Матфей 12 - Од Соткс Новый Завет на мордовском-мокша языке 2016

Ломанень Цёрась ваймамань шить лангса азор

¹ Весть ваймамань шиня Иисус мольсь сёронь паксянь пачк. Тонафниензон вачсть пексна и синь кармасть сёрапрянь сязендема и ярхцама.

² Фарисейхне няезь тянь и мярьгсть Иисусти: «Ватт, Тонь тонафнихне тиендьсазь сянь, мезе аф мярьгондеви тиендемс ваймамань шиня».

³ Сон кизефтезень: «Дяряй ашесть лувонда, мезе тись Давид, мзярда сонць и мархтонза молихне вачендсть?

⁴ Сон сувась Шкаень куду и ярхцась Шкайти кантф кшида, конатнень эзда ашезь мярьгондев ярхцамс аф Давидонди, аф сонь мархтонза молихненди, а мярьгондеволь аньцек озксвятихненди.

⁵ Али ашесть лувонда тинь Моисеень койста, кода озксвятихне Шкаень кудса покайхть ваймамань шиня, аньцек аф муворгофневихть тянкса?

⁶ Корхтан тейнть: тяса Ся, кие Шкаень кудта сяда оцю.

⁷ Сёрматфксса азф: "Мон учан эздонт кельгозь ужяльдема, а аф озксказнень каннема". Кда тинь шарьхкоделесть ня валхнень смузьснон, эста афолесть суденда аф муворуфнень.

⁸ Вдь Ломанень Цёрась ваймамань шить лангсонга азор».

Иисус пчкафты ваймамань шиня

⁹ Иисус тусь ся вастста и сась синагогазост.

¹⁰ Синагогаса ульсь коське кядь ломань. Фарисейхне вешендсть туфтал муворгофтомс Иисусть, сяс и кизефтезь Сонь: «Койть коряс мярьгондеви-аф пчкафнемс ваймамань шиня?»

¹¹ Иисус мярьгсь тейст: «Кда эздонт кинь фкя и тяка учац ваймамань шиня ваяй лотку, дяряй сон аф моли и аф таргасы тоста?

¹² А вдь ломанць сяда питни учать коряс! Лисенди, ваймамань шиста мярьгондеви тиендемс цебярь тефт».

¹³ Сяда меле корхтай сярядити: «Венептьк кядцень». Ся венептезе, и кядец арась шумбракс омбоцеть лаца.

¹⁴ Эста фарисейхне лиссть и кармасть арьсема, кода машфтомс Иисусть. Содамок тянь колга, Иисус тусь ся вастста.

Иисус – Шкайть кочкаф покодиец

¹⁵ Иисусонь мельге тусь лама ломань. Сон сембонь синь пчкафтозень

¹⁶ и кардазень Эсь колганза азонкшнемс.

¹⁷ Тя лиссь Исаия пророкть валонзон пяшкодеманкса:

¹⁸ «Вага Монь Покодиезе, конань кочкайне, конань Мон кельгса, кона Монь кенярдема вастозе. Тейнза максса Ваймопожфозень, и Сон пачфтсы сембе ломаньтналхненди Монь виде судозень.

¹⁹ Сон аф кармай пялькстома, ювадема, и ульцяса ломаттне аф кульсазь Сонь вайгяленц.

²⁰ Пялес синтьф нюдить Сон аф синдьсы и пялес палы кайтянть аф матсы, мзярс аф вятьсы видешить сяськомас.

²¹ И Сон кармай улема надияма вастокс сембе ломаньтналхненди».

Иисусонь муворгофнесазь Сатанань вийть тевс нолдамаса

²² Эста вятсть Иисусти сокор и аф корхтай аля, конань эсоль кяжи ваймопожф. Иисус пчкафтозе сонь, и ся кармась няема и корхтама.

²³ Сембе ломаттне дивандасть и корхтасть: «Афоли Сон Христоссь, Давидонь Цёрац?»

²⁴ Тянь марямста фарисейхне мярьгсть: «Веельзевулонь, кяжи ваймопожфнень оцюняснон вийса Сон панцесыне кяжи ваймопожфнень».

²⁵ Но Иисус содазе, мезень колга синь арьсихть, и мярьгсь тейст: «Эрь кодама масторсь, кона явови эсь эсьсонза, шами; и эрь кодама ошсь али кудсь, коса тюремат-сялондомат, аф кирди.

²⁶ Кда Сатанась панцесы Сатанать, эста сон аф ладяй эсь мархтонза: кода ванфтови эста сонь мастороц?

²⁷ И кда Мон Веельзевулонь вийса панцесайне кяжи ваймопожфнень, эста тинь ломаненте кинь вийса панцесазь синь? Сяс катк синь улихть тейнть судьякс.

²⁸ Но кда Мон Шкаень Ваймопожфса панцесайне кяжи ваймопожфнень, эста Шкаень Оцязорксшись сась тейнть.

²⁹ Али, кие сувави вии ломанть кудс и саласы уликс-паронц, кда васенда аф сотнесы сонь? Аньцек эста салави сонь кудботмоц.

³⁰ Кие аф Монь мархтон, ся Тейне каршек; кие Монь мархтон аф кочкай, ся срафты.

³¹ Сяс корхтан тейнть: эрь кодама пежесь и сялдомась нолдави ломаттненди; а Иняру Ваймопожфть сялдомац – аф нолдави.

³² Кда кие сялдсы Ломанень Цёрать, тя пежесь нолдави тейнза, а кда сялдсы Иняру Ваймопожфть, ся пежесь аф нолдави аф тя, аф сай пингонь эряфса».

Шуфтсь и сонь иможенза

³³ «Кда шуфтсь цебярь, иможензовок улихть цебярьхть; кда шуфтсь кальдяв, иможензовок улихть кальдяфт, сяс мес шуфттне содавихть иможснон коряс.

³⁴ Пупай куень лефкст! Кода тинь корхтаманте ули цебярь, мзярда тинць кяжихтяда? Вдь мезьда пяшксе ломанть седиец, ся и лиси кургстонза.

³⁵ Пара ломанць парода пяшксе седистонза лихни цебярь, а кяжись кяжда пяшксе седистонза – кяж.

³⁶ Корхтан тейнть, эрь шава валонкса ломаттненди сави араламс пря судонь шиня,

³⁷ сяс мес эсь валхнень коряс тон лувоват аф муворукс и эсь валхнень коряс улят судендаф».

Иона пророкть тяштьксоц

³⁸ Эста койти кой-кона тонафтыхне и фарисейхне мярьгсть Иисусти: «Тонафты! Минь мяленьке няемс тяштькс Тонь эздот».

³⁹ Но Иисус каршезост мярьгсь: «Тяниень пингонь кяжи и Шкайти полафни ломаттне вешендихть тяштькс, аньцек Иона пророкть тяштькстонза башка, лия тяштькс аф максови тейст.

⁴⁰ Кода Иона ульсь оцю калть потмоса колма шит и колма вет, стане Ломанень Цёраське ули модать потмоса колма шит и колма вет.

⁴¹ Ниневиянь эряйхне стяйхть судонь шиня тяниень пингонь эряйхнень мархта и судендасазь синь. Вдь Ниневиянь эряйхне шарфтсть Шкайти Ионань кулянц марямда меле; и вов, тяса ащи Ионада оцюсь!

⁴² Лямбе ширдень оцязоравась стяй судендамань шиня тяниень пингонь ломаттнень мархта и судендасыне синь, сяс мес сон сашендсь масторбеста Соломононь смузьшинц кулхцондома. И вов, тяса ащи Соломонда оцюсь!»

Аф ару ваймопожфть мрдамац

⁴³ «Мзярда аф ару ваймопожфсь лиси ломанть потмоста, эста сон шаронды ведьфтома вастова, вешенди эстейнза эряма-ащема васта, но аф мушенды.

⁴⁴ Эста сон мярьги: "Мрдан меки кудозон, коста тунь". И мрдамста мушендсы кудонц шавоста, тяйфста и урядафста.

⁴⁵ Эста сон моли, сяви мархтонза сисем лия ваймопожфт, конат сондедонза кяжихть. Синь сувайхть ся ломанть потмос и эряйхть тоса. Меколи ся ломанти арай нинге сядонга кальдяв ингольцеть коряс. Тяфта ули тя пингонь кяжи ломаттненьге мархта».

Кие Иисусонь тядяц и брадонза?

⁴⁶ Мзярда Иисус нинге корхтась ломаттненди, тядяц и брадонза ащесть ушеса, мяльсноль корхтамс Сонь мархтонза.

⁴⁷ И кие-бди мярьгсь Иисусонди: «Тонь тядяце и браттне ушесот, мяльсна корхтамс мархтот».

⁴⁸ Каршезонза Иисус мярьгсь: «Кие Монь тядязе и кит Монь брадне?»

⁴⁹ Няфтсь кядьса тонафниензон лангс и мярьгсь: «Вагот Монь тядязе и брадне.

⁵⁰ Вдь кие пяшкотькшнесы Монь Менелень Алязень мяленц, ся Тейне и брад, и сазор, и тядя».