Матфей 2 - Од Соткс Новый Завет на мордовском-мокша языке 2016

Смузюфне састь шинь стяма ширде сюконямс Иисусти

¹ Иисус шачсь Иудеянь Вифлеем ошса ся пингть, мзярда оцязоркс ульсь Ирод. Сонь шачемдонза меле Иерусалиму шинь стяма ширде састь смузюфт и кизефнихть:

² «Коса аф кунара шачф евреень Оцязорсь? Минь няеськ менельса Сонь лиси тяштенц и саме Тейнза сюконяма».

³ Ирод оцязорсь кулезе тянь, эводсь, и сонь мархтонза эводсь сембе Иерусалимсь.

⁴ Ирод кочказень сембе озксвятиень оцюнятнень, койти тонафтыхнень и кизефтезень синь, коса шачемаль Христости.

⁵ Синь мярьгсть тейнза: «Иудеяса, Вифлеем ошса, сяс мес тяфта сёрматф пророкть вельде:

⁶ "Тон, Иудань масторонь Вифлеем, ёфси аф мекольцесят Иудань лия ошнень коряс; сяс мес тонь эздот лиси Вяти, кона ули Ваныкс Монь ломаньтналозти, Израильти"».

⁷ Эста Ирод салава тердезень смузюфнень и содазе кядьстост, кодама пингста эвондась тяштсь.

⁸ Тяда меле кучезень синь Вифлеем ошу, мярьгсь: «Арда, лацкас содасть Иднять колга и, мзярда мусасть, азость тейне, сяс мес монга ёран молемс сюконяма Тейнза».

⁹ Смузюфне кулхцондозь оцязорть и тусть. Ся тяштсь, конань лисеманц синь няезь шинь стяма ширеса, шашнесь менельге инголест. Мзярда тяштсь пачкодсь Иднять ащема вастонц вельхксс, лоткась.

¹⁰ Тяштть няемстонза синь кенярдсть оцюдонга оцю кенярдемаса.

¹¹ Куду сувамста няезь Иднять Мария тядянц мархта, прасть плманжа лангс и сюконясть Идняти. Сяльде таргазь козяшиснон и казсть Тейнза казнет: зрнят, ладан, смирна.

¹² Онцтост смузюфне Шкайть эзда кулезь: тейст аф эряви мрдамс меки Иродонди, сяс синь тусть эсь масторозост лия киге.

Египету ворьгодемась

¹³ Смузюфнень тумдост меле Азорть ангелоц эвондась Иосифонь онц и корхтай: «Стяк, сявк Иднять и Сонь тядянц, ворьготть Египету и ащек тоса, мзярс аф пачфтян куля, сяс мес Ирод ёрай вешемс Идть и шавомс Сонь».

¹⁴ Иосиф стясь, сявозе Иднять тядянц мархта, и веть тусь Египету.

¹⁵ Тоса сон эрясь Иродонь куломозонза. Тяфта пяшкодевсть Азорть валонза, конатнень Сон азозень пророкть вельде: «Египетста Мон тердине Эсь Цёразень».

Вифлеемса шабатнень шавондомасна

¹⁶ Мзярда Ирод шарьхкодсь: смузюфне васькафтозь, сон аф азовомшка кяжиясь и мярьгсь шавомс Вифлеем ошса и перьфканза аймакова сембе цёрашабатнень, кафта кизонястотнень и сяда ёмлатнень; шачфнень ся пингста, конань сон содазе смузюфнень кядьста.

¹⁷ Тяфта тиевсь ся, мезе азфоль Иеремия пророкть вельде:

¹⁸ «Авардема маряви Рамса, ольксема и явсема; Рахиль аварди шабанзон инкса и коданга аф лоткафтови, сяс мес синь ашет шиса».

Назарету мрдамась

¹⁹ Иродонь куломдонза меле Иосифонди Египетса онозонза эвондась Азорть ангелоц

²⁰ и мярьгсь: «Стяк, сявк Иднять тядянц мархта и мрдак Израиль мастору, сяс мес кулость сят, кит ёразь шавомс Иднять».

²¹ Иосиф стясь, сявозе Идть тядянц мархта и тусь Израиль мастору.

²² Но мзярда сон марязе: Иудеяса Иродонь вастс оцязорондай сонь цёрац – Архелай, сон пелезевсь тоза молемс. Иосиф онцтонза кулезе Шкайть кошардоманц и тусь Галилеяв.

²³ Сон сась тоза и лоткась эряма ошс, конань лемоцоль Назарет. Тяфта тиевсь ся, мезе азфоль пророкнень вельде: Назаретонь эряйкс Сонь кармайхть лемнемонза.