Марк 14 - Од Соткс Новый Завет на мордовском-мокша языке 2016

Евреень озксвятихне арьсихть, кода шавомс Иисусонь

¹ Кафта шида меле улемаль евреень Очижити и аф шапама кшинь илати. Озксвятиень оцюнятне и койти тонафтыхне вешендсть, кода васькафтозь кундамс Иисусонь и шавомс Сонь.

² Но синь корхтасть: «Аньцек аф илашиня, афольхть кеподе тянкса ломаттне».

Иисусть танцти шине вайса вадемац

³ Мзярда Иисус ащесь Вифанияса ся Симонть шранц ваксса, кона инголи сярядсь наксафты урмаса, каваняма ёткть сувась тоза ава. Сон кандсь мархтонза алебастрань кядьгоняса нардста тиф пяк питни вай. Авась колазе кядьгонять и каязе вайть Иисусонь пряванза.

⁴ А конат-конат сафтозь кяжснон и эсь ётковаст корхтасть: «Мезенди стак ётафнемс тяфтама вайть?

⁵ Сяда пара улель мимс сонь и сявомс инксонза колмосятта лама динарий, и ярмакнень явомс ашуфненди». И синь сюцезь авать.

⁶ Но Иисус мярьгсь: «Кадость сонь; мезенди кольфнесасть мяленц? Сон пара тев тись Тейне.

⁷ Вдь ашуфне фалу кармайхть мархтонт, и тейнть тиеви тейст пара, мзярда мяленте, а Мон улян мархтонт аф фалу.

⁸ Сон тиезе сянь, мезе тейнза тиевсь. Ронгозень инголькиге вадендезе, тяфта анокламань калмамс.

⁹ Видеста корхтан тейнть: сембе масторть келеса, коса азондсазь тя Пара кулять, тоса лятфтасазь аватьке и сянь, мезе сон тись».

Иуда срхкась мимс Иисусонь

¹⁰ Эста Иуда Искариот, кемгафтувотнень эзда фкясь, тусь озксвятиень оцюнятненди Иисусть мимонза.

¹¹ Сят кенярдсть тянь марямста и надияфтсть Иуданди пандомс ярмак. И Иуда учсесь пинге, кона ёткть мимс тейст Иисусонь.

Очижинь илядень ярхцамась

¹² Аф шапама кшинь илать васенце шистонза, мзярда печксельхть очижинь вероскя, Иисусонь тонафниенза корхтайхть Тейнза: «Коса мяльце ярхцамс очижинь вероскада? Мярьк, минь мольхтяма и аноклатама».

¹³ Сон кучезень тонафниензон ёткста кафттнень и корхтай тейст: «Арда ошу; и няйхтяда аля, кона канды ведь кукшень. Моледа мельганза,

¹⁴ и ков ся ломанць сувай, мярьгода кудазорти: "Тонафтысь кизефнесы, коса кудбялькссь, конаса Сон ярхцаль очижинь вероскада тонафниензон мархта".

¹⁵ Ся кудазорсь няфти оцю вярце кудбялькс, кона ули ацаф и урядаф; тоса аноклада тейнек ярхцамс».

¹⁶ Тонафниенза тусть и састь ошу. Сембось тиевсь стане, кода мярьгсь тейст Иисус, и синь аноклазь очижинь ярхцамать.

¹⁷ Илять Иисус сась тов кемгафтувотнень мархта.

¹⁸ Мзярда синь озасть ярхцама, Иисус мярьгсь: «Видеста корхтан тейнть, ёткстонт фкясь, мархтон ярхцайсь, мисамань Монь».

¹⁹ Синь ризназевсть и кармасть фкя-фкянь мельге Тейнза корхтама: «Тя аф монан?» и омбоцесь: «Тя аф монан?»

²⁰ Иисус каршезост мярьгсь: «Ёткстонт, кемгафтувотнень эзда фкясь, ся, кона навсесы мархтон фкя шаваняс кшинц.

²¹ Ломанень Цёрась моли стане, кода сёрматф колганза, но вай, кодань кальдяв ули ся ломанти, кона мисы Ломанень Цёрать! Сяда пара улель, кда ся ломанць афи шачель».

²² Мзярда синь ярхцасть, Иисус сявозе кшить, бславазе, синдезе, максозе тейст и мярьгсь: «Сявость и ярхцада, тя Монь ронгозе».

²³ Сяльде сявозе кядьготь, азсь сюконяма Шкайти, венептезе тейст, и сембе симсть эздонза.

²⁴ И Сон мярьгсь тейст: «Тя Монь верозе, од сотксонь вер, кона валови сембе ломаттнень инкса.

²⁵ Видеста корхтан тейнть: Мон ни аф симан виноградонь винада ся шить самс, мзярда Мон симан од винада Шкаень Оцязорксшиса».

²⁶ Шкайти шнама моронь морамда меле синь тусть Вайшуфта пандть лангс.

Иисус инголькиге азонды Пёторонь потаманц колга

²⁷ Тоса Иисус корхтай тейст: «Тя веня тинь сембе потатада Монь эздон, вдь сёрматф: "Шавса учань ваныть и учатне срадыхть".

²⁸ Но вельмамдон меле Мон тиндедонт инголи молян Галилеяв».

²⁹ Пётр мярьгсь каршезонза: «Катк хуш сембе потайхть эздот, мон тянь аф тиса».

³⁰ Иисус корхтай тейнза: «Видеста корхтан тейть: тячи, тя веня, атёкшсь омбоцеда аф кенери моразевомс, кода тон колмоксть потат Монь эздон».

³¹ Но Пётр нинге сяда псиста корхтась: «Кда тейне саволь мархтот куломс, эстовок афолень пота эздот». Сякоть корхтазь сембе.

Иисус озонды Гефсиманиянь переса

³² Састь ся вастти, кона лемневи Гефсимания. Иисус мярьгсь тонафниензонды: «Ащеда тязк, мзярс Мон озондан».

³³ Сявозень мархтонза Пёторонь, Иаковонь и Иоаннонь; и Сонь фатязе пелемась и тошнась.

³⁴ Мярьгсь тейст: «Куломшка ризнай ваймозе. Ащеда тяса и тяда уда».

³⁵ Иисус аердсь аф ламода шири, прась модать лангс и озондсь тянкса: кда ули кода, ётаза ваксканза тя пингсь.

³⁶ Сон корхтась: «Авва, Аляй! Тейть сембось тиеви; ётафтк вакскан тя кядьготь; аньцек улеза аф Монь мялезень коряс, а кода Тонь мяльце».

³⁷ Иисус мрдась меки и сатозень синь удозь. Корхтай Пёторонди: «Симон! Тон удат? Тон фкя част ашеть кирдев апак удок?

³⁸ Тяда уда, озондода: варчсемстонт афоледе пра пежес. Ваймось анок паронь тиемс, а ронгсь лафча».

³⁹ Иисус тага аердсь, озондсь, азозень сяка валхнень.

⁴⁰ Меки мрдамстонза тага сатозень синь удозь, сяс мес сельмосна коневсть, и синь ашезь сода, мезе азомс Иисусонь каршес.

⁴¹ Колмоцеда самдонза меле Иисус корхтай тейст: «Тинь нинге удотада и ваймосетяда? Саты утцемс! Сась пингсь: вага, Ломанень Цёрась максови пежуфнень кядьс.

⁴² Стяда, аряда! Вага, Монь миизе маладсь».

Иисусонь кундамац

⁴³ Эстокиге, мзярда Иисус нинге корхтась, сась тоза Иуда, кемгафтувотнень эзда фкясь. Сонь мархтонза сась тор и пяль мархта лама ломань, конатнень кучезь озксвятиень оцюнятне, койти тонафтыхне и ломаньтналонь оцюнятне.

⁴⁴ Иуда инголькиге ладязе мархтост, кода тейст содамс Иисусонь: «Кинь паласа, ся Сон, сявость Сонь и вятесть, лацкас кирдесть».

⁴⁵ Иуда сась, эстокиге маладсь Иисусонди и мярьгсь: «Тонафты!», и палазе Сонь.

⁴⁶ Эста тюрембяль мархтотне фатязь Иисусонь и сявозь Сонь.

⁴⁷ Тоса ащихнень эзда фкясь таргазе торонц, эрьхтезе озксвятиень оцюнять покодиенц и керозе сянь пиленц.

⁴⁸ Эста Иисус мярьгсь тейст: «Тинь саде Монь сявомс торса и пяльса, кода нельги-шави ломанень мельге!

⁴⁹ Эрь шиня Мон улендень мархтонт Шкаень кудса и тонафтонь, и тинь ашемасть сявонде. Но Сёрматфксонь валхненди эряви пяшкодемс».

⁵⁰ Эста сембе тонафниенза кадозь Сонь и ворьгодсть.

⁵¹ Фкя од ломань, конань лангс ашкотфоль аньцек иляназонь котф, мольсь Иисусонь мельге. Соньге кундазь,

⁵² но сон ёрдазе лангстонза котфть и крхтапа тусь ласькозь эздост.

Иисус Оцю пуромксть инголе

⁵³ Иисусонь вятезь озксвятиень оцюняти; и тов кочкавсть сембе озксвятиень оцюнятне, ломаньтналонь оцюнятне и койти тонафтыхне.

⁵⁴ Пётр ичкозьге мольсь Иисусонь мельге, нльне сувась озксвятиень оцюнять пирьфс; озась тоса Шкаень кудть ванфтыензон ёткс, и эжендсь толмарть ваксса.

⁵⁵ Озксвятиень оцюнятне и сембе Оцю пуромкссь вешендсть няфтемат Иисусонь каршес. Тяфта улель туфталсна максомс Сонь куломас, но стама туфталхт синь ашесть мушенда.

⁵⁶ Лама няида-кулида васькафнезь корхтась Иисусонь лангс, но синь няфтемасна мольсть карань-каршек.

⁵⁷ Конат-конат стясть и васькафнезь корхтасть лангозонза:

⁵⁸ «Минь кулеськ, кода Сон корхтась: "Мон срафтса тя Шкаень кудть, кона тиф ломанень кядьса, и колма шиста путан лия, аф ломанень кядьса тиф"».

⁵⁹ Но тяфтамовок няфтемасна карань-каршектольхть.

⁶⁰ Эста озксвятиень оцюнясь лиссь кучкати и кизефтезе Иисусонь: «Мес мезевок аф корхтат? Тейть аш мезе азомс синь няфтемаснон каршес?»

⁶¹ Но Иисус кашт изь моле и каршезост мезевок ашезь аза. Озксвятиень оцюнясь тага кизефтезе Сонь: «Тон Христоссят, Бславафть Цёрацат?»

⁶² Иисус мярьгсь: «Тя Монан; и тинь карматада няемонза Ломанень Цёрать, кона ащи озада Виить види кядь ширесонза и кона сай менелень коволхнень лангса».

⁶³ Эста озксвятиень оцюнясь сязезе эсь щамонц, мярьгсь: «Мезенди нинге тейнек эрявихть няихне-кулихне?

⁶⁴ Тинь кулесть кода Сон сялдсы Шкайть; мезе тинь астада?» И сембе синь мярьгсть максомс Иисусонь куломас.

⁶⁵ Кона-кона ломаттне кармасть лангозонза сельгондема, и сотнемок сельмонзон, эрьхнезь Сонь и корхтасть: «Пророчендак!» Ванфтыхневок эрьхнезь шама ланга.

Пётр потай Иисусонь эзда

⁶⁶ Пётр учсесь алува, пирьфса. Тоза сась озксвятиень оцюнять лангс покоди ава.

⁶⁷ Сон, няемок Пёторонь, кона эжендсь тоса, оржаста ванць лангозонза и мярьгсь: «Тонга улеть Назаретонь ломанть, Иисусть мархта».

⁶⁸ Но Пётр сёпозь мярьгсь: «Аф содаса и аф шарьхкодьса, мезе тон корхтат», и лиссь тоста ингольце пирьфти; и моразевсь атёкшсь.

⁶⁹ Покоди авась тага няезе сонь, кармась тоса ащихненди корхтама: «Тя синь ёткстост».

⁷⁰ Пётр тага сёпсь пря. Аф лама пингта меле тостотне тага кармасть корхтама Пёторонди: «Тон афкукс синь ёткстост. Тон вдь Галилеянь эряят и корхтамацевок тостонне».

⁷¹ Но сон кармась варама Шкайть лемонц кунцезь: «Аф содаса Ся Ломанть, конань колга корхтатада».

⁷² Эста атёкшсь моразевсь омбоцеда. И Пёторонь мяльс лядсть Иисусонь валонза: «Атёкшсь омбоцеда аф кенери моразевомс, кода тон колмоксть потат Монь эздон». И аварьгодсь.