Марк 2 - Од Соткс Новый Завет на мордовском-мокша языке 2016

Иисус пчкафтсы параличса колафть

¹ Мзярошка шинь ётазь Иисус мрдась Капернауму; и ошть келес срадсь куля: Сон кудса.

² Эстокиге пуромсь сняра ломань, нльне кенкшнень вакссовок ашель васта, и Иисус азондсь тейст Пара куля.

³ И састь Тейнза ниле алят, конат кандсть параличса колаф ломань.

⁴ Но синь ашесть ётав Иисусть малас, сяс мес перьфканза пуромсь пяк лама ломань. Эста синь куцсть кудбряв, калафтозь кудбрять ся вастста, коса ащесь Иисус, тисть варя и эзганза, ацамнек, алу нолдазь параличса колафть.

⁵ Мзярда Иисус няезе синь кемамаснон, Сон мярьгсь параличса колафти: «Цёрай, тонь пежетне нолдафт».

⁶ Тоса озафоль мзярошка койти тонафтыда. Синь арьсесть эсь пачкаст:

⁷ «Мес тя Ломанць тяфтане корхтай? Сон рахси Шкайть лангса! Кие машты пежень нолдама Шкайда башка?»

⁸ Иисус Эсь ваймосонза эстокиге шарьхкодезень синь арьсемаснон, мярьгсь тейст: «Мес тяфта арьсетяда эсь седисонт?

⁹ Мезсь сяда тёждя, мярьгомс параличса колафти: "Тонь пежетне нолдафт" али "Стяк, сявк эсь ацамцень и якак"?

¹⁰ Но тяни содасть: Ломанень Цёрать модать лангса ули азорксшиц нолямс пежет», – и Сон пшкядсь параличса колафти:

¹¹ «Корхтан тейть: стяк, сявк ацамцень и архт эсь кудозт».

¹² Ся эстокиге стясь, сявозе ацамонц и лиссь ушу сембонь ингольде. Сембе дивандасть тянди и шназь Шкайть. Синь корхтасть: «Минь мзярдонга мезевок тяфтама ашеме няенде!»

Иисус тердьсы Левиень

¹³ Иисус тага лиссь эрьхкть трвас. Сембе ломаттне мольсть Тейнза и Сон тонафтсь эсост.

¹⁴ Ётамбачк Иисус няезе Левиень, Алфеень цёранц, кона озафоль каяфксонь кочкама вастть ваксса. Мярьгсь тейнза: «Мольхть Монь мельган!» Ся стясь и тусь мельганза.

¹⁵ Сяльде Иисус ярхцась Левиень пяле. Шрать ваксса Иисусонь и Сонь тонафниензон мархта ульсь лама каяфксонь кочкайда и пежуда: вдь нятнень эзда ламотне мольсть Иисусонь мельге.

¹⁶ Иисус ярхцась пежуфнень и каяфксонь кочкайхнень мархта. Мзярда фарисейхнень ёткста койти тонафтыхне няезь тянь, синь мярьгсть тонафниензонды: «Кода стане Сон ярхцай каяфксонь кочкайхнень и лия пежуфнень мархта?»

¹⁷ Иисус марязе тянь и мярьгсь тейст: «Пчкафтысь эряви аф шумбрати, а сярядити. Мон сань пежуфнень Шкайти шарфтоманкса, а аф видексшиса эряйхнень».

Кизефкс постонь кирдемать колга

¹⁸ Иоаннонь и фарисейхнень тонафнисна поставасть. Иисусонди сась мзярошка ломань, мярьгсть: «Мес Иоаннонь и фарисейхнень тонафнисна поставайхть, а Тоннетне аф?»

¹⁹ Иисус мярьгсь тейст: «Кали кармайхть поставама рьвяяма илань инжихне, мзярс рьвяяйсь мархтост? Мзярда рьвяяйсь мархтост, тейст аш кода поставамс.

²⁰ Но сайхть шит, мзярда рьвяяйть сявсазь ёткстост, вов эста синь кармайхть поставама.

²¹ Кивок аф панни ташта щамти од щамста сязьф панкс; сяс мес од панкссь озай и варясь сядонга келеми.

²² Кивок аф кайси од вина кедень ташта кяскавс, сяс мес од винась сязьсы ташта кяскавть; винаське шуди, кяскавське юмай. Од винась кайсема од кяскавс».

Ломанень Цёрась ваймамань шить лангса азор

²³ Ваймамань шиста Иисус ётась сёронь паксять пачк. Молембачк Сонь тонафниенза кармасть сёрапрянь сязендема.

²⁴ Фарисейхне мярьгсть Тейнза: «Ватт, месендихть! Ваймамань шиста, койть коряс, тянь тиендемс аф мярьгондеви».

²⁵ Но Сон каршезост мярьгсь: «Дяряй тинь мзярдовок ашесть лувонда, мезе тись Давид, мзярда сон и мархтонзотне вачедотольхть и ашель ярхцамбяльсна?

²⁶ Авиафар озксвятиень оцюнять пингста Давид сувась Шкаень куду и ярхцась Шкайти кантф кшида, конатнень эзда озксвятида башка, киндинге ашезь мярьгондев ярхцамс. Давид макссь сятнендиге, кит ульсть мархтонза».

²⁷ Иисус мярьгсь тейст: «Ваймамань шись тифоль ломанти, а аф ломанць ваймамань шити.

²⁸ Сяс Ломанень Цёрась ваймамань шить лангсонга азор».