Лука 9 - Од Соткс Новый Завет на мордовском-мокша языке 2016

Иисус кучсыне кемгафтува апостолхнень

¹ Иисус кочказень кемгафтувотнень и макссь тейст вий и азорксши панцемс кяжи ваймопожфнень и пчкафнемс урматнень.

² Сон кучезень синь ломаттненди Шкаень Оцязорксшить колга азондома и сярядиень пчкафтома.

³ Иисус мярьгсь тейст: «Мезевок тяда сявонде ки лангс, аф мандоня, аф канкс, аф кши, аф сиянь ярмак, аф омбонц щапт.

⁴ Кодама кудс суватада, тозк илядода ошста тумозонт.

⁵ А кда коса аф васьфтядязь, эста туда ся ошста и шукадесть пильгстонт пультьке ся ошть эзда. Катк тя ули тейст муворгофтомань тяштьксокс».

⁶ Тонафнихне тусть и якасть велетнень ланга, сембе вастова азонкшнезь Пара кулять и пчкафнезь сярядихнень.

Ирод кизефни Иисусонь колга

⁷ Кулезе Ирод оцюнясь мезе тиендсь Иисус, и абонкшнесь: сяс мес финцне корхнесть, кле, тя Иоанн вельмась кулофста;

⁸ омбонцне, кле, тя Илия эвондась, а конат корхнесть – вельмась кунардонь пророкнень эзда фкясь.

⁹ Ирод мярьгсь: «Иоаннонь прянц керфтыне; кие ина Ся, конань колга кулян тяфтама тефт?» Сонь мялецоль няемс Иисусонь.

Иисус анды вете тёжятть ломань

¹⁰ Мзярда апостолхне мрдасть, синь азондозь Иисусонди семботь, мезе тисть. Иисус сявозень синь Эсь мархтонза и тусь Вифсаида ошть ала сетьме вастс.

¹¹ Но ломаттне содамок тянь, тусть мельганза; Иисус васьфтезень синь пара мяльса, корхнесь Шкаень Оцязорксшить колга, и кит анасть пчкафтома – пчкафтозень.

¹² Шись мадома лангсоль. Тейнза маладсть кемгафтувотне и мярьгсть: «Нолдайть ломаттнень маластонь велева удома и эстейст ярхцамбялень сатома. Тяса минь шава вастсотама».

¹³ Но Иисус мярьгсь тейст: «Тинь максода тейст ярхцамс». Сят каршезонза: «Минь, вете кшида и кафта калда башка, мезеньковок аш. Дяряй тейнек молемс сембе ня ломаттненди ярхцамбялень рамама?»

¹⁴ Аляда тоса ульсь ветешка тёжянь. Иисус мярьгсь тонафнихненди озафтомс ломаттнень марс, ведьгемонень.

¹⁵ Тисть тяфта, озафнезь сембонь.

¹⁶ Иисус сявозень вете кшитнень и кафта калхнень, кеподезень сельмонзон менели, бславазень синь. Сон синнезень кшитнень и калхнень, максозень тонафнихненди, сят явондозь ломаттненди.

¹⁷ Сембе ярхцасть топодемс; и лятф сускомда кочкавсь кемгафтува кептерь.

Пётр лувсы Иисусонь Христоскс

¹⁸ Весть, мзярда Иисус озондсь сетьме вастса, и тонафниенза ульсть мархтонза, Сон кизефтезень: «Кикс лувсамазь ломаттне?»

¹⁹ Синь каршезонза мярьгсть: «Финцне – Иоанн Кстиндайкс, омбонцне – Илиякс, лиятне корхтайхть вельмась кунардонь пророкнень эзда фкясь».

²⁰ Сон кизефтезень синь: «А тинь кикс лувсамасть Монь?» Пётр каршезонза: «Тон – Шкайть эзда саф Христоссь».

²¹ Но Иисус кемоста кардазень тянь колга киндинге корхнемс.

²² Мярьгсь: «Ломанень Цёрати сави лама маятамс, аерфтсазь Сонь ломаньтналонь оцюнятне, озксвятиень оцюнятне и койти тонафтыхне, Сон ули шавф и колмоце шиня вельмай».

Иисус корхтай мельганза молемать колга

²³ Иисус мярьгсь сембонди: «Кинь мялец молемс Монь мельган, ся катк макссы эсь прянц Тейне, сявсы крёзонц и моли мельган.

²⁴ Сяс мес кие ёрай ванфтомс эряфонц, ся юмафтсы сонь. А кие юмафтсы эряфонц Монь инксон, ся ванфтсы сонь.

²⁵ Кодама лезкс ули ломанти, кда сявондярясы эстейнза сембе масторлангть, а эсь ваймонц юмафтсы-арафтсы али эсь прянц вятьсы кальдявс.

²⁶ Кие виздьсамань Монь и Монь валнень, сянь Ломанень Цёраське виздьсы, мзярда сай Эсь иневалдсонза, Алянц и Шкаень ангелхнень иневалдсост.

²⁷ Видеста корхтан тейнть: тяса ащихнень ёткса улихть стапт, конат нинге аф кенерихть куломс, кода ни няйсазь Шкаень Оцязорксшить».

Иисусонь лиякстомац

²⁸ Ня валхнень азомда меле кафксошка шинь ётазь, Сон сявозень мархтонза Пёторонь, Иоаннонь, Иаковонь и куцсь мархтост панда пряв озондома.

²⁹ Озондомста Сонь шамац лиякстомсь, щамоцка тиевсь пиндолды акшекс.

³⁰ Вов Сонь вакссонза эвондасть кафта алят, конат корхнесть Сонь мархтонза, нят ульсть Моисей и Илия.

³¹ Синь састь менелень иневалдса, и корхнесть Иисусонь эряфонц шумордаманц колга, конань Тейнза эряволь пяшкодемс Иерусалимса.

³² Пётр и сонь ялганза кемоста матодовсть, а сргоземстост няезь Иисусонь иневалдонц и кафта алятнень, конат ащесть мархтонза.

³³ Мзярда ня алятне срхкасть тумс Иисусонь ваксста, Пётр мярьгсь Тейнза: «Тонафты! Кодань пара тейнек тяса. Эрь тихтяма колма кошт: фкять Тейть, фкять Моисеенди и фкять Илиянди». Сон сонцьке ашезе сода, мезе корхтась.

³⁴ Сон валонцка ашезе адела, кода эвондась ковол и вельхтязень синь; тонафнихне эводсть, мзярда повсть коволть потмос.

³⁵ Коволста кулевсь вайгяль, кона корхтась: «Тя Монь кельгома Цёразе. Кулхцондость Сонь!»

³⁶ Тя вайгяльть сетьмомста Иисус меки лядсь ськамонза. Тонафниенза ванфтозь тянь потмосост и ся пингть киндинге ашесть азонда няйфснон колга.

Иисус панцы кяжи ваймопожфть цёранять потмоста

³⁷ Омбоце шиня, мзярда синь валгсть панда пряста, Иисусонь васьфтема лиссь лама ломань.

³⁸ Апак учт ломаттнень ёткста кати-кие пешкодсь: «Тонафты! Эняльдян, варжакстт цёразень лангс, сон монь тякось.

³⁹ Сонь кунцесы кяжи ваймопожфсь: шабась апак учт юватькшни, а ваймопожфсь стане калкфтсы, мянь шофт лихти кургстонза; и кадондсы аньцек мзярда шабась вийда машты.

⁴⁰ Мон энялькшнень Тонь тонафнихненди панемс ваймопожфть, и тейст ашезь панев».

⁴¹ Иисус каршезонза мярьгсь: «Вай, тяниень пингонь аф кемай и кольф ломатть! Мзярс Мон карман улема мархтонт и кирдемонт тинь! Вятьк сей цёрацень».

⁴² Цёранять нинге Тейнза молембачк прафтозе кяжи ваймопожфсь и кармась калкфтомонза; Иисус кардазе аф ару ваймопожфть, пчкафтозе цёранять и максозе алянцты.

⁴³ Сембе дивандасть Шкаень оцюшити. Ся пингть, мзярда сембе дивандакшнесть Иисусонь тифонцты, Сон мярьгсь Эсь тонафниензонды:

Иисус азонды Эсь куломанц колга

⁴⁴ «Кулхцондость и мяляфтость сянь, мезе азан: Ломанень Цёрась ули максф ломанень кядьс».

⁴⁵ Аньцек синь ашезь шарьхкоде азф валонзон смузьснон: сон кяшфоль эздост и ашезь шарьхкодев тейст; ина Иисусонь кизефтемс тянь колга пельсть.

Кие сембода оцю?

⁴⁶ Тонафнихне эсь ётковаст срхкафтсть пялькстома: кие эздост сембода оцю?

⁴⁷ Иисус содамок, мезень колга синь седиге арьсихть, сявсь идня, арафтозе ваксозонза.

⁴⁸ Мярьгсь тейст: «Кие сявсы тя идть Монь лемсон, ся Монь сявсамань; а кие Монь сявсамань, ся сявсы Монь Кучиезень; вдь кие эздонт инь ёмлась, ся ули сембода оцю».

Кие тейнть аф каршек, ся инксонт ащи

⁴⁹ Эста Иоанн мярьгсь: «Тонафты! Минь няеме ломань, кона Тонь лемсот панци кяжи ваймопожфт, аньцек минь кардаськ, сяс мес сон аф якай мархтонк».

⁵⁰ Иисус мярьгсь тейнза: «Тясть карне. Кие аф каршек тейнть, ся тинь инксонт».

Самариянь ломаттнень аш мяльсна нолдамс Иисусонь ширезост

⁵¹ Мзярда малаткшнесь Иисусонь менели сявома пингоц, Сон срхкась молемс Иерусалиму.

⁵² Эстедонза инголи Сон кучсь кулянь пачфтихть; сят тусть и сувасть Самариянь фкя велес Тейнза инь эрявиксть аноклама.

⁵³ Аньцек тостонь ломаттнень ашель мяльсна нолдамс Иисусонь ширезост, сяс мес содазь Сонь молеманц Иерусалиму.

⁵⁴ Тянь няемста Иаков и Иоанн тонафниенза мярьгсть: «Азор, мяльце, минь мярьктяма толти валгомс менельста и машфтомс синь, кода и Илия тиендсь?»

⁵⁵ Иисус шарфтсь тейст, кардазень и мярьгсь: «Тинь аф содасасть, кодама ваймопожфоннетяда;

⁵⁶ вдь Ломанень Цёрась сась аф машфтомс ломаттнень ваймоснон, а идемс». И синь тусть лия велес.

Иисусонь мельге молемать питнец

⁵⁷ Ки лангса фкя ломанць мярьгсь Иисусонди: «Азор! Мон молян мельгат, коза Тон афолеть моле».

⁵⁸ Иисус мярьгсь тейнза: «Келаснень улихть варясна, менелень нармоттнень – пизосна, а Ломанень Цёрати аш коза путомс пряц».

⁵⁹ Омбоцети мярьгсь: «Мольхть мельган». Ся каршезонза: «Азор! Нолдамак монь васенда куду алязень калмама».

⁶⁰ Иисус мярьгсь тейнза: «Катк кулофне калмосесазь эсь кулофснон, а тон архт и азонтт Шкаень Оцязорксшить колга».

⁶¹ Нинге фкясь мярьгсь Тейнза: «Азор, мон молян мархтот. Аньцек ожу, васенда молян куду и тумдон инголе азан маластонненди мекольцень валхт».

⁶² Иисус мярьгсь тейнза: «Ся, кие кундась сокати и ванонды фталу, Шкаень Оцязорксшити аф ладяй».