Марк 6 - Од Соткс Новый Завет на мордовском-мокша языке 2016

Иисусонди аф кемайхть Назарет ошса

¹ Иисус лиссь тоста и тусь Эсь ошезонза. Тонафниенза мольсть мельганза.

² Мзярда сась ваймамань шись, Сон ушедсь тонафтома синагогаса. Ломаттне кулхцондозь Сонь и ламотне эздост дивандакшнесть: «Коста Тейнза сембось тя сась? И кодама ся смузьшись, кона Тейнза максф? И кода тяшкава оцю тефне тиендевихть Сонь кядьсонза?

³ Дяряй Сон аф узерьса шапись, Мариянь цёрац, Иаковонь, Иосиянь, Иудань и Симононь брадсна? Афоли сазоронзовок тяса ётксонк?» И ашель мяльсна кулхцондомс Сонь и кемамс Тейнза.

⁴ Иисус мярьгсь тейст: «Пророксь пара лувксса кирдеви эрь кодама вастса, но аньцек аф эсь масторсонза и аф эсь ломанензон ёткса, и аф эсь кудсонза».

⁵ И Тейнза ашезь тиев тоса кодамовок дивань тев, аньцек мзярошка сярядиень лангс путозень кядензон и пчкафтозень синь.

⁶ Иисус пяк дивандась синь аф кемамаснонды. Тяда меле Сон якась перьфке ащи велетнень ланга и тонафнезень ломаттнень.

Иисус кучсыне кемгафтува апостолхнень

⁷ Иисус тердезень кемгафтува тонафниензон, кармась кучсемост синь кафтонь-кафтонь и макссь тейст азорксши панцемс аф ару ваймопожфнень.

⁸ Сон мярьгсь тейст мезевок аф сявондемс ки лангс мандоняда башка: аф кяскав, аф кши, аф серень ярмак,

⁹ но пильгозост щакшнемс шнань карьсембяльхть и сявомс аньцек фкя щам.

¹⁰ Нинге мярьгсь тейст: «Кодама кудс афоледе сува, ащеда тоса, мзярс аф тутада ся аймакста.

¹¹ Кда кие тинь аф васьфттядязь и аф кармай кулхцондомонт, эста туда тоста и шукадесть пульть пильгонтень лангста. Катк тя ули тейст муворгофтомань тяштьксокс. Видеста корхтан тейнть: судонь шиня Содом и Гоморра ошненди ули сяда тёждя ся ошть коряс».

¹² Тонафнихне тусть и азонкшнезь ломаттненди: «Шарфтода Шкайти!»

¹³ Синь панцезь ламоц кяжи ваймопожфнень ломаттнень потмоста, и ламоц сярядихнень вадендезь вайса и пчкафнезь синь.

Иоанн Кстиндайть куломац

¹⁴ Иисусонь колга кулятне якасть перьфпяльге. Синь пачкодсть Ирод оцязорти, и сон корхтась: «Тя Иоанн Кстиндайсь вельмась кулофста, и сяс тиенди тяфтама вии тефт».

¹⁵ Лиятне корхнесть: «Сон Илиясь». А лиятне: «Сон кунардонь пророкнень лаца пророк».

¹⁶ Ирод кулезень ня корхнематнень и мярьгсь: «Тя Иоанн, конань прянц керфтыне, вельмась кулофста».

¹⁷ Самай тя Иродсь мярьгсь кундамс Иоаннонь и цинзерса озафтомс сонь пякстамгуду Иродиадань, Филипп брадонц рьванц инкса. Ирод сонь сявозе рьвакс,

¹⁸ но Иоанн корхнесь Иродонди: «Койть коряс аф мярьгондеви тейть эрямс эсь брадцень рьванц мархта».

¹⁹ Иродиадась кирдсь кяж Иоаннонь лангс, мялецоль шавфтомс сонь. Но тя тейнза ашезь тиев,

²⁰ сяс мес Ирод пельсь Иоаннонь эзда. Ирод содазе: Иоанн видексшинь и иняру ломань, и сяс ванфнезе сонь. Ирод кулхцонкшнезе Иоаннонь тонафтоманц и лама тиендсь сонь валонзон коряс. Сон оцю мяльса кулхцондозень Иоаннонь валонзон.

²¹ Меколеньбяли Иродиаданди мувсь кяжень пандома ётка. Ирод шачемшинц сюнеда срхкафтсь оцю ила эсь маластонь ломанензонды, тёжянень оцюнятненди и Галилеянь оцюнятненди.

²² Сувась Иродиадань стирец и ушедсь кштима. Сон пяк тусь Иродонь и инжиензон мяльс. Ирод оцязорсь мярьгсь стирти: «Анак кядьстон, мезе мяльце, и мон сянь максса тейть».

²³ Сон макссь вал стирти: «Мезе афолеть ана, максса тейть, нльне оцязорксшизень эзда пялетьке».

²⁴ Стирсь лиссь, кизефтезе тядянц: «Мезе кядьстонза анама?» Ся мярьгсь: «Анак Иоанн Кстиндайть прянц».

²⁵ Стирсь эстокиге эряскодозь мрдась оцязорти и мярьгсь: «Тяфтама мялезе: тяникиге кантфтк тейне Иоанн Кстиндайть прянц лапш шава лангса».

²⁶ Оцязорть пяк колавсь мялец, но максф валонц инкса и тоса ащи инжихнень инкса ашезе полафта эсь мяленц.

²⁷ Сон эстокиге кучезе фкя ушманонц и мярьгсь тейнза кандомс Иоаннонь прянц. Ся тусь пякстамгуду, керозе Иоаннонь прянц,

²⁸ кандозе лапш шава лангса и максозе стирти. Стирсь максозе прять эсь тядянцты.

²⁹ Мзярда тянь марязь Иоаннонь тонафниенза, синь састь, сявозь ронгонц и калмазь.

Иисус анды вете тёжятть ломань

³⁰ Апостолхне мрдасть Иисусти и азондозь тейнза семботь, мезе синь тисть и мезьс тонафтозь ломаттнень.

³¹ Сон мярьгсь тейст: «Аряда мархтон сетьме вастс, тейнть аф ламос эряви ваймамс». Тоса, коса синь ащесть, ульсь пяк лама сашенды-тушенды ломаньда. Синь нльне изь ляда пингсна ярхцамска.

³² Сяс синь ськамост тусть венчса сетьме вастс.

³³ Но ломаттне няезь, кода синь тусть уезь, и ламотне содазь синь. Сембе ошнень эзда ломаттне тусть ласькозь ведть трвава и венчта инголи пачкодсть тоза, коза срхксесь Иисус тонафниензон мархта.

³⁴ Мзярда Иисус лиссь венчста, Сон няйсь лама ломань. Тейнза ужялькс арасть синь, сяс мес синь ульсть кода учат, конатнень аш ванысна. Тяфта Сон кармась ламонди тонафтомост.

³⁵ Шись валгома лангсоль, сяс Иисусонь тонафниенза мольсть ваксозонза и мярьгсть: «Вастсь тяса шава, а пингсь лама ни.

³⁶ Нолдайть ломаттнень, катк молихть маластонь ошненди-веленятненди и мезевок рамайхть эстейст ярхцамс».

³⁷ Но Иисус каршезост мярьгсь: «Тинь максода тейст ярхцамс». Синь мярьгсть Тейнза: «Кали тейнек молемс кафта сятт динариень питне лангс кшинь рамама и андомс синь?»

³⁸ Сон кизефтезень: «Мзяра кшидонт? Арда ваность». Синь ванозь мзяра кшидост, и мярьгсть: «Минь вете кшиньке и кафта калоньке».

³⁹ Иисус мярьгсь озафнемс сембе ломаттнень пижелды нарнять лангс.

⁴⁰ И озасть кочкафкаста марса, сядонь и ведьгемонень ломань.

⁴¹ Иисус сявозень вете кшитнень и кафта калхнень, кеподезень сельмонзон менели и бславазень. Сон синнезень кшитнень и максозень тонафниензонды, сят явондозь ломаттненди. Станяк сембонди явондозень кафта калхненьге.

⁴² Сембе ярхцасть и топодсть.

⁴³ Сяльде тонафнихне кочкасть кемгафтува кептерь лятф сускомда и кал пакшта.

⁴⁴ А ярхцайда ульсь ветешка тёжянь аля.

Иисус моли ведть ланга

⁴⁵ Тяда меле Иисус мярьгсь тонафниензонды озамс венчти и Сондедонза инголи ётамс эрьхкть тона пяли, Вифсаидав, а Сонць мзярс ляды тозк ломаттнень нолдама.

⁴⁶ Мзярда ломаттне тусть, Сон куцсь панда пряс озондома.

⁴⁷ Сась илядьсь, венчсь пачкодсь эрьхкть кучкас, а Иисус тя ёткть ськамонза ащесь эрьхкть трваса.

⁴⁸ Сон няезе, тонафниензонды стака миледемс, сяс мес уфась карша варма. И варьхмодемшовор Сон маладсь тейст ведть ланга молезь. Сонь мялецоль ётамс вакскаст.

⁴⁹ Мзярда тонафниенза няезь, кода Сон моли ведьга, арьсесть – тя шопача и кармасть пешкодома,

⁵⁰ сяс мес сембе Сонь няезь и пяк эводсть. Но Иисус эстокиге ушедсь мархтост корхтама: «Сетьмода! Тя Монан. Тяда пеле».

⁵¹ Сон озась ёткозост венчти, и вармась лоткась. Синь пяк дивандазевсть,

⁵² сяс мес сявок, мезе лиссь кшитнень мархта, ашезь шарьхкодев тейст, сяшкава калготт ульсть синь седисна.

Иисус пчкафни сярядихть Геннисаретонь масторса

⁵³ Синь ётасть эрьхкть туркс, пачкодсть Геннисаретонь масторс и венчсна токась эрьхке трвати.

⁵⁴ Мзярда синь валгсть венчста, ломаттне эстокиге содазь Иисусонь.

⁵⁵ Синь ласькондезь сембе ся аймакть и ушедсть ацамнек каннема сярядихть тов, коса маряфнезь Иисусонь улеманц.

⁵⁶ И ков Сон ашезь сашенда – велес али ошс али аф оцю веленяс – ломаттне лихнезь сярядихнень мишендема-рамсема васттненди. Синь эняльдсть Иисусти максомс сярядихненди токамс хуш щам пенянцты. И сембе, кит токафнезь кядьснон Иисусти, пчксесть.