Лука 5 - Од Соткс Новый Завет на мордовском-мокша языке 2016

Иисус тердьсыне васенце тонафнихнень

¹ Весть Иисус ащесь Геннисарет эрьхкть трваса. Ломаттне эцезь эцесть Тейнза Шкаень валть кулхцондома.

² Иисус няйсь эрьхкть трваса кафта венчт, а калонь кундайхне оргалязь кундамаснон венчснон ваксса.

³ Иисус озась фкя венчти, кона Симононнель, и эняльдсь тейнза аф ламода аердомс трвать эзда. Венчса озада Сон тонафтсь ломаттнень эса.

⁴ Мзярда аделазе, мярьгсь Симононди: «Паньк венчть крхка вастс и ёрдасть калонь кундамантень ведти».

⁵ Симон каршезонза мярьгсь: «Тонафты, минь покодеме веньберьф и мезевок ашеме кунда. Аньцек Тонь валцень инкса ёрдасайне калонь кундаматнень».

⁶ Синь тяфта и тисть – и кундасть сняра кал, мянь калонь кундамасновок кармасть сязендевома.

⁷ Синь яфчазь кядьснон омбоце венчста ялгаснонды, тердезь лездома. Сят састь, и пяшкодезь калса кафцьке венчнень сяшкава – нльне кармасть ваяма.

⁸ Тянь няемста Симон Пётр прась плманжа лангс Иисусонь инголи и мярьгсь: «Азор, архт маластон! Мон ломанць пежуван».

^9-10 Симононь и мархтонзотнень – ётксост Зеведеень цёранза Иаков и Иоанн, тя Симононь ялганза – пяк эвфтезень тняра калонь повомась. Иисус мярьгсь Симононди: «Тят пеле; тя пингста сявомок кармат ломанень кунцема».

¹¹ Синь таргазь кафцьке венчнень эрьхке трвати, кадозь семботь и тусть Иисусонь мельге.

Иисус пчкафтсы наксафты урмаса сярядить

¹² Мзярда Иисус ульсь фкя ошса, Тейнза сась ломань, кона марнек вельхтяфоль наксафты урмаса. Иисусонь няемста сон прась инголенза плманжа лангс и эняльдезь корхтазевсь: «Азор, Тейть аруяфтован, улеза мяльце».

¹³ Иисус венептезе кяденц, токафтозе сярядити и мярьгсь: «Ули мялезе, аруяк». Эстокиге наксафты урмась кадозе ломанть.

¹⁴ Иисус кошардозе сонь киндинге тянь колга аф азондомс, и мярьгсь: «Архт няфтть пря озксвятити и Моисеень коенц коряс кантт озксказне аруяфтомацень инкса. Тянь вельде тейст няфтьсак пчкамацень».

¹⁵ И нинге сяда пяк срадсть кулятне Иисусонь колга, и ламодонга лама ломань сашендсь кулхцондомонза и урмаснон пчкафтома.

¹⁶ Но Иисус сидеста тушендсь шава вастс и тоса озондсь.

Иисус пчкафтсы параличса колафть

¹⁷ Весть, мзярда Иисус тонафтсь, пуромфнень ёткса озафтольхть фарисейхть и койти тонафтыхть, конат састь Галилеянь и Иудеянь сембе васттнень эзда, Иерусалимстонга. Азорть виец Иисусть эсоль, сясы Тейнза пчкафтовсть сярядихне.

¹⁸ Вов мзярошка алят кандсть ацам лангса параличса колаф ломань, конань ёрасть сувафтомс куду и путомс Иисусонь инголи.

¹⁹ Ломаньда пяк ламоль и синь ётковаст ашесть ётав. Эста алятне куцсть кудбряв, сязезь вельхксть и нолдазь сярядить ацамнек кудгучкати Иисусонь инголи.

²⁰ Иисус няезе синь кемамаснон, мярьгсь сярядити: «Тонь пежетне нолдафт».

²¹ Койти тонафтыхне и фарисейхне кармасть арьсема: «Кие тяфтамсь, кона пеедьсы Шкайть? Шкайда башка, кинди нолдавихть пежетне?»

²² Иисус содазень синь арьсемаснон, мярьгсь: «Мезе тинь арьсетяда седисонт?

²³ Мезсь сяда тёждя азомс: "Тонь пежетне нолдафт" али азомс "Стяк и якак"?

²⁴ Но тяни содасть: Ломанень Цёрать ули азорксшиц модать лангса нолямс пежет», – и пшкядсь параличса колафти: «Корхтан тейть: стяк, сявк ацамцень и архт эсь кудозт».

²⁵ Ся эстокиге стясь сембонь сельминголе, сявозе ацамонц, конань лангса кандозь и, Шкайть шназь, тусь кудозонза.

²⁶ Сембе вельф абондсть, шназь Шкайть. Эводембачк корхтасть: «Тячи минь няеме тев, конанди стака кемамс».

Иисус тердьсы Левиень

²⁷ Тяда меле Иисус лиссь и няезе Левиень, каяфксонь кочкайть. Сон озадоль каяфксонь кочкама кудть ваксса. Иисус мярьгсь тейнза: «Мольхть Монь мельган».

²⁸ Левий кадозе семботь, стясь и тусь Иисусонь мельге.

²⁹ Сяльде Левий эсь кудсонза тись Тейнза оцю каваняма. Тоса ламоль каяфксонь кочкайда и лия ломаньда. Синь симсть-ярхцасть марса Левиень и Иисусонь мархта.

³⁰ Фарисейхне и ёткстост койти тонафтыхне изгордозь корхтасть Иисусонь тонафниензонды: «Кода тинь сиптяда-ярхцатада каяфксонь кочкайхнень и лия пежуфнень мархта?»

³¹ Иисус мярьгсь каршезост: «Пчкафтысь эряви аф шумбрати, а сярядити.

³² Мон сань пежуфнень Шкайти шарфтоманкса, а аф видексшиса эряйхнень».

Кизефкс постонь кирдемать колга

³³ Синь каршезонза мярьгсть: «Иоаннонь тонафниенза сидеста поставайхть и озондыхть; стане фарисейхнень тонафнисновок, ина Тоннетне симихть-ярхцайхть!»

³⁴ Иисус мярьгсь тейст: «Кали кошардовихть поставама рьвяяма илань инжихне, мзярда рьвяяйсь мархтост?

³⁵ Аньцек сайхть шит, мзярда сявсазь кядьстост рьвяяйть, вов эста, ся шитнень, синь кармайхть поставама».

³⁶ Иисус азондсь тейст тяфтама валвеляфкс: «Кивок аф панни ташта щамти од щамста сязьф панкс; афток одтьке сязендьсы, ташттинге од панкссь аф педи.

³⁷ Кивок аф кайси од вина кедень ташта кяскавс; каяндяряй – од винась сязендьсыне кяскафнень, винаське шуди, кяскафневок юмайхть.

³⁸ Од винась кайсема од кяскавга.

³⁹ Симондяряй кие сире винада, сянь аф ули мялец симомс одта; сон мярьги: сиресь сяда цебярь».