Матфей 16 - Од Соткс Новый Завет на мордовском-мокша языке 2016

Тяштьксонь вешемась

¹ Иисусонь малас састь фарисейхть и саддукейхть, и варчсезь Сонь виенц – вешсть кядьстонза тяштькс менельста.

² Но Сон мярьгсь тейст: «Илять тинь корхтатада: "Ушесь ули цебярь, сяс мес менельсь палы";

³ а шобдава: "Тячи ули давол, сяс мес менельсь сюнерьгодсь". Шамафксонь каннихть! Менельть лангс ваномста тинь аноконди содасасть, кодама ули ушесь, а пинкнень тяштьксна тейнть аф шарьхкодевихть.

⁴ Тяниень пингонь кяжи и Шкайти полафни ломаттне вешендихть тяштькс, но Иона пророкть тяштькстонза башка лия тяштькс аф ули тейст». Иисус кадозень синь и тусь.

Фарисейхнень и саддукейхнень шапафтомасна

⁵ Тонафнихне пачкодсть эрьхкть омба трвас. Лиссь стане: мархтост юкстасть сявомс кши.

⁶ Иисус мярьгсь тейст: «Ванода, ванфтода пря фарисейхнень и саддукейхнень шапафтомадост».

⁷ А тонафниенза эсь ётковаст корхтасть: «Сон тяфта мярьгсь сяс, мес юкстаме сявомс кши».

⁸ Иисус шарьхкодезе, мезень колга синь арьсихть, и мярьгсь тейст: «Вай, конашкава ёмла тинь кемаманте! Мес тинь корхтатада, аш кшинте?

⁹ Кали нинге тейнть ашезь шарьхкодев? Кали аф мяляфтсасть ся вете кшитнень, конат сатсть вете тёжяненди, и мзяра кептерь лятф сускомда тинь кочкаде?

¹⁰ И сисем кшитнень, конат сатсть ниле тёжяненди, и мзяра кептерь ляткста эста тинь кочкаде?

¹¹ Кода тинь аф шарьхкодьсасть, Мон аф кшить колга корхтань, мзярда мярьгонь: "Ванфтость прянтень фарисейхнень и саддукейхнень шапафтомадост"?»

¹² Эста тонафниенза шарьхкодезь, Сон мярьгсь тейст ванфтомс пряснон аф кшинь шапафтомада, а фарисейхнень и саддукейхнень тонафтомадост.

Пётр лувсы Иисусонь Христоскс

¹³ Мзярда Иисус сась Филиппонь Кесария масторс, кизефтезень Эсь тонафниензон: «Монь, Ломанень Цёрать, кикс лувсамазь?»

¹⁴ Тонафниенза мярьгсть: «Кие луфтанза Иоанн Кстиндайкс, кие – Илиякс, а кие – Иеремиякс али лия кодамовок прорококс».

¹⁵ Иисус корхтай тейст: «А тинь Монь кикс лувсамасть?»

¹⁶ Симон Пётр мярьгсь: «Тон Христоссят, эряй Шкайть Цёрацат».

¹⁷ Эста Иисус мярьгсь каршезонза: «Павазуват тон, Симон, Ионань цёрац, сяс мес аф ломань тянь панжезе тейть, а Монь Менелень Алязе.

¹⁸ Мон корхтан тейть: тон Пёторат, и тя кевть лангс Мон путса Эсь кемаень пуромксозень, и куломань вийхне аф сяськсазь сонь.

¹⁹ Мон макссайне тейть Менелень Оцязорксшить панжеманзон; и мезе сотат масторлангса, ся ули сотф менельса, и мезе нолдат масторлангса, ся ули нолдаф менельса».

²⁰ Сяда меле Иисус кардазень Эсь тонафниензон, киндинге афолезь азонкшне: Сон – Иисус Христоссь.

Иисус азонды Эсь куломанц колга

²¹ Ся пингста сявомок Иисус апак сёпт кармась азондома тонафниензонды: Тейнза сави молемс Иерусалиму и кирдемс лама маятамада ломаньтналонь оцюнятнень, озксвятиень оцюнятнень и койти тонафтыхнень эзда, и Сон ули шавф, а колмоце шиня вельмай кулофста.

²² Эста Пётр сявозе Иисусонь шири и кардазе тяфта корхтамда: «Катк ванфттанза Шкайсь! Катк Тонь мархтот, Азор, тяфта аф ули!»

²³ Иисус шарфтсь и мярьгсь Пёторонди: «Аертт ваксстон, Сатана! Тон шорсят Тейне ки лангсон, тонь мяльхне-арьсематне ломанень, а аф Шкайть эзда».

Иисус корхтай мельганза молемать колга

²⁴ Эста Иисус мярьгсь тонафниензонды: «Кинь мялец молемс Монь мельган, ся катк макссы эсь прянц Тейне, сявсы крёзонц и моли Монь мельган.

²⁵ Сяс мес кие ёрай ванфтомс эряфонц, ся юмафтсы сонь, а кие юмафтсы эряфонц Монь инксон, ся мусы.

²⁶ Кодама лезкс ули ломанти, кда сон сявондярясы эстейнза сембе масторлангть, а эсь ваймонц юмафтсы? Али мезе максы ломанць эсь ваймонц мрдафтоманкса?

²⁷ Вдь Ломанень Цёрась сай Алянц иневалдсонза и Эсь ангелонзон мархта, и эста эрь ломанть казьсы тиф тевонзон коряс.

²⁸ Видеста корхтан тейнть: тяса ащихнень ёткса улихть стапт, конат нинге аф кенерихть куломс, кода няйсазь Ломанень Цёрать, кона сай Эсь Оцязорксшисонза».