Матфей 18 - Од Соткс Новый Завет на мордовском-мокша языке 2016

Кие сембода оцю Шкаень Оцязорксшиса

¹ Тя пингть тонафнихне састь Иисусти и кизефнесазь: «Кие сембода оцю Менелень Оцязорксшиса?»

² Сон тердезе малазонза иднять, арафтозе инголест и мярьгсь:

³ «Видеста корхтан тейнть, кда аф шарфттада Шкайти и аф аратада иттнень лаца, аф сувафтада Менелень Оцязорксшити.

⁴ Ся, кие аф оцюлгофнесы прянц, а арай кода тя идсь, ся и ули сембода оцюкс Менелень Оцязорксшиса.

⁵ И ся, кие сявсы фкя тяфтама идть Монь лемсон, ся Монь сявсамань.

⁶ Но кие вятьсы пежес конанцка фкять ня ёмлатнень эзда, кит кемайхть Тейне, сянди сяда цебярь улель, кда сялдазонза повфтальхть яжама кев и ёрдалезь оцюведть потмаксс.

⁷ Кальдяв ули масторлангти, сяс мес тяса лама пежес вяти мялень саламада! Тянди улема, аньцек кальдяв ули ся ломанти, кинь вельде синь сашендыхть.

⁸ Кда тонь кядце али пильгце вяттянза пежес, керк сонь и ёрдак, сяс мес сувамс пефтома пингонь эряфти кядьфтома али пильгфтома сяда цебярь ули тейть сянь коряс, кда кафта кядьса и кафта пильгса улят ёрдаф адонь толти.

⁹ И кда сельмоце вяттянза пежес, таргак сонь и ёрдак. Сувамс пефтома пингонь эряфти фкя сельмоса сяда цебярь ули тейть сянь коряс, кда кафцьке сельмотнень мархта улят ёрдаф адонь толти».

Валвеляфкс юмаф учать колга

¹⁰ «Ванода, киньге ня ёмлатнень эзда тясть лува аф питникс. Корхтан тейнть, синь ангелсна менельса фалу няйсазь Монь Менелень Алязень шаманц.

¹¹ Сяс мес Ломанень Цёрась сась юмафнень вешема и идема.

¹² Кода тинь арьсетяда? Кда кинь ули сяда учац и эздост фкясь юмай, дяряй ся аф кадсыне лядыкс вейхксогемонь вейхксыеть панттнень ёткс и аф туй вешендемонза?

¹³ А кда мусы – видеста корхтан тейнть – сон сяда пяк кенярди тейнза вейхксогемонь вейхксые аф юмафнень коряс.

¹⁴ Тяконь лаца тинь Менелень Алянтень мялец тяфтама: афоль юма-ара кивок ня ёмлатнень эзда».

Пежес сувай кемай ялгань колга

¹⁵ «Кда кемай ялгаце тии тонь каршезт пеже, архт тейнза и корхтада тянь колга кафоненть; и кда сон кулхцонттанза, эста тон мрдафтыть кемай ялгацень.

¹⁶ А кда сон аф кулхцонттанза, эста сяфть мархтот тага фкя али кафта ломань, сяс мес эрь азф валсь эряви кемокстамс кафта али колма тевонь содайхнень-няихнень валсост.

¹⁷ А кда сон синьге аф кулхцондсыне, азонтк тянь кемаень пуромксти. Аф кулхцондондярясы кемаень пуромкстьке, эста катк сон тейть ули кода ломань, кона аф кемай афкуксонь Шкайти али кода каяфксонь кочкай.

¹⁸ Видеста корхтан тейнть: мезе тинь соттада масторлангса, ся ули сотф менельса, и мезе нолдатада масторлангса, ся ули нолдаф менельса.

¹⁹ И тага мярьган тейнть: кда масторлангса кафттне эздонт фкя мяльса ушедыхть эняльдема мезенксовок, эста мезенкса синь афольхть эняльде, Монь Менелень Алязе сянь макссы тейст.

²⁰ Вдь коса кафттне али колмотне пуромфт марс Монь лемсон, тоса ётксост Мон улян».

Пежень нолдамать колга

²¹ Эста Пётр нажядсь Иисусти и кизефтезе: «Азор, мзярксть тейне эряви нолямс кемай ялгазень пежензон, конат монь каршезон тифт? Мянь сисемксть?»

²² Иисус корхтай тейнза: «Аф сисемксть, а сизьгемонь сисемксть.

²³ Сяс Менелень Оцязорксшись шарксты оцязорть лангс, конань мялецоль содамс, мзяра шумуфт тейнза сонь покодиенза.

²⁴ Мзярда сон ушедозе тя тевть, вятсть тейнза ломань, кона савсь тейнза кемонь тёжятть талант.

²⁵ Покодити ашель мезьса пандомс, сяс оцязорсь мярьгсь мимс сонь, рьванцка, шабанзонга и сембонц, мезец ульсь, и пандомс шумонц.

²⁶ Эста покодись прась оцязорть пильгс и эняльдсь: "Учт аф ламос, и семботь тейть мрдафтса".

²⁷ Оцязорсь ужяльдезе тя покодить, нолдазе сонь и марнек шумонцка.

²⁸ Ся покодись лиссь тоста и вешезе эсь покоди ялганц, кона савсь тейнза аньцек сяда динарий. Фатязе сонь клдомада, кармась повамонза и корхтась: "Мрдафтк тейне сянь, мезе сявоть".

²⁹ Эста шумусь прась ялганц пильгс и кармась эняльдема: "Учт аф ламос, мон мрдафтса".

³⁰ Аньцек сянь ашель мялец учемс, а тусь и озафтозе покоди ялганц пякстамгудс, мзярс ся аф мрдафтсы тейнза шумонц.

³¹ Ляды покоди ялганза няезь тянь и пяк колавсь мяльсна. Синь тусть и азондозь оцязорснонды семботь, мезе лиссь.

³² Эста оцязорсь тердезе покодить и корхтай тейнза: "Аеркс покоди! Мон сембе тонь шумоцень нолдайне, сяс мес эняльдеть инголен.

³³ И тейтьке эряволь тиемс покоди ялгацень мархта стане, кода мон тиень мархтот".

³⁴ Пяк кяжияф оцязорсь мярьгсь пикссемс покодить, мзярс ся аф мрдафтсы сембе шумонц.

³⁵ Тяфта Менелень Алязевок тии мархтонт, кда эрсь эздонт седиге аф нолдасы кемай ялганцты сонь пежензон».