Марк 10 - Од Соткс Новый Завет на мордовском-мокша языке 2016

Кизефкс полада явомать колга

¹ Тоста Иисус тусь Иорданть фтала ащи Иудеянь мастору. Сонь перьфканза тага пуромсть ломатть; и, кода фалу, Сон тага тонафтсь эсост.

² Састь ваксозонза фарисейхть и, ёрамок кундамс Иисусонь валса, кизефтезь: «Койть коряс мярьгондеви мирдти кадомс рьванц али аф?»

³ Иисус каршезост мярьгсь: «Кодама кошардома макссь тейнть Моисей?»

⁴ Синь азозь: «Моисей ашезь карда сёрматкшнемс явомать колга кагод и кадомс рьваньконь».

⁵ Иисус каршезост мярьгсь: «Пяк калгода седиентень сюнеда сон сёрмадозе тейнть тя кошардомать;

⁶ а Шкайсь менельть-масторть тиемста ломанть тиезе алякс и авакс.

⁷ Сяс кадсы ломанць алянц мархта тядянц и педи эсь рьванцты,

⁸ и кафттне арайхть фкя ронгокс. Лисенди, синь эздост ни аф кафта, а фкя.

⁹ Стане, мезе Шкайсь сотсь марс, сянь ломанць тязазе явфне».

¹⁰ Кудса тонафниенза тага кизефнезь Иисусонь кядьста сякоть.

¹¹ Иисус мярьгсь тейст: «Кие яви рьванц мархта и сяви рьвакс лия ава, ся полафнесы поланц.

¹² И кда рьвясь яви мирденц мархта и лиянди лиси рьвакс, сявок полафнесы поланц».

Иисус бславасыне иттнень

¹³ Вятнесть-каннесть Иисусонди итть лангозост кяденц путфтома, но тонафниенза изь ноля Тейнза шабань вятихнень.

¹⁴ Тянь няемста Иисусонь састь кяженза и мярьгсь тейст: «Нолдасть шабатнень Тейне, тясть перя киснон, сяс мес тяфтамста ащи Шкаень Оцязорксшись.

¹⁵ Видеста корхтан тейнть: кие аф васьфтьсы Шкаень Оцязорксшить шаба лаца, ся аф сувави эзонза».

¹⁶ Иисус озафтозень иттнень элезонза, путозень лангозост кядензон и бславазень синь.

Козя ломань

¹⁷ Мзярда Иисус лиссь ки лангс, ласьксь Тейнза фкя ломань, прась инголенза плманжа лангс, и кизефтезе Сонь: «Цебярь тонафты! Мезе тейне эряви тиемс пефтома эряфонь сатоманкса?»

¹⁸ Иисус мярьгсь тейнза: «Мес тон лемнесамак Монь цебярькс? Аньцек Шкайсь ськамонза цебярь.

¹⁹ Тон вдь содасайть кошардомвалхнень: тят полафне пола; тят шавонда; тят сала; тят васькафне лиянь лангс; тят сявонде васькафнезь; ванк аляцень и тядяцень мяльснон».

²⁰ Козя алясь мярьгсь Иисусть каршес: «Тонафты! Семботь тянь ванфтыне нинге од пингстонкиге».

²¹ Иисус кельгозь варжакстсь лангозонза и мярьгсь: «Фкя тейть аф сатни: архт, мик марнек уликс-пароцень, и явк ярмакть ашуфненди, эста кармай улема козяшице менельса; сяльде сак, мольхть мельган».

²² Ся ломанць пяк козяль, сяс ня валхнень эзда сонь кольсь мялец, и тусь пичедезь.

²³ Иисус варжакстсь перьфпяльге, мярьгсь тонафниензонды: «Конашкава стака козя ломанти сувамс Шкаень Оцязорксшити!»

²⁴ Тонафниензон пяк дивандафтозь ня валонза. Но Иисус тага азозе тейст: «Идне! Конашкава стака козяшить лангс надияйхненди сувамс Шкаень Оцязорксшити!

²⁵ Пяк стака сувамс козя ломанти Шкаень Оцязорксшити, сяда тёждя ишимти ётамс салмокс пиленява».

²⁶ Тонафниенза нинге сяда пяк дивандазевсть и корхтасть эсь ётковаст: «Кие ина эста идеви?»

²⁷ Иисус варжакстсь лангозост и корхтай: «Ломаттненди тя аф тиеви, а Шкайти тиеви; сяс мес Шкайти сембось тиеви».

Мезе максови Иисусонь мельге молеманкса?

²⁸ Эста Пётр кармась корхтама Тейнза: «Вов минь сембоньконь кадоськ и туме мельгат».

²⁹ Иисус каршезонза мярьгсь: «Видеста корхтан тейнть: эрсь, кие кадсы кудонц, али брадонзон, али сазоронзон, али алянц, али тядянц, али рьванц, али идензон, али паксянзон Монь инксон и Пара кулять инкса,

³⁰ сянди тяниень эряфса панцематнень пингста максови сядонь крда лама кудта, брадта, сазорда, аляда-тядяда, идьта, паксяда, и сай пинкнень тейнза максови пефтома пингонь эряфсь.

³¹ Эста васенцетнень эзда ламотне арайхть мекольцекс, а мекольцетне васенцекс».

Иисус тага азонды Эсь куломанц колга

³² Мзярда синь ульсть ки лангса Иерусалиму, Иисус мольсь инголест, а тонафнихне таколдсть и мольсть Сонь мельганза пелезь. Иисус тердезень кемгафтувотнень, тага ушедсь тейст корхтама, мезе тиеви мархтонза:

³³ «Вов минь мольхтяма Иерусалиму, и Ломанень Цёрать макссазь озксвятиень оцюнятненди и койти тонафтыхненди, и сят судендасазь Сонь куломас и макссазь лия тналонь ломаттнень кядьс.

³⁴ Сят кармайхть рахсема лангсонза, сельгондьсазь, пикссесазь и шавсазь Сонь; и колмоце шиня Сон вельмай кулофста».

Иаковонь и Иоаннонь эняльдемасна

³⁵ Эста састь Иисусти Зеведеень цёранза Иаков и Иоанн, мярьгсть: «Тонафты! Тик тейнек сянь, мезе кядьстот анатама».

³⁶ Сон кизефтезень синь: «Мезе мяленте анамс кядьстон?»

³⁷ Синь азозь Иисусти: «Мзярда саят Эсь иневалдозт, мярьк тейнек озамда ваксозт, фкяти види ширесот, а омбоцети кержи ширесот».

³⁸ Иисус мярьгсть тейст: «Тинь аф содасасть, мезе анатада; симови-аф тейнть ризфонь ся кядьгось, конань Мон симса, кстиндафттада-аф ризфонь ся кстиндамаса, конаса Мон улян кстиндаф?»

³⁹ Синь мярьгсть каршезонза: «Тейнек тя тиеви». Эста Иисус азозе: «Ся кядьготь, конань Мон симса, симсасть, и ся кстиндамаса, конаса Мон улян кстиндаф, тиньге ульхтяда кстиндафтфт;

⁴⁰ но кинь озафтомс Монь види и кержи ширезон – ся аф Монь эздон ащи, ня васттне – сятненди, кинди синь аноклафт».

⁴¹ Тянь кулемста лия кемонь тонафниенза кармасть кяжияфнема Иаковонь и Иоаннонь лангс.

⁴² Но Иисус тердезень синь и мярьгсь: «Тинь содасасть: кит лувондовихть ломаньтналонь оцязоркс, сят азорондайхть лангсост и ломаньтналхнень оцюнясна кирдьсазь кядялост ломаньтналхнень.

⁴³ Но тинь ётксонт тяфта тяза уленде: а кинь мялец ётксонт арамс сяда оцюкс, ся араза лиянди покодикс;

⁴⁴ кинь мялец ётксонт арамс васенцекс, ся улеза сембонди урекс.

⁴⁵ Вдь Ломанень Цёраське сась аф Эсь лангозонза лиятнень покотьфтема, а лиятнень лангс покодемс и максомс Эсь ваймонц ламотнень идемаснон инкса».

Иисус пчкафтсы сокор Вартимей алять

⁴⁶ Састь Иерихону. Мзярда Иисус лиссь Иерихонцта Эсь тонафниензон и лия пяк лама ломань мархта, кить лангса ащесь Тимеень цёрац Вартимей, сокор анцись.

⁴⁷ Мзярда сон марязе: тя Назаретонь Иисуссь, кармась юватькшнема: «Иисус, Давидонь Цёрац! Ужяльдемак монь!»

⁴⁸ Ламотне карнезь сонь юватькшнемда; но сокорсь нинге сяда пяк пешкоткшнесь: «Давидонь Цёрац! Ужяльдемак монь!»

⁴⁹ Иисус лоткась и мярьгсь: «Тердесть сонь». Сокорть тердезь, корхтасть тейнза: «Тят пеле, стяк, терди эсот».

⁵⁰ Сон ёрдазе лангонь щамонц, комотсь вастстонза и сась Иисусти.

⁵¹ Иисус кизефтезе: «Мезе мяльце тифтемс кядьстон?» Сокорсь мярьгсь Тейнза: «Тонафты! Панжить сельмонень».

⁵² Иисус мярьгсь тейнза: «Архт, кемамаце пчкафтонзе тонь». Сон эстокиге кармась няема и тусь киге Иисусонь мельге.