аза.

¹³ Эста оцязорсь мярьгсь эсь покодиензонды: "Сотнесть сонь кяднек-пильгонек и ёрдасть тяста шобдати, коса кармай улема авардема и пеень мчкорфтома".

¹⁴ Сяс мес лама тертьфта, но кржа кочкафта».

Кизефкс каяфксонь пандомать колга

¹⁵ Эста фарисейхне тусть и арьсесть эсь ётковаст, кода кундамс Иисусонь валса.

¹⁶ Синь кучсесазь Тейнза эсь тонафниснон и Иродонь ломанензон. Сят мярьгсть Иисусонди: «Тонафты, минь содасаськ: Тон видешинь кельгият и видеста тонафтат Шкайть коряс эряма, аф арьсят мяльс тумать колга и киньге лангс аф ванат.

¹⁷ Эста азк тейнек, кода Тон арьсят, койть коряс мярьгондеви пандомс каяфкс кесарти али аф?»

¹⁸ Иисус шарьхкодезень синь кальдяв мяльснон и мярьгсь: «Шамафксонь каннихть! Мезенди варчсесамасть Монь кизефксонтень вельде?

¹⁹ Няфтесть Тейне ярмакть, конань мархта паннетяда каяфкс». Синь кандсть Тейнза фкя динарий.

²⁰ Иисус кизефнесыне синь: «Кинне тяса шамаликсь и лемсь сёрматфт?»

²¹ Синь каршезонза корхтайхть: «Кесарть». Эста Иисус корхтай тейст: «Сяс макссесть кесареннеть – кесарти, а Шкаеннеть – Шкайти».

²² Тянь кулемста синь прасть дивас, кадозь Иисусонь и тусть.

Кизефкс кулофнень эзда вельмамать колга

²³ Сяка шиня Иисусонди састь саддукейхть, конат ашесть кема кулофста вельмамати, и кизефтезь Сонь:

²⁴ «Тонафты! Моисей мярьгсь: "Кда кулы аля, конань аш шабанза, катк брадоц сявсы полакс сонь рьванц и кады кулофти юромонь полады".

²⁵ Минь эздонк ульсь сисем братт. Васенцесь рьвяясь и кулось шабафтома, рьвац лядсь брадонцты.

²⁶ Тяфта лиссь и омбоце, колмоце, ляды сисем браттнень мархтовок.

²⁷ Мекпяли кулось рьвяське.

²⁸ Мзярда кулофне вельмайхть, кинди сисем браттнень эзда сон кармай улема рьвакс, вдь сембе синь ульсть тейнза мирдекс?»

²⁹ Иисус корхтай каршезост: «Тинь васькафтфтада-эрьготьфтада, сяс мес аф содасасть аф Сёрматфксть, аф Шкайть виенц.

³⁰ Мзярда Шкайсь вельмафтсыне кулофнень, эста синь аф рьвяйсихть, рьвакска аф тушендыхть, а кармайхть улема кода Шкаень ангелхне менельса.

³¹ А кода ащи тевсь кулофнень вельмамаснон мархта, дяряй тинь ашесть лувонда сянь, мезе тейнть мярьгсь Шкайсь? Сон мярьгсь:

³² "Мон Авраамонь Шкаецан, Исааконь Шкаецан и Иаковонь Шкаецан". Шкайсь – аф кулофнень Шкайсна, а эряйхнень».

³³ Тянь кулемста ломаттне дивандакшнесть Иисусть тонафтоманцты.

Сембода оцю кошардомвалсь

³⁴ Мзярда фарисейхне кулезь, кода Иисус пандозень саддукейхнень кургснон, пуромсть марс.

³⁵ Эздост койти фкя тонафтысь арьсесь кундамс Иисусонь валса и кизефтезе:

³⁶ «Тонафты! Кона кошардомвалсь койса сембода оцю?»

³⁷ Иисус корхтай тейнза: «"Кельк Азорть, Шкайцень, сембе седисот, сембе ваймосот и сембе шарьхкодемасот".

³⁸ Тя васенце и сембода оцю кошардомвалсь.

³⁹ Омбоцесь васенцеть лаца: "Кельк маластоцень, кода эсь пряцень".

⁴⁰ Сембе койсь и пророкнень тонафтомасна ащихть ня кафта кошардомвалхнень лангса».

Христоссь – кинне цёрась?

⁴¹ Мзярда фарисейхне пуромсть Иисусонь перьф, Сон кизефтезень:

⁴² «Мезе тинь арьсетяда Христость колга? Кинне Сон цёрась?» Тейнза корхтайхть: «Давидонь».

⁴³ Иисус корхтай тейст: «Мес ина Давид, Шкаень Ваймопожфть вятеманц коряс, лемнесы Сонь Азоркс? Вдь Давид корхтась:

⁴⁴ "Азорсь мярьгсь монь Азорозти: озак Монь види ширезон, мзярс аф путсайне Тонь пильгалот Тейть каршек ащихнень".

⁴⁵ Лисенди, кда Давид лемнесы Христость Азоркс, эста кода Христос ули тейнза цёракс?»

⁴⁶ Иисусонь каршес кивок валга ашезь азов, и ся шиста сявомок синь пеленкшнесть Сонь кядьстонза мезевок кизефнемс.