Марк 9 - Од Соткс Новый Завет на мордовском-мокша языке 2016

¹ Иисус мярьгсь тейст: «Видеста корхтан тейнть: тяса ащихнень ёткса улихть стапт, конат нинге аф кенерихть куломс, кода ни няйсазь Шкаень Оцязорксшить, кона сась сембе вийсонза».

Иисусонь лиякстомац

² Кота шида меле Иисус сявозень Пёторонь, Иаковонь и Иоаннонь и куцсь мархтост сери панда пряс, коса ульсть ськамост. Тоса инголест Сон лиякстомсь.

³ Щамонза пиндолгодсть и вандолгодсть стама акшеса, кода киндинге модать лангса афольхть акшептов.

⁴ Тейст эвондасть Илия и Моисей; и синь корхнесть Иисусонь мархта.

⁵ Ся пингоня Пётр мярьгсь Иисусти: «Тонафты! Кодань пара тейнек тяса. Эрь тихтяма колма кошт: фкять Тейть, фкять Моисеенди и фкять Илиянди».

⁶ Пётр мярьгсь тяфта, сяс мес ашезе сода, мезе корхтамс, вдь тонафнихне ульсть пяк эвотьфт.

⁷ Эста эвондась ковол, кона вельхтязень синь, и коволть потмоста кулевсь вайгяль: «Тя Монь кельгома Цёразе. Кулхцондость Сонь».

⁸ Тонафнихне эстокиге варжакстсть перьфпяльге, и киньге ни, Иисуста башка, ашезь няе.

⁹ Пандть пряста валгомста Иисус мярьгсь тонафниензонды киндинге мезевок аф азонкшнемс сянь колга, мезе няйсть, мзярс Ломанень Цёрась аф вельмай кулофста.

¹⁰ Тонафнихне кирдезь Иисусть валонзон седисост и эсь ётковаст корхнесть, мезе стамсь кулофста вельмамась.

¹¹ Синь кизефтезь Иисусонь: «Мес мле койти тонафтыхне корхтайхть: васенда сама Илиянди?»

¹² Сон каршезост мярьгсь: «Виде, васенда сама Илиянди и сон семботь путсы эсь вастованза. И Ломанень Цёрать колга сёрматф: Тейнза сави кирдемс лама маятамада и сялдомада.

¹³ Но азса тейнть: Илия сась ни и ломаттне мархтонза тисть эсь мяльснон коряс, кода сёрматф колганза».

Иисус панцы кяжи ваймопожфть цёранять потмоста

¹⁴ Иисус колма тонафниензон мархта сась ляды тонафнихненди. Вакссост няйсь лама ломаньда и койти тонафтыда, конат пялькснесть синь мархтост.

¹⁵ Мзярда няезь Иисусонь, сембе дивандазевсть и эряскодсть мархтонза шумбракстома.

¹⁶ Иисус кизефтезень синь: «Мезень колга пялькстоманте?»

¹⁷ Ломаттнень ёткста фкясь мярьгсь Иисусти: «Тонафты! Мон вятине Тейть цёранязень, сонь эсонза кяжи ваймопожф, кона тиезе сонь аф корхтайкс.

¹⁸ Коса аф кундасы сонь, прафтсы модать лангс, и кургстонза туй шов, порьсыне пеензон и шуфтоми. Энялькшнень тонафнихненди, панелезь эздонза, а тейст ашезь панев».

¹⁹ Иисус каршезонза мярьгсь: «Вай, тяниень пингонь аф кемай ломатть! Мзярс Мон карман улема тинь мархтонт? И мзярс карман кирдемонт тинь? Вятесть цёранять Тейне».

²⁰ Вятезь цёранять Иисусти. Кодак кяжи ваймопожфсь няезе Иисусть, сон калкфтозе цёранять; ся прась мастору и кеворькшнесь, кургстонза лиссь шов.

²¹ Иисус кизефтезе алянц: «Кунара сон тяфта арась?» Ся мярьгсь: «Идькс пингстонза.

²² Ламоксть кяжи ваймопожфсь ёрязе сонь толтиге и ведтиге, ёразе шавомс. Но кда Тейть мезе тиеви, ужяльдемасть и лезтт тейнек!»

²³ Иисус мярьгсь тейнза: «Кда Тейть мезе тиеви? Сембось тиеви сянди, кие кемай».

²⁴ Эстокиге цёранять аляц ювадсь: «Мон кеман, Азор! Лезтт тейне кемамс!»

²⁵ Иисус няезе, кода ломаттне ласькихть ширезонза. Сон кардазе аф ару ваймопожфть: «Кяльфтомокс и пярявкс арафни ваймопожф! Мярьган тейть: листь потмостонза и оду тят сувсе эзонза».

²⁶ Кяжи ваймопожфсь пешкодсь, вииста калкфтозе цёранять и лиссь эздонза. Цёранясь арась кода кулоф, сяс ламотне корхтасть: «Сон кулось».

²⁷ Но Иисус сявозе цёранять кядьта и арафтозе пильге лангс, и ся стясь.

²⁸ Мзярда Иисус сувась куду, тонафниенза, ломаттнень эзда башка, кизефтезь Сонь: «Мес тейнек ашезь панев кяжи ваймопожфсь?»

²⁹ Сон мярьгсь тейст: «Тяфтама ваймопожфсь лиякс аф лихтеви, аньцек озондомаса и постонь кирдемаса».

Иисус тага азонды Эсь куломанц колга

³⁰ Тоста тумда меле Иисус и тонафниенза ётасть Галилеять пачк. Иисусть ашель мялец, кивок содалезе тянь;

³¹ вдь Тейнза эрявсь тонафтомс Эсь тонафниензон. Сон корхнесь тейст: «Ломанень Цёрать макссазь ломаттнень кядьс и синь шавсазь Сонь, и куломдонза меле колмоце шиня Сон вельмай кулофста».

³² Но синь ашезь шарьхкоде ня валонзон, а кизефтеманц пельсть.

Кие сембода оцюсь?

³³ Синь састь Капернауму. Кудса Иисус кизефтезень синь: «Мезень колга корхнеде ки лангса?»

³⁴ Синь кашт исть моле, сяс мес ки лангса корхнесть, кие ёткстост сембода оцю.

³⁵ Иисус озась, тердезень кемгафтувотнень и мярьгсь тейст: «Кинь мялец улемс васенцекс, сембонь ёткста улеза мекольцекс и сембонди покодикс».

³⁶ Эста Иисус сявсь идь, арафтозе тонафниензон инголи, озафтозе элезонза и мярьгсь тейст:

³⁷ «Кие сяви фкя тяфтама идь Монь лемсон, ся Монь сявсамань. А кие Монь сявсамань, ся аф Монь, но Монь Кучиезень сявсы».

Кие тейнть аф каршек, ся ащи инксонт

³⁸ Иоанн мярьгсь: «Тонафты! Минь няеме ломань, кона Тонь лемсот панци кяжи ваймопожфт, а мархтонк аф якай. Минь кардаськ сонь тянь тиендемда, сяс мес аф якай мархтонк».

³⁹ Иисус мярьгсь: «Тясть карне сонь; кие Монь лемсон тии дивань тев, ся кальдяв вал лангозон аф азы.

⁴⁰ Ся, кие аф моли тейнть каршек, ся ащи инксонт.

⁴¹ И кие максы тейнть симомс ведь карьхкя Монь лемсон, сяс мес тинь Христосоннетяда, видеста корхтан тейнть: ся казнефтома аф иляды».

Пежес сувафтомась

⁴² «А кие вятьсы пежес конанцка фкять ня ёмлатнень эзда, конат тейне кемайхть, сянди улель сяда пара, кда сялдазозонза повфтальхть яжама кев и ёрдалезь оцюведти.

⁴³ Кда тонь кядьце вяттянза пежес, керк сонь: тейть сяда пара ули фкя кядьса сувамс пефтома пингонь эряфти, адонь аф мадонды толти кафцьке кядьса ёрдамать коряс,

⁴⁴ коса эздост ярхцай сукссь аф кулси, коса толське аф мадонды.

⁴⁵ Кда тонь пильгце вяттянза пежес, керк сонь: тейть сяда пара ули фкя пильгса сувамс пефтома пингонь эряфти, адонь аф мадонды толти кафцьке пильгса ёрдамать коряс,

⁴⁶ коса эздост ярхцай сукссь аф кулси, коса толське аф мадонды.

⁴⁷ Кьда тонь сельмоце вяттянза пежес, таргак сонь: тейть сяда пара ули фкя сельмоса сувамс Шкайть Оцязорксшизонза, адонь толти кафцьке сельмоса ёрдамать коряс,

⁴⁸ коса эздост ярхцай сукссь аф кулси, коса толське аф мадонды.

⁴⁹ Вдь толонь пачк ётазь эрь ломанць салыяй и эрь озксказнеське салыяфневи салса.

⁵⁰ Салсь цебярь парши: аньцек юмафтондярясы эсь салушинц, кода арай меки салукс? Кирдесть эсьсонт салть, и эряда ялгаксшиса фкя-фкянь мархта».