Лука 8 - Од Соткс Новый Завет на мордовском-мокша языке 2016

Иисусонь мельге моли аватне

¹ Курокста тяда меле Иисус тусь ошева и велева Шкаень Оцязорксшить колга Пара кулять азондома; мархтонза ульсть кемгафтувотне

² и мзярошка ава, конатнень Сон пчкафтозень кяжи ваймопожфта и урмада: Магдаласта Мария, конаста Иисус панць сисем кяжи ваймопожфт,

³ Хузань, Иродонь кудвятиенц, рьвац – Иоанна, Сусанна и ламоц лиятне, кит эсь уликсстост лездсть Иисусонди и Сонь тонафниензонды.

Валвеляфкс сёронь видить колга

⁴ Весть, мзярда пуромсь лама ломань – а Тейнза сашендсть сембе ошнень эзда – Иисус азондсь тейст валвеляфкс:

⁵ «Лиссь видись видема, и мзярда сон видесь, кона-кона видьмотне прасть кить ваксс, тапсевсть и нармоттне кочказь синь;

⁶ конат-конат прасть кеву вастс. Синь нолдасть лисьфкат и коськсть, сяс мес вастсна аф летьколь.

⁷ Кона-кона видьмотне прасть сялги тише ёткс, кассь тишесь и опаптозень лисьфкятнень.

⁸ А конат-конат прасть пара модас, синь кассть и кандсть сядонь-крда раштафкс». Тянь азомда меле Иисус ювадсь: «Кинь улихть кули пиленза, ся катк кульсы!»

Валвеляфксть смузец

⁹ Тонафниенза кизефтезь Сонь: «Мезень колга корхтай тя валвеляфкссь?»

¹⁰ Сон мярьгсь: «Тейнть максф содамс Шкаень Оцязорксшить салавашинзон, а лядыхненди корхтан валвеляфксса; тяфта синь ваныхть и аф няихть, кулхцондыхть и аф шарьхкодихть.

¹¹ Вов мезе тя валвеляфксть смузьса; видьмось – тя Шкаень вал.

¹² Ки ваксс прафне – нят сят, конат кульсазь валть, но сяльде сашенды идемэвозсь и салсесы валть седистост, сяс синь аф кемайхть кульфти и аф улихть идефт.

¹³ Кеву вастс прафне – нят сят, кит валть кулемста кенярдезь путсазь сонь седизост, но синь аш юрсна, сяс аф ламос кемайхть и стакашиса варчсемста потайхть кемамада.

¹⁴ Сялги тишес прафне, нят сят, кит кульсазь валть, но пингонь ётазь эрь шинь тефне, ярмаконь и топоцьта эряфонь мельге панцемась опаптсазь валть и сон аф максы раштафкс.

¹⁵ Цебярь модас прафне, нят сят, кит ляпе и ару седисост марясазь валть, ванфтсазь сонь и кирдемшкаснон вельде каннихть раштафкс». Азомок тянь, ювадсь: «Кинь улихть кули пиленза, катк кульсы!»

Валвеляфкс валдть колга

¹⁶ «Крьвястьф штатолть кивок аф вельхнесы кядьгоса, афи путсы удома вастть алу, а путсы сонь штатолонь кирдемас, няевоза валдоц сувайхненди.

¹⁷ Вдь сембе кяшфсь арай няевикс, и сембе салаваннесь арай содафокс и лиси лангти.

¹⁸ Сяс ванода эсь мельгант, кода тинь кулхцонттада. Вдь кинь ули, сянди максови, а кинь аш, сянь кядьста сявови сявок, мезть лувондсы сонценнекс».

Иисусонь тядяц и брадонза

¹⁹ Тяда меле Иисусти састь тядяц и брадонза, но лама ломань ёткова ашесть ётав Тейнза.

²⁰ Тейнза макссть содамс: «Тядяце и браттне ушесот, мяльсна няемс Тонь».

²¹ Иисус каршезост мярьгсь: «Монь тядязе и брадне нят, кит кулхцондсазь Шкаень валть и пяшкотькшнесазь сонь».

Иисус сетьмофтсы даволть

²² Фкя шиня Иисус Эсь тонафниензон мархта озась венчс и мярьгсь тейст: «Ётатама эрьхкть тона трвазонза». Синь кармасть ётама.

²³ Уемста Иисус матодовсь. Эрьхкса кеподсь давол, ведькомболксне лоськофнесть венчезост. Синь повсть пелькс палас.

²⁴ Тонафниенза нежедсть Иисусонди, стяфтозь: «Тонафты! Тонафты! Ваятама!» Сон стясь, кардазе вармать и ведень комболфть; сят лоткасть, и арась сетьме.

²⁵ Эста Сон мярьгсь тейст: «Коса кемаманте?» Тонафниенза эводембачк дивандазь корхтасть фкя-фкянди: «Кие Тя, кона кошярясыне варматьке, ведтьке, и сят кулхцондсазь?»

Иисус панцы аф ару ваймопожфть ломанть потмоста

²⁶ Сяльде синь уйсть Галилеять каршеста Гадарина мастору.

²⁷ Эрьхке трвав лисемста Иисусть каршес повсь ошень ломань, конань эса ульсть кяжи ваймопожфт, щапт сон кунаркиге ашезь щакшне, эрясь аф кудса, а калмонь кевботмарса.

²⁸ Сон кодак няезе Иисусонь, пешкодозь прась пильгозонза и вярьгак вайгяльхть ювадсь: «Иисус, Инь Вярдень Шкайть Цёрац, мезе Тейть эздон эряви? Эняльдян Тейть, тямак маятафта!»

²⁹ Сон мярьгсь тяфта сяс, мес Иисус кошардозе аф ару ваймопожфть лисемс тя ломанть потмоста. Куватьс ни тя ломанць повф аф ару ваймопожфть кядс, и хуш ломанть сотнекшнезь цинзерса кяднек-пильгонек, ванфтозь, сон сяка сязендезень цинзерхнень. И кяжи ваймопожфсь сонь панцезе шава вастова.

³⁰ Иисус кизефтезе сонь: «Кода лемце?» Сон каршезонза: «Легион», – мярьгсь тяфта, сяс мес лама кяжи ваймопожфта сувась эзонза.

³¹ Синь эняльдсть Иисусонди аф панцемс синь потмаксфтома томбати.

³² Тяка маласа, панда лангса, вановсь тувонь оцю стада; кяжи ваймопожфне эняльдсть Иисусонди: мярьгоза сувамда тувотнень потмос. Сон мярьгсь тейст.

³³ Кяжи ваймопожфне лиссть ломанть эзда и сувасть тувотнень потмос; тувонь стадась сери трваста комотсь эрьхкти и ваясь.

³⁴ Тувонь ваныхне, няемок мезе лиссь, ворьгодсть и азондозь тянь ошса и перьфпяльдень аймакова.

³⁵ Ломаттне састь ваномонза, мезе тиевсь. Иисусонди маладомста няезь ся ломанть, конаста лиссть кяжи ваймопожфне: сон ащесь озада Иисусонь пильгонзон ваксса, щаф-каряф, шумбра ёньца, и синь сявозень пелема.

³⁶ Няихне азондозь сафненди, кода пчкясь кяжи ваймопожфса колафсь.

³⁷ Эста Гадарина масторонь сембе ломаттне эняльдсть Иисусонди тумс тоста, сяс мес синь сявозень оцю пелема. Сон озась венчс, срхкась тумс меки.

³⁸ Алясь, конаста лиссть кяжи ваймопожфне, эняльдсь сявомда сонь мархтонза. Иисус мрдафтозе сонь, мярьгсь:

³⁹ «Мрдак кудозт и азонтк, кодама оцю тев тись тейть Шкайсь». Алясь тусь и азондозе марнек ошти, мезе тись тейнза Иисус.

Иисус вельмафтсы кулофста синагогань оцюнять стиренц и пчкафтсы сяряди авать

⁴⁰ Мзярда Иисус мрдась меки, ломаттне кенярдезь васьфтезь Сонь, сяс мес сембе учсть эсонза.

⁴¹ Вов сась Иисусонди синагогань оцюня, лемоцоль Иаир. Сон прась Иисусонь пильгс, эняльдсь сувамс пялонза.

⁴² Сонь ульсь кемгафтувошка кизоса фкя-тяка стирняц, кона кулома лангсоль. Тов молемста ломаттне пяк эцесть Иисусонди.

⁴³ Ётксостоль ава, кона кемгафтува киза сярядсь веронь шудемаса. Сон ётафтозе марнек уликсонц пчкафтыхнень лангс, но киндинге ашезь пчкафтов.

⁴⁴ Сон маладсь Иисусти фталда, токазе щам пенянц; эстокиге вероц лоткась шудемда.

⁴⁵ Иисус кизефтсь: «Кие токамань?» Кивок ашезь виденця, эста Пётр мярьгсь: «Тонафты! Ломаттне перьфкат эцезь эцихть!»

⁴⁶ Но Иисус мярьгсь: «Кати-кие токамань: Мон маряйне, кода эздон лиссь вий».

⁴⁷ Авась няйсы – аф сёпови, трнатозь мольсь и прась Иисусонь пильгс, и сембе ломаттнень инголе азондозе, кодама туфталонкса токазе Сонь и кода эстокиге пчкясь.

⁴⁸ Иисус мярьгсь тейнза: «Стирняй, тят пеле, кемамаце пчкафтонзе тонь; архт сетьмошиса».

⁴⁹ Иисус ашезе адела корхтаманцка, кода сась кати-кие синагогань оцюнять кудста и мярьгсь оцюняти: «Стирце кулось, тяк томошинда Тонафтыть».

⁵⁰ Тянь кулезь, Иисус мярьгсь Иаиронди: «Тят пеле, аньцек кемак – и стирце ули пчкафтф».

⁵¹ Куду самста Сон киндинге ашезь мярьге сувамс мархтонза потму, Пёторда, Иоаннда, Иаковда и стирнять тядядонза-алядонза башка.

⁵² Кудса сембе авардсть и явсесть стирнять инкса. Иисус мярьгсь: «Тяда аварде; сон ашезь кула, уды».

⁵³ Синь пеедсть Иисусонь лангса, вдь содазь шабать куломанц.

⁵⁴ Сон сявозе стирнять кядьта, кайгиста мярьгсь: «Стирня, стяк!»

⁵⁵ Стирнять ваймопожфоц мрдась. Сон эстокиге стясь; и Иисус мярьгсь андомс сонь.

⁵⁶ Тядянза-алянза дивандасть. Иисус мярьгсь тейст киндинге аф азондомс, мезе лиссь.