Марк 13 - Од Соткс Новый Завет на мордовском-мокша языке 2016

Иисус аноконди азонды Шкаень кудть срафтоманц колга

¹ Мзярда Иисус лиссь Шкаень кудста, тонафниензон эзда фкясь корхтай Тейнза: «Тонафты! Ватт, кодапт кефне, кодапт куттне!»

² Иисус мярьгсь каршезонза: «Няйсайть ня пяк оцю куттнень? Сембось тя калафтови, тяса кев лангса кевга аф ляды».

Мекольдень пинкнень тяштьксна

³ Мзярда Иисус ащесь озада Вайшуфта пандть лангса Шкаень кудть каршеса, эста Пётр, Иаков, Иоанн и Андрей лия тонафниензон эзда башка кизефнезь Сонь:

⁴ «Азк тейнек, мзярда тя ули, и кодама тяштьксонь коряс няеви, мзярда сембось тя тиеви?»

⁵ Иисус каршезост корхтась: «Ванфтость прянтень, кивок афоледязь васькафта-эрьготьфта;

⁶ сяс мес ламотне сайхть Монь лемозень ала и кармайхть корхтама эсь колгаст: "Тя Монан", и ламотнень васькафтсазь-эрьготьфтсазь.

⁷ А мзярда марятада тюремань зярьфт и тюремань колга кулят, тяда эводе, сяс мес тянди улема; но тя нинге аф песь.

⁸ Ломаньтналсь кеподи ломаньтнал лангс, фкя масторсь омбоцеть лангс; васток-васток улихть модашерьхкомат и сайхть вачашит. Тя ули кода шачфтомъётконь маятаматнень ушеткссна.

⁹ Но ванфтода пря; тинь кармайхть макссемонт судс и пикссемонт синагогаса, и арафттядязь оцюнятнень и оцязорхнень инголи Монь лемозень инкса: азондоледе тейст Монь колган.

¹⁰ Но тяда инголе сембе ломаньтналхненди эряви азондомс Пара кулясь.

¹¹ Мзярда ина вяттядязь тинь судс, инголькиге тяда пичедь, мезе тейнть корхтамс. Мезе ули максф тейнть ся пингоня, сянь и корхтасть: сяс мес аф тинь карматада корхтама, а Иняру Ваймопожфсь.

¹² Брадсь макссы брадонц куломас, и алясь – идензон; и кеподихть иттне тядяснон-аляснон каршес и кулофтсазь синь.

¹³ Монь лемозень инкса кивок аф кармай кельгомонт; но кие кирди петь самс, ся идеви».

Оцюдонга оцю ризфсь

¹⁴ «Мзярда ина тинь няйсасть гастямань-каладомань нулготьксть, конань колга корхтась Даниил пророксь, ащикс тоса, коса тейнза афолемаль уле, – лувись катк шарьхкодьсы, – эста Иудеяста сембе ворьгодест панттненди.

¹⁵ Кие кудбряса, ся тяза валгонда куду и тяза сувсе кудозонза мезеньге сявондема;

¹⁶ а кие паксяса, ся тяза мрда меки эсь щамонзон инкса.

¹⁷ Вай, конашкава стака ули ся шитнень пекихненди и идень потяфтыхненди!

¹⁸ Озондода, афоль уле ворьгодеманте тялонда.

¹⁹ Ся шитне пяшкодихть сяшка ризфса, кодама ашель ушетксста сявомок, мзярда Шкайсь тиезень менельть и масторть, и тячиень шить самс, и афи кармай улема.

²⁰ Кда Азорсь афолезень кирьфта ся шитнень, эста кивок афоль идев; но ломаттнень инкса, конатнень Сон кочказень, кирьфтазе ся пингть.

²¹ Эста, кда кие тейнть мярьги: "Вага, тяса Христоссь" али "Вона, тоса", – тяда кема.

²² Сяс мес сайхть аф афкуксонь христост и аф афкуксонь пророкт, конат кармайхть тиендема тяштькст и дивань тефт кочкафнень васькафтоманкса, кда васькафтовольхть.

²³ Сяс ванфтода пря. Вага, Мон аноконди азондыне тейнть семботь».

Ломанень Цёрать самац

²⁴ «Но ся шитнень, ся ризфта меле, ши валдсь шобдалгоды, ковське аф кармай валдоптома,

²⁵ тяшттневок прайхть менельста, шерьхкозевихть менелень вийхневок.

²⁶ Эста няйсазь Ломанень Цёрать инь оцю вийсонза и иневалдсонза коволхнень лангса саманц.

²⁷ Эста Сон кучсыне Эсь ангелонзон и кочкафтсыне масторть нилецьке ширденза Эсь кочкафонзон, модать песта менельть пес.

²⁸ Кепотьксонди сявость смоква шуфтть: мзярда тарадонза путькияйхть и нолдайхть лопат, эста содасасть: кизось маласа.

²⁹ Стане тясовок: мзярда тинь няйсасть, сембось тя пяшкоди, содасть: тя пингсь маласа, кенкшть лангса.

³⁰ Видеста корхтан тейнть: тяниень пингонь эряйхне аф кенерихть юмамс, кода сембось тя ули.

³¹ Менельсь и модась юмайхть, но Монь валне аф юмайхть».

Уледа анокт

³² «А мзярда сай ся шись али пингсь, кивок аф содасы, аф менелень ангелхне, аф Цёрась, но аньцек Алясь содасы.

³³ Ванода, уледа фалу анокт и озондода, сяс мес аф содасасть, мзярда сай ся пингсь.

³⁴ Тя сянь лаца: мзярда ломанць оцю кис тумстонза и кудонц кадомстонза, макссь эсь покодиензонды азорксши и эрти эздост тев, и орта ваныти мярьгсь ваномда и улемс анококс.

³⁵ Тяконь лаца тиньге уледа анокт; сяс мес аф содасасть, мзярда сай кудазорсь, илять али пялевеста, атёкшнень морамста али шобдава пяли;

³⁶ апак учсек самстонза афоледязь сата тинь удозь.

³⁷ Ина мезе Мон корхтан тейнть, азса сембонди: уледа анокт!»