Марк 5 - Од Соткс Новый Завет на мордовском-мокша языке 2016

Иисус панцы аф ару ваймопожфть ломанть потмоста

¹ Синь ётасть эрьхкть омбокс Гадарина мастору.

² Мзярда Иисус лиссь венчста, каршезонза калмонь кевботмарста лиссь ломань, конань потмос сувафоль аф ару ваймопожф.

³ Тя ломанць эрясь калмонь кевботмарса, нльне цинзерсовок киндинге ни ашезь кирдев.

⁴ Мзярксть ашезь сотнекшне кядензон-пильгонзон цинзерса, сон эрь мезня тапсезень-сязендезень синь. И киндинге сон ашезь сетьмофтов.

⁵ Шинек-венек сон калмотнень и панттнень ланга юватькшнесь пиже вайгяльса и шавсь пря кефненди.

⁶ Мзярда тя ломанць ичкозде няезе Иисусонь, сон ласьксь Тейнза, комась пильгозонза

⁷ и оцю вайгяльхть пешкодозь, мярьгсь: «Мезе Тейть эздон эряви, Иисус, Инь Вярдень Шкайть Цёрац? Эняльдян Шкайть лемса, тямак маятафта!»

⁸ Иисус вдь мярьгсь тейнза: «Листь тя ломанть эзда, аф ару ваймопожф!»

⁹ Иисус кизефтезе сонь: «Кода лемце?» Ся азозе: «Монь лемозе – Легион, сяс мес эздонк, аф ару ваймопожфта, ламодонга лама».

¹⁰ И кармасть аф ару ваймопожфне эняльдема Иисусти, афолезень панце синь ся масторста.

¹¹ Ся пингоня панда лангса ванцть пяк лама тува.

¹² Аф ару ваймопожфне эняльдсть Тейнза: «Мярьк тейнек сувамда ня тувотнень потмос».

¹³ Иисус мярьгсь, и аф ару ваймопожфне лиссть ся ломанть эзда и сувасть тувотнень потмос. Сембе тувотне – эздост кафтошка тёжянель – пандста ёрдасть пря инголи, комотсть эрьхкти и ваясть.

¹⁴ Тувонь ваныхне ворьгодсть тоста и азондозь ошса и маластонь веленятнень эзга, мезе лиссь. Ломаттне састь ванома, мезе ина тиевсь.

¹⁵ Синь мольсть Иисусонь малас и няезь: ся, конань эса ульсть кяжи ваймопожфне, тяни щаф и ащи шумбра ёньца – сяка ломанць, конань потмоса ульсь ламодонга лама кяжи ваймопожфта. Ломаттне эводсть.

¹⁶ Эсь сельмосост няихне азондозь тейст сянь, мезе тиевсь тувотнень мархта и кяжи ваймопожфса колаф ломанть мархта.

¹⁷ Эста эвотьф ломаттне кармасть эняльдема Иисусти: катк Сон туй ширдест.

¹⁸ Мзярда Иисус кармась озама венчти, ся ломанць, конань потмоц аруясь аф ару ваймопожфнень эзда, вешсь пря молемс Сонь мархтонза.

¹⁹ Но Иисус ашезе сяве сонь, а кошардозе: «Архт куду эсетненди, азонтк тейст сянь, мезе тись тейть Азорсь и кода Сон кельгозь ужяльдензе тонь».

²⁰ Сон тусь и ся вастова, конань лемоцоль Кемонь Ошт, кармась азонкшнема ломаттненди, мезе мархтонза тись Иисус. Сембе дивандакшнесть.

Иисус вельмафтсы кулофста синагогань оцюнять стиренц и пчкафтсы сяряди авать

²¹ Мзярда Иисус венчса сась меки эрьхкть омба трвас, перьфканза пуромсь лама ломань. Сон ащесь эрьхкть трваса.

²² Тов сась синагогань оцюнятнень эзда фкясь, лемоц Иаир. Иисусонь няемста сон прась пильгозонза

²³ и кармась пяк эняльдема: «Стирнязе кулома лангса. Сак путыть лангозонза кяттнень: пчкафтолить и кадолить сонь эряма».

²⁴ Иисус тусь мархтонза. Перьфканза мольсь пяк лама ломань, и синь сембе пяльде эцесть Сонь малазонза.

²⁵ Тоса ульсь фкя ава, кона кемгафтува киза сярядсь веронь шудемаса.

²⁶ Сон лама маятась ламоц пчкафтыень эзда, ётафтозе лангозост сембе уликсонц, а эздост кодамовок лезкс ашель, меколанкт, прянц марязе нинге сяда стакаста.

²⁷ Авась кулендсь Иисусонь колга, сяс фталга ётась ломаттнень ёткова Иисусти и токафтозе кяденц Сонь щамонцты.

²⁸ Авась арьсесь: «Токафтондяряса кядезень щамонцты, пчкан».

²⁹ Сяка ёткть веронь шудемац лоткась, и сон марнек ронгсонза марязе – пчкясь.

³⁰ Иисус эстокиге марязе: эздонза лиссь вий. Сон ломаттнень ёткса шарфтсь фталу и кизефтезе: «Кие токафнезе щамненди кяденц?»

³¹ Тонафниенза мярьгсть Тейнза: «Тонць няйсак, мзяра ломань сембе пяльде люпштай эсот, и кизефнят, кие токанзе Тонь!»

³² Но Иисус нинге ванондсь перьфпяльге, вешендезе сянь, кие тянь тиезе.

³³ Эста авась, шарьхкодемок, мезе мархтонза тиевсь, пелемать эзда трнатозь шаштсь Иисусть малас, прась инголенза и азондозе Тейнза сембе видеть.

³⁴ Иисус мярьгсь тейнза: «Стирняй, кемамаце пчкафтонзе тонь. Архт сетьмошиса и ульхть шумбра сярядемацень эзда».

³⁵ Мзярда Иисус нинге корхтась, састь синагогань оцюнять кудста кулянь азома: «Стирце кулось. Мезенди нинге томошиндасак Тонафтыть?»

³⁶ Иисус кулезе, мезе синь корхтасть, мярьгсь синагогань оцюняти: «Тят пеле. Аньцек кемак!»

³⁷ Сон киндинге ашезь мярьге мельганза молемда, аньцек сявозень мархтонза Пёторонь, Иаковонь и сонь брадонц Иоаннонь.

³⁸ Мзярда синь сувасть синагогань оцюнять пяли, Иисус няйсь абонтф, кайгиста аварди и явси ломатть.

³⁹ Сон мярьгсь тейст: «Мезенкса тяшкава ризнатада и аварттяда? Стирнясь ашезь кула, сон уды».

⁴⁰ Иисусонь лангса кармасть пеетькшнема. Но Сон мярьгсь сембонди лисемда, а Сонць стирнять тядянзон-алянзон и колма тонафниензон мархта сувась кудбяльксти, косоль стирнясь.

⁴¹ Сон сявозе стирнять кядьта и мярьгсь тейнза: «Талифа́ куми́!» Тя ётафтови: «Стирня, мярьган тейть: стяк!»

⁴² Стирнясь эстокиге стясь и кармась якама; тейнза ульсь кемгафтува киза. Тянь няиенза пяк дивандазевсть.

⁴³ Иисус кемоста мярьгсь: киндинге аф азонкшнемс тянь колга и кошардозень максомс стирняти кодамовок ярхцамбяль.