Матфей 1 - Од Соткс Новый Завет на мордовском-мокша языке 2016

Иисусонь шачема юромоц

¹ Тя Иисус Христость шачема юромоц, кона ушеды Давид атянь-атянц и сянь атянь-атянц Авраамонь эзда.

² Авраам ульсь алякс Исааконди; Исаак – Иаковонди; Иаков ульсь алякс Иудати и сонь брадонзонды;

³ Иудань и Фамарень эзда шачсть Фарес и Зара; Фарес ульсь алякс Есромонди; Есром ульсь алякс Арамонди;

⁴ Арам ульсь алякс Аминадавонди; Аминадав – Наассононди; Наассон – Салмононди;

⁵ Салмононь и Рахавонь эзда шачсь Вооз; Воозонь и Руфень эзда шачсь Овид; Овид ульсь алякс Иессеенди;

⁶ Иессей ульсь алякс Давид оцязорти. Давид оцязорсь ульсь алякс Соломононди, конань тядяц инголи ульсь Уриянди рьвакс;

⁷ Соломон ульсь алякс Ровоамонди; Ровоам – Авиянди; Авия – Асанди;

⁸ Аса ульсь алякс Иосафатонди, Иосафат – Иорамонди; Иорам – Озиянди;

⁹ Озия ульсь алякс Иоафамонди; Иоафам – Ахазонди; Ахаз – Езекиянди;

¹⁰ Езекия ульсь алякс Манассиянди; Манассия – Амононди; Амон – Иосиянди;

¹¹ Иосия ульсь алякс Иоакимонди, Иоаким – Иехониянди и сонь брадонзонды, Израилень ломаттнень Вавилону эряма ётафтомдост инголе.

¹² Вавилону ётафтомдост меле, Иехония арась алякс Салафиилонди; Салафиил – Зоровавеленди;

¹³ Зоровавель арась алякс Авиудонди; Авиуд – Елиякимонди; Елияким – Азоронди;

¹⁴ Азор – Садоконди; Садок – Ахимонди; Ахим – Елиудонди;

¹⁵ Елиуд – Елеазаронди; Елеазар – Матфанонди; Матфан – Иаковонди;

¹⁶ Иаков – Иосифонди, Мариянь мирденцты. Мария шачфтозе Иисусонь, конань кармасть лемнемонза Христоскс.

¹⁷ Тяфта Авраамонь эзда Давидонди молемс кемнилие юром; и Давидонь эзда Вавилону эряма ётафтомдост инголе кемнилие юром; и Вавилону ётафтомдост меле Христости молемс стане жа кемнилие юром.

Иисус Христость шачемац

¹⁸ Иисус Христоссь шачсь тяфта: Сонь тядяц, Мария, ладяфоль Иосифонди, аньцек синь рьвяямдост инголе Мария пекиель ни Иняру Ваймопожфть эзда.

¹⁹ Иосиф, сонь мирдец, ульсь видексшинь ломань и сонь ашель мялец лихтемс Мариянь визьксонц лангти, сяс ёразе салава коламс синь ладямаснон.

²⁰ Мзярда Иосиф арьсезевсь тянь колга, онозонза эвондась Азорть ангелоц и мярьгсь: «Иосиф, Давидонь юромста цёра! Тят пеле сявомс рьвакс Мариянь; шабась, конань сон каннесы, Иняру Ваймопожфть эзда.

²¹ Мария шачфты Цёра и путат Тейнза лем: Иисус; сяс мес Сон идесыне Эсь ломанензон пежеснон эзда».

²² Сембось тя лиссь, сяс мес эрявсь пяшкодевомс Азорть валонцты, конань Сон азозе пророкть вельде:

²³ «Аляса апак токак стирсь пекияй и шачфты Цёра, и путыхть Тейнза лем Еммануил», кона шарьхкодеви: «Шкайсь мархтонк».

²⁴ Мзярда Иосиф сргозсь, сон тись стане, кода мярьгсь тейнза Шкаень кучф ангелсь, сявозе Мариянь рьвакс

²⁵ и ашезе сода сонь кода рьвянь, мзярс Мария ашезе шачфта Цёранц, конанди Иосиф путсь лем Иисус.