Матфей 17 - Од Соткс Новый Завет на мордовском-мокша языке 2016

Иисусонь лиякстомац

¹ Кота шида меле Иисус сявозень мархтонза Пёторонь, Иаковонь и сонь брадонц Иоаннонь и куцсь мархтост сери панда пряс, коса ульсть ськамост.

² Тоса синь сельминголест Иисус лиякстомсь: шамац валдомсь кода шись, а щамонза акшемсть, арасть шивалдтонга валдокс.

³ И вов, инголест эвондасть Моисей и Илия, и кармасть корхнема Иисусть мархта.

⁴ Эста Пётр мярьгсь Иисусти: «Азор! Кода пара тейнек тяса. Мяльце, минь тихтяма тяза колма кошт: фкять Тейть, фкять Моисеенди и фкять Илиянди».

⁵ Мзярда сон нинге корхтась, валдтонга валда ковол тавадозень синь. Коволста кулевсь вайгяль: «Тя Монь кельгома Цёразе, Монь кенярдема вастозе. Кулхцондость Сонь!»

⁶ Тонафнихне кулезь вайгяльть и сяшкава эводсть, нльне прашендсть модати шамаснон лангс.

⁷ Но Иисус нажядсь тейст, токазень синь и мярьгсь: «Стяда, тяда пеле!»

⁸ Мзярда синь кеподезь сельмоснон, Иисуста башка киньге ашесть няе.

⁹ Пандть пряста валгомста Иисус кардазень тонафниензон: «Киндивок тяда азонда, мезе няеде, мзярс Ломанень Цёрась аф вельмай кулофста».

¹⁰ Тонафниенза кизефтезь: «Мес ина койти тонафтыхне корхтайхть, васенда сама Илиянди?»

¹¹ Иисус корхтай каршезост: «Виде, васенда сама Илиянди и сон семботь путсы эсь вастованза.

¹² Но азса тейнть, Илиясь сась ни, а ломаттне сонь ашезь сода, и тисть мархтонза, кода мяльсноль. Стане Ломанень Цёративок сави кирдемс синь кядьстост лама маятама».

¹³ Эста тонафнихне шарьхкодсть, Иисус азонды тейст Иоанн Кстиндайть колга.

Иисус панцы кяжи ваймопожфть цёранять потмоста

¹⁴ Мзярда синь мрдасть ломаттненди, Иисусти нажядсь фкя аля и прась инголенза плманжа лангс:

¹⁵ «Азор! Ужяльтьк цёразень! Од ковбрянь пингста сон пяляскоткшни. Пяк сяряди: сидеста прашенды коста толти, коста ведти.

¹⁶ Мон вятнине сонь Тонь тонафнихненди, но тейст сон ашезь пчкафтов».

¹⁷ Иисус мярьгсь: «Вай, тяниень пингонь аф кемай и кольф ломатть! Мзярс Мон карман улема тинь мархтонт? И мзярс карман кирдемонт тинь? Вятесть цёранять тяза Тейне».

¹⁸ Иисус мярьгсь кяжи ваймопожфти лисемс, и ся кадозе цёранять. И цёранясь эстокиге пчкясь.

¹⁹ Мзярда тонафнихне лядсть Иисусонь мархта ськамост, синь нажядсть Тейнза и кизефтезь: «Мес тейнек ашезь панев кяжи ваймопожфсь?»

²⁰ Иисус каршезост мярьгсь: «Сяс мес тинь ёмла кемаманте. Видеста корхтан тейнть, кда улель тинь кемаманте хуш горчицань видьмоняшка, и тинь мярьголеде тя пандти: "Ётак тяста тоза", – сон ёталь. Эста мезевок аф тиевикс аф ули тейнть.

²¹ Но тяфтама кяжи ваймопожфсь паневи аньцек озондозь и постонь кирдезь».

Иисус тага азонды Эсь куломанц колга

²² Галилеяса улемстост, Иисус мярьгсь тонафниензонды: «Ломанень Цёрась максови ломаттнень кядьс,

²³ и синь шавсазь Сонь, но колмоце шиня Сон вельмай кулофста». Тонафнихне прасть оцю ризфс.

Шкаень кудть лемс каяфксонь пандомась

²⁴ Мзярда Иисус и тонафниенза састь Капернауму, Пёторонди нажядсть Шкаень кудть лемс каяфксонь кочкайхне и кизефтезь: «Тинь Тонафтыенте панды каяфкс?»

²⁵ Пётр мярьгсь: «Панды». Мзярда сон сувась куду, Иисус корхтазевсь васенцекс: «Кода тон арьсят, Симон, кинь кядьста масторонь оцязорхне сявондихть каяфкс – эсь ломаньцнон али омба мастороннетнень кядьста?»

²⁶ Пётр каршезонза корхтай: «Омба мастороннетнень кядьста». «Эста эсь ломаньцна аф пандыхть», – мярьгсь Иисус.

²⁷ «Но аф карматама синь кяжияфнемост. Архт эрьхкти, ёрдак ульмоцень, и васенце калть, конань кундасак, панчк кургонц. Кургстонза муят сиянь ярмак, сявк сонь и макск тейст Монь и эсь инксот».