Лука 6 - Од Соткс Новый Завет на мордовском-мокша языке 2016

Ломанень Цёрась ваймамань шить лангса азор

¹ Весть ваймамань шиня Иисусти савсь ётамс сёронь паксява. Тонафниенза сязендсть сёрапрят, мямордазь коморсост и ярхцасть.

² Фарисейхнень эзда финцне мярьгсть тейст: «Мезенди тинь тиендьсасть сянь, мезе аф мярьгондеви тиендемс ваймамань шиня?»

³ Иисус каршезост мярьгсь: «Дяряй тинь ашесть лувонда, мезе тись Давид, мзярда вачсь сонцень пекоц и мархтонзотнень?

⁴ Сон сувась Шкаень куду и сявозень Шкайти кантф кшитнень, конатнень эзда, озксвятида башка, киндинге ашезь мярьгондев ярхцамс. Сон сонцьке ярхцась, ялганзонга андозень».

⁵ Иисус поладозе: «Ломанень Цёрась ваймамань шить лангсонга азор».

Иисус пчкафты ваймамань шиня

⁶ Омбоце ваймамань шитьке Иисус сувась синагогав и тонафтсь. Тоса ульсь фкя аля, конань види кядец коськоль.

⁷ Койти тонафтыхне и фарисейхне вешендсть туфтал муворгофтомс Иисусонь, сяс синь ванцть мельганза: кармай али аф пчкафтома ваймамань шиня.

⁸ Но Иисус содазень синь арьсемаснон, и мярьгсь коське кядь ломанти: «Стяк и арак сей, кучкати». Ся стясь и арась.

⁹ Эста Иисус мярьгсь тейст: «Мон кизефнетядязь тинь: мезе мярьгондеви тиемс ваймамань шиня, цебярь али кальдяв? Идемс эряфть али юмафтомс?» Синь кашт исть моле.

¹⁰ Сон ётафтозе ванфонц сембонь ланга, сяльде мярьгсь ся ломанти: «Венептьк кядцень». Ся тись стане; и сонь кядец пчкясь.

¹¹ Койти тонафтыхне и фарисейхне тянь няемста лиссть эсьстост кяжть эзда. Синь кармасть эсь ётковаст латцемонза, мезе тиемс Иисусонь мархта.

Кемгафтува апостолхне

¹² Ся шитнень Иисус куцсь панда лангс озондома, и ётафтозе марнек веть озондозь Шкайти.

¹³ Мзярда варьхмодсь, тердезень тонафниензон и кочкась ёткстост кемгафтува, конатнень лемдезень апостолкс, нят:

¹⁴ Симон, конанди путсь Пётр лем, Андрей – Симононь брадоц,

¹⁵ Иаков, Иоанн, Филипп, Варфоломей, Матфей, Фома, Алфеень цёрац – Иаков, Симон, конань лемнезь нинге Зилотокс,

¹⁶ Иаковонь цёрац – Иуда, и Иуда Искариот, кона меколи мисы Иисусонь.

Иисус тонафты и пчкафты ломатть

¹⁷ Иисус валгсь синь мархтост пандста и лоткась арся вастс. Тоза пуромфоль лама лия тонафнидонза, и пяк лама ломаньда, конат састь Иудеяста, Иерусалимста, Тир и Сидон ошнень оцюведь трвань аймакснон эзда.

¹⁸ Синь састь кулхцондомонза и урмаснон пчкафтома. Сашендсть аф ару ваймопожфонь колафневок, синьге пчксесть.

¹⁹ Сембе ломаттне ёрасть токафтомс кядьснон Иисусти, сяс мес Соньцтонза мольсь вий, кона пчкафнезень сембонь.

Кие павазу?

²⁰ Сон варжакстсь тонафниензон лангс и кармась корхтама: «Павазуфтада тинь, ашуфне, сяс мес тинь Шкаень Оцязорксшить алотада.

²¹ Павазуфтада тинь, тяни вачедотне, сяс мес топоттяда. Павазуфтада тинь, тяни авардихне, сяс мес кенярттяда и рахатада.

²² Павазуфтада тинь, мзярда Ломанень Цёрать инкса ломаттне афоледязь няе, паттядязь эсь ёткстост, сялттядязь и лувсазь лемонтеньге нильготьксокс.

²³ Кенярдеда ся шиня и комотнеда кенярдемада, сяс мес сембонь тянь инкса тейнть ули пяк оцю казне менельса. Вдь прокс тяфта тиендсть пророкнень мархта ня ломаттнень алясна.

²⁴ Но кальдяв тейнть, козят, вдь тинь ни сявость эсь кенярдемантень.

²⁵ Кальдяв тейнть, тяни вельф топоцьтот, вдь тинь вачтада. Кальдяв тейнть, тяни рахайхть, вдь тинь карматада авардема и явсема.

²⁶ Кальдяв тейнть, мзярда сембе ломаттне кармайхть колгант цебярьста корхтама: стане тиендсть синь алясна аф афкуксонь пророкнень мархта».

Кельгость аф кельгиентень

²⁷ «Но тейнть, кулхцондыхненди, корхтан: кельгость душманонтень, тиендеда цебярь аф кельгиентенди.

²⁸ Бславакшнесть сюдыентень и озондода сялдыентень инкса.

²⁹ Кие эрьхттянза фкя щёкати, ладяк тейнза омбоцетьке; кие нельгсы лангстот вярдень щамцень, тят шорсе тейнза сявомс панарценьге.

³⁰ Кядьстот эрь анайти макст, кие сявсь кядьстот, тяк ана меки.

³¹ Тиендеда ломаттнень мархта стане, кода мяленте синь тиендельхть мархтонт.

³² Кельгондярясасть тинцень кельгиентень, кодама шнама тейнть тянкса? Вдь пежуфневок эсь кельгиснон кельгсазь.

³³ Тиендярятада пара ся ломаттненди, конат тейнтьке тиендихть пара, кодама шнама тейнть тянкса? Вдь пежуфневок тяфта тиендихть.

³⁴ Максондярятада пандомда сятненди, кинь кядьста надиятада сявомс меки, кодама шнама тейнть тянкса? Пежуфневок макссихть фкя-фкянди пандомда, содасазь, сяльде максови тейст меки тняра.

³⁵ Но тинь кельгость душманонтень и тиендеда цебярь; эрти, кие анай кядьстонт пандомда, максода и тяда учсе меки пандома. Эста тейнть ули оцю казне, и тинь ульхтяда Инь Вярденнети идькс, сяс мес Сон цебярь аф пандыхнендинге, кяжихнендинге.

³⁶ Уледа тиньге кельгозь ужяльдикс, кода кельгозь ужяльди тинь Алянте».

Тяда суденда

³⁷ «Тяда суденда, и тиньге аф ульхтяда судендафт; тяда муворгофне киньге, тиньге аф ульхтяда муворгофтфт; ноляда ломанень шумот, тиньге шумонте нолдави.

³⁸ Максседа, тейнтьке максови: цебярь ункстамаса, конань шерьфтьсазь, матрасазь и марасазь пряда вельф, и каясазь элезонт; сяс мес кодама ункстамаса тинць ункстатада, стамса ункстави тейнтьке».

³⁹ Иисус азондсь тейст нинге валвеляфкс: «Вятневи али аф сокорти сокорсь? Кали аф кафцьке прайхть лоткс?

⁴⁰ Тонафнись аф уленди тонафтыдонза оцю; ина эрсь, тонафнеманц аделамда меле, ули тонафтыенц лаца.

⁴¹ Кода тон няйсак сардть кемай ялгацень сельмоса, но аф няйсак шочкть эсь сельмосот?

⁴² Ина кода мярьгат кемай ялгацти: "Ялгай! Эрька, таргаса сельмостот сардть", мзярда эсь сельмосот шочкть аф няйсак? Шамафксонь канни! Васенда таргак эсь сельмостот шочкть, эста няйсак, кода таргамс кемай ялгацень сельмоста сардть».

Шуфтсь содави иможензон коряс

⁴³ «Аш цебярь шуфта, кона кандоль кальдяв имож; и, меколанкт, аш кальдяв шуфта, кона кандоль цебярь имож.

⁴⁴ Эрь шуфтсь содави иможензон коряс; аф кочксихть кумбаравста инжир, и аф кочксихть сялги тишеста виноград.

⁴⁵ Цебярь ломанць эсь седиенц козяшиста лихти цебярь, а кяжи ломанць эсь седиенц козяшиста лихти кяж; вдь мезьда пяшксе ломанть седиец, ся и лиси кургстонза».

Валвеляфкс кафта кудонь путыхнень колга

⁴⁶ «Мес тинь лемнесамасть Монь: "Азор! Азор!" и аф тиендьсасть, мезьс кошярятядязь?

⁴⁷ Азса тейнть, кинь лангс шары эрсь, кие сашенды Тейне, кулхцондсыне валнень и тии коряваст:

⁴⁸ сон шары кудонь путы ломаненди, кона шувсь крхка лотка и путсь кев лангс кудъюр. Мзярда кеподсь шадось и ведсь эрьхтсь ся кудть лангс, сон ашезь шерьфтев, сяс мес лац путфоль.

⁴⁹ А кие кулхцондсыне валнень и коряваст аф тии – шары стама ломаненди, кона путсь модать лангс юрфтома куд. Мзярда лангозонза эрьхтсь ведь, сон эстокиге каладсь; и каладсь педа-пес».