Матфей 15 - Од Соткс Новый Завет на мордовском-мокша языке 2016

Шкайть кошардомвалоц и ломаттнень обуцясна

¹ Сяда меле састь Иисусти Иерусалимста фарисейхть и койти тонафтыхть, корхтайхть:

² «Мес Тонь тонафнихне колсесазь атянь-атяньконь обуцяснон? Синь ярхцамда инголе аф штакшнесазь кядьснон».

³ Сон пшкядсь каршезост: «А мес тинь колсесасть Шкайть кошардомвалонц эсь обуцянтень инкса?

⁴ Вдь Шкайсь кошардсь: "Ванк аляцень и тядяцень мяльснон" и "Кие сялдсы алянц али тядянц, ся улеза максф куломас".

⁵ А тинь тонафттада: "Кда кие мярьги алянцты али тядянцты: 'Сянь, мезе эряволь максомс тейть, максса Шкайти',

⁶ эста сянди аф эряви ни ванондомс алянц мяленц". Тяфта тинь колсесасть Шкайть кошардомвалонц эсь обуцянтень инкса.

⁷ Шамафксонь каннихть! Лац тинь колгант пророчендась Исаия пророксь, мзярда мярьгсь:

⁸ "Ня ломаттне аньцек валса ванцазь Монь мялезень, синь седисна ичкозет эздон;

⁹ но синь шавоста сюконякшнихть Тейне, сяс мес синь тонафтомасна – тя ломанень кошардомат"».

Мезсь ломанть тиендьсы аф арукс

¹⁰ Иисус тердезень ломаттнень и мярьгсь: «Кулхцондода и шарьхкодесть:

¹¹ ломанть аф арукс тиендьсы аф ся, мезсь сувай кургозонза, а ся, мезсь лиси тоста».

¹² Эста тонафниенза маладсть Тейнза и мярьгсть: «Содасак, Тонь валхне кяжияфтозь фарисейхнень?»

¹³ Сон мярьгсь каршезост: «Эрь касыкссь, конань озафтозе аф Монь Менелень Алязе, ули таргаф юрнек.

¹⁴ Тяда пичеде фарисейхнень инкса, синь – сокоронь вяти сокорхт; а кда сокорсь вяти сокор, эста кафцьке прайхть лоткс».

¹⁵ Пётр каршезонза мярьгсь: «Панчк тейнек тя валвеляфксть смузенц».

¹⁶ Иисус мярьгсь: «Кали тейнтьке нинге аф шарьхкодеви?

¹⁷ Дяряй тинь нинге ашесть шарьхкоде: сембось, мезсь сувай ломанть кургова, пови пекс и тоста лихтеви?

¹⁸ А мезсь лиси кургста, ся лиси седиста; и тя тиендьсы ломанть аф арукс.

¹⁹ Сяс мес ломанень седиста лисихть кальдяв мяльхне-арьсематне, шавоматне, полань полафтоматне, усксевоматне, саламатне, лиянь лангс васькафнематне и сялдоматне.

²⁰ Сембось тя тиендьсы ломанть аф арукс, а апак штак кятть ярхцамась – ломанть аф арукс аф тиендьсы».

Хананеяста авать кемамац

²¹ Иисус лиссь тоста и тусь Тиронь и Сидононь аймакненди.

²² Вов, Тейнза маладсь Хананеянь ава, кона ульсь ся ширдень, и пешкодсь: «Азор, Давидть Цёрац, ужяльдемак монь! Стирнязень эса кяжи ваймопожф; и тейнза пяк кальдяв».

²³ Но Иисус каршезонза валга ашезь аза. Сонь тонафниенза маладсть и мярьгсть Тейнза: «Тик авати, мезе веши, сяс мес сон моли мельганк и юватькшни».

²⁴ Иисус каршезост мярьгсь: «Мон кучфан аньцек Израилень ломаньтналти, кона юмаф-араф учань лаца».

²⁵ Авась маладсь, сюконясь Сонь инголенза и мярьгсь: «Азор! Лезтт тейне».

²⁶ Иисус корхтай каршезонза: «Аф пара сявомс кшить шабатнень кядьста и ёрдамс пинетненди».

²⁷ Авась мярьгсь: «Виде, Азор! Но пинетневок ярхцайхть паморькста, конат пяярихть синь азорснон шрастост».

²⁸ Эста Иисус пшкядсь каршезонза: «Вай, ава! Тонь пяк оцю кемамаце; улеза тейть тонь мяльцень коряс». И эстокиге сонь стирец пчкясь.

Иисус анды ниле тёжятть ломань

²⁹ Иисус кадозе ся вастть и сась Галилеянь эрьхке трвати, куцсь пандть лангс и озась тоса.

³⁰ Перьфканза пуромсь лама ломань, вятсть мархтост шаморхт, сокорхт, аф корхтайхть, синнеф-тапаф кядь и пильге мархтот, и эрь кодама урмаса лама лия сярядихть, путнезь синь Иисусть пильгс; и Сон пчкафнезень синь.

³¹ Ломаттне дивандасть, мзярда няезь, кода аф корхтайхне корхтайхть, синнеф-тапаф кядь и пильге мархтотне пчксихть, шаморхне якайхть и сокорхне няихть; и синь шнакшнезь Израилень Шкайть.

³² Иисус тердезень тонафниензон и мярьгсь тейст: «Ужяльхть Тейне ломаттне. Синь колма шит ни мархтон и аш мезьда тейст ярхцамс. Вачеда Мон синь аф нолдасайне, каба афольхть машта вийда ки лангса».

³³ Тонафниенза корхтайхть Тейнза: «Коста шавмодаса тейнек сявомс тняра кши, тяшкава лама ломанень андомс?»

³⁴ Иисус синь кизефнесыне: «Мзяра тинь кшидонт?» Тонафниенза мярьгсть: «Сисем кшит, и аф лама калня».

³⁵ Эста Иисус мярьгсь ломаттненди озсемс модать лангс.

³⁶ Сявозень сисем кшитнень и калхнень, азсь Шкайти сюконяма, синнезень синь и максозень Эсь тонафниензонды, а тонафниенза – ломаттненди.

³⁷ Сембе ярхцасть и топодсть, и лятф сускомда кочкасть сисем пяшксе кептерьхть.

³⁸ А ярхцайда ульсь ниле тёжятть, тя авада и шабада башка.

³⁹ Иисус нолдазень ломаттнень, озась венчс и сась Магдала мастору.