Матфей 10 - Од Соткс Новый Завет на мордовском-мокша языке 2016

Кемгафтува апостолхне

¹ Иисус тердезень кемгафтува тонафниензон, макссь тейст азорксши панцемс аф ару ваймопожфнень и пчкафнемс эрь кодама урма и сярятьф.

² Кемгафтува апостолхнень лемсна тяфтапт: васенцесь Симон, кона лемневи Пёторкс, и Андрей сонь брадоц, меле Иаков, Зеведеень цёрац, и Иоанн, сонь брадоц,

³ Филипп и Варфоломей, Фома и каяфксонь кочкайсь Матфей, Алфеень цёрац Иаков и Леввей, кона лемневсь Фаддейкс,

⁴ Симон Кананит и Иуда Искариот, кона и мизе Иисусонь.

⁵ Ня кемгафтувотнень Иисус кучезень и кошардозень: «Тяда яка ся китнень эзга, конат вятихть лия ломаньтналхненди, и тяда сувсе Самариянь фкявок ошу.

⁶ Но тянь вастс моледа Израилень ломаньтналти, кона юмаф-араф уча лаца.

⁷ Молемста пачфнесть: "Менелень Оцязорксшись маласа".

⁸ Сярядихнень пчкафнесть, кулофнень вельмафнесть, наксафты урма мархтотнень – аруяфнесть, кяжи ваймопожфнень панцесть. Питнефтома сяводе, питнефтома максость.

⁹ Тяда сявонде мархтонт аф зрнянь, аф сиянь, аф серень ярмак,

¹⁰ аф ки лангонь канкс, аф щапт полафтомс, аф карьсембяльхть, аф мандоня, сяс мес покайти ярхцамбяльсь максови тиф покодеманц инкса.

¹¹ Кодама ошс али велес афоледе сува, куляксасть, кие анок тинь нолдамс пялонза и ащеда тозк тумозонт.

¹² Кудти сувамста шумбрандафтость кудэряйхнень и арьседа тейст сетьмоши.

¹³ Кда тя кудса васьфттядязь цебярьста, катк тинь сетьмошинь арьсеманте сувайхть тоза, а кда васьфттядязь кальдявста, катк синь меки мрдайхть тейнть.

¹⁴ А кда кие тинь аф васьфттядязь и валонтень аф кулхцондсы, эста тя кудста али тя ошста тумстонт нльне пультьке шукадесть пильгстонт.

¹⁵ Видеста корхтан тейнть: Содом и Гоморра ошненди судонь шиня ули сяда тёждя ся ошть коряс.

¹⁶ Вага, Мон кучтядязь тинь, кода учатнень врьгаснень ёткс: уледа куй лаца смузюкс и гуляня лаца сятявкс.

¹⁷ Ванфтода пря ломаньда: синь кармайхть макссемонт судс и кармайхть пикссемонт синагогасост.

¹⁸ Монь инксон вяттядязь тинь оцюнятненди и оцязорхненди, и эста карматада азондома Монь колган тейст и лия ломаньтналхненди.

¹⁹ Но мзярда тинь вяттядязь судс, тяда пичеде, кода и мезе корхтамс; ся пингоня тейнть максови, мезе азомс,

²⁰ сяс мес аф тинь карматада корхтама, а Алянтень Ваймопожфоц вельдент.

²¹ Брадсь макссы брадонц куломас, и алясь – цёранц; и кеподихть иттне тядяснон-аляснон каршес и шавфтсазь синь.

²² Монь лемозень инкса кивок аф кармай кельгомонт, но кие кирди петь самс, ся идеви.

²³ Мзярда кармайхть панцемонт фкя ошса, ворьгодеда лияс. Видеста корхтан тейнть: аф кенерьхтяда ётамс Израильть сембе ошензон, кода сай Ломанень Цёрась.

²⁴ Тонафнись аф эрси оцюкс тонафтыенц коряс, али покодись азоронц коряс:

²⁵ тонафнити саты, кда сон ули тонафтыенц лаца, и покодити, кда сон ули азоронц лаца. Кда кудазорть лемнесазь Веельзевулкс, эста нинге сяда пяк тяфта мярьгихть кудстоннензон колга».

Шкайда пельхть, а аф ломаньда

²⁶ «Тяда пеле эздост, вдь сембось, мезсь кяшф, лиси лангти, и сембе салаваннеське арай содафокс.

²⁷ Мезе корхтан тейнть шобдаса, тянь азондость шинь валдса; мезе азф тейнть пилезонт тошказь, тянь азондость сембонь инголе.

²⁸ И тяда пеле ронгонь машфтыда, тейст аф токави тинь ваймонте; а пеледа Сянь эзда, кона машты ваймотьке и ронгтьке юмафтомс-арафтомс адса.

²⁹ Кали кафта кирьхксне мишендевихть аф трёшникта? И эздост фкяське аф прай модать лангс, кда тянди аф ули Алянтень мялец.

³⁰ А тинь прясонт сембе шяярьнятневок лувфт.

³¹ Сяс тяда пеле: тинь сяда питнихтяда сембе кирьхкснень коряс».

Кемамацень панжеманц-азоманц колга и Иисусонь мельге молемать колга

³² «Эрть, кие ломаттнень инголе лувсы и лемдьсы эсь прянц Моннекс, сянь Монга Менелень Алязень инголе лувса и лемдьса Монценнекс.

³³ А кие ломаттнень инголе потай Монь эздон, сянь эзда Монга потан Менелень Алязень инголе.

³⁴ Тяда арьсе, бта Мон сань модать лангс сетьмошинь кандома. Мон сань кандомс аф сетьмоши, но тор.

³⁵ Мон сань цёрать алянц эзда явфтома, стирть тядянц эзда, рьвянять авозенц эзда.

³⁶ И душманкс ломанти арайхть сонь кудэряенза.

³⁷ Кие кельгсы алянц али тядянц Мондедон сяда пяк, ся аф кондясти Тейне; и кие кельгсы цёранц али стиренц Мондедон пяк, ся аф кондясти Тейне.

³⁸ И кие аф сявсы эсь крёзонц и Монь мельган аф моли, ся аф кондясти Тейне.

³⁹ Кие ёрай ванфтомс эряфонц, ся юмафтсы сонь, а кие юмафтсы эряфонц Монь инксон, ся ванфтсы сонь.

⁴⁰ Кие тинь васьфнетядязь, ся Монь васьфнесамань, а кие Монь васьфнесамань, ся васьфнесы Монь Кучиезень.

⁴¹ Кие васьфнесы пророкть сянкса, мес сон пророк, сянди ули казне, кода пророконди. Кие васьфнесы видексшинь ломанть сянкса, мес сон видексшинь ломань, сянди ули казне, кода видексшинь ломаненди.

⁴² Кие максы симомс кельме ведь карьхкя Монь тонафнинень эзда фкяти сянкса, мес сон Монь тонафниезе, видеста корхтан тейнть: ся казнефтома аф иляды».