Матфей 14 - Од Соткс Новый Завет на мордовском-мокша языке 2016

Иоанн Кстиндайть куломац

¹ Ся пингть Ирод, Галилеянь оцюнясь, марясь Иисусть колга

² и мярьгсь эсь ломанензонды: «Тя Иоанн Кстиндайсь. Сон вельмась кулофнень эзда, тяста виецка ули тиендемс тяфтама дивань тефт».

³ Ирод тяфта корхтась, сяс мес сон фатязе Иоаннонь, сотнезе цинзерса и озафтозе пякстамгуду. Тянь сон тиезе Филипп брадонц ингольдень рьванц, Иродиадань инкса,

⁴ сяс мес Иоанн корхнесь Иродонди: «Койс коре тейть аш кода сявомс сонь рьвакс».

⁵ Ирод ёразе шавомс сонь, аньцек пельсь ломаттнень эзда, сяс мес синь лувондозь Иоаннонь прорококс.

⁶ Иродонь шачемшинц иласта Иродиадань стирец кштись инжихнень инголе и тусь Иродонь мяльс,

⁷ сяс сон варась тейнза максомс сянь, мезе афоль ана.

⁸ Стирсь, тядянц мяленц коряс, пшкядсь: «Макск тейне тяниёк лапш шава лангса Иоанн Кстиндайть прянц».

⁹ Ирод оцязорсь ризназевсь, но сяс мес инжихнень инголе макссь вал, сон мярьгсь пяшкодемс стирть мяленц.

¹⁰ Ирод кучсь пякстамгуду ломань Иоаннонь прянц керома.

¹¹ Кандозь сонь прянц лапш шава лангса и максозь стирти, а ся кандозе эсь тядянцты.

¹² Иоаннонь тонафниенза састь, сявозь сонь ронгонц и калмазь; а меле тусть и тянь колга азондсть Иисусти.

Иисус анды вете тёжятть ломань

¹³ Мзярда Иисус кулезе тянь, Сон тусь тоста венчса ськамонза шава вастс. Тянь колга марясть ломаттне, лиссть ошстост и тусть мельганза ялга.

¹⁴ Иисус лиссь ведть трвас и няйсь лама ломань. Синь ужялькс арасть Тейнза, и Сон пчкафтозень ёткстост сярядихнень.

¹⁵ Мзярда сась илядьсь, Тейнза маладсть тонафниенза и мярьгсть: «Вастсь тяса шава и пингське ни лама. Нолдайть ломаттнень, катк туйхть маластонь велева и рамайхть эстейст ярхцамбяль».

¹⁶ Но Иисус мярьгсь тейст: «Тейст аф эряви тумс, тинь максода тейст ярхцамс».

¹⁷ Синь корхтайхть Тейнза: «Минь тяса мезеньковок аш, аньцек вете кшиньке и кафта калоньке».

¹⁸ Сон мярьгсь: «Кандость синь Тейне».

¹⁹ Иисус мярьгсь ломаттненди озсемс тишеть лангс. Сон сявозень вете кшитнень и кафта калхнень, варжаксть менели, и бславазень синь. Сон синнезень и максозень тонафниензонды, а тонафниенза – ломаттненди.

²⁰ Ярхцасть сембе и топодсть. И нинге лятф сускомда кочкасть кемгафтува пяшксе кептерь,

²¹ а ярхцайда ульсь, авада и шабада башка, ветешка тёжянь ломань.

Иисус моли ведть ланга

²² Тяда меле Иисус эстокиге мярьгсь тонафниензонды озамс венчти и ётамс эрьхкть омба трвас, и аф учсемс, мзярда Сон нолдасыне ломаттнень.

²³ Ломаттнень нолдамдост меле, Иисус куцсь панда лангс, мялецоль ськамонза озондомс. И шобдать самс ляткшнесь тоса ськамонза.

²⁴ А венчсь ульсь ни ичкозе эрьхке трвать эзда, ведькомболксне шавсть эзонза, сяс мес каршезост уфась варма.

²⁵ Варьхмодемшовор Иисус тусь тонафниензонды ведть ланга молезь.

²⁶ Тонафниенза няезь, кода Сон моли ведть ланга, и эводемать эзда ювадсть: «Тя шопача!»

²⁷ Иисус эстокиге мярьгсь тейст: «Тяда пеле, тя Монан».

²⁸ Пётр каршезонза корхтай: «Азор! Кда тя Тон, мярьк тейне самс Тейть ведть ланга».

²⁹ Иисус мярьгсь: «Сак». Пётр кадозе венчть и ведть ланга тусь Иисусонь шири.

³⁰ Но кодак марязе вармать виенц, эводсь, кармась ваяма и ювадсь: «Азор! Идемак!»

³¹ Иисус эстокиге венептезе кяденц, фатязе сонь и мярьгсь тейнза: «Вай, конашкава ёмла кемамаце! Мес тон юмафнесак кемамать?»

³² Мзярда синь озасть венчти, вармась лоткась.

³³ Венчса улихне прасть Иисусть пильгс и мярьгсть: «Афкукс, Тон Шкайть Цёрацат».

Иисус пчкафни сярядихть Геннисаретонь масторса

³⁴ Синь ётасть эрьхкть омба трвас и пачкодсть Геннисаретонь мастору.

³⁵ Мзярда тостонь эряйхне содазь Иисусонь, синь срафтозь кулять сембе вастова и вятезь Тейнза сембе сярядихнень.

³⁶ Синь эняльдсть Тейнза максомс сярядихненди токамс хуш щам пенянцты. И сембе, конат токафнезь кядьснон, пчксесть.