Лука 4 - Од Соткс Новый Завет на мордовском-мокша языке 2016

Идемэвозсь тяряфнесы сувафтомс Иисусонь пежес

¹ Иисус Иняру Ваймопожфта пяшкотьфста мрдась Иордан ляйть трваста и Ваймопожфсь вятезе Сонь шавмодав.

² Тоса идемэвозсь нильгемонь ши тяряфнезе Сонь сувафтомс пежес. Сембе ня шитнень Сон мезьдонга ашезь ярхца, и меколи пяк вачсь пекоц.

³ Идемэвозсь мярьгсь Тейнза: «Кда Тон Шкаень Цёрат, эста кошартк тя кевть арамс кшикс».

⁴ Иисус каршезонза мярьгсь: «Сёрматф: "Аф аньцек кшить вельде кармай эряма ломанць, но эрь валть вельде, кона лиси Шкайть кургста"».

⁵ Сяльде идемэвозсь вятезе Сонь сери панда пряс и эстокиге няфтезень Тейнза модалангонь сембе масторхнень.

⁶ Сон мярьгсь Иисусти: «Кядялот макссайне сембе ня масторхнень сембе козяшиснон мархта, сяс мес синь максфт тейне, и монь ули виезе максомс синь кинди мялезе.

⁷ Сюконяндярят тейне, эста тя сембось ули Тонь».

⁸ Иисус каршезонза мярьгсь: «Аертт эздон, Сатана. Сёрматф: "Азорти, Шкайцти сюконякшнек и аньцек Тейнза покотть"».

⁹ Эста идемэвозсь вятезе Сонь Иерусалиму, стяфтозе Шкаень кудть пряс и мярьгсь Тейнза: «Кда Тон Шкаень Цёрат, ёрдак тяста пря алу;

¹⁰ вдь сёрматф: "Шкайсь кошардсыне ангелонзон ванфтомс Тонь

¹¹ и кядьсост канттядязь Тонь, афоль пупорда Тонь пильгце кев лангс"».

¹² Иисус каршезонза мярьгсь: «Азф: "Тяк варчсе Азорть, Тонь Шкайцень виенц"».

¹³ Иисусонь тяфта и стане варчсемдонза меле, идемэвозсь мзярошка пингс тусь маластонза.

Иисус ушедозе Эсь покодеманц

¹⁴ Иняру Ваймопожфонь вийса Иисус мрдась Галилеяв. Сонь колганза кулясь срадсь сембе перьфпяльге.

¹⁵ Иисус тонафнезень ломаттнень синагогаваст, и сембе шнакшнезь Сонь.

Иисусонди аф кемайхть Назарет ошса

¹⁶ Иисус сась Назарету, коса кассь и, кода фалу ваймамань шиня, сувась синагогав. Сон стясь ломаттнень инголи Иняру Сёрматфксть лувома.

¹⁷ Тейнза максозь Исаия пророкть книганц; книгать панжемста Сон музе вастть, коса сёрматфоль:

¹⁸ «Азорть Ваймопожфоц Монь лангсон, сяс мес Сон вадемань-кочкамань Монь пачфтемс Пара кулять ашуфненди. Сон кучемань Монь пчкафтомс кольф седихнень, азомс пякстафненди воляс нолдамаснон колга и сокорхненди сельмонь панжемаснон колга. Сон кучемань Монь нолдафтомост люпштафнень,

¹⁹ и азомс тянь: сась Азорть кельгозь ужяльдемань пингоц».

²⁰ Иисус пякстазе книгать, максозе меки синагогань покодити и озась; сембонь сельмованфсна сялкфтольхть лангозонза.

²¹ Сон кармась корхтама тейст: «Тячи кулхцондомстонт пяшкодсь тя Сёрматфкссь».

²² Сембе ломаттне тянь кемокстазь и дивандакшнесть ся пара валхненди, конат лиссть Иисусонь кургста, и корхтасть: «Кали тя аф Иосифонь цёрац?!»

²³ Иисус мярьгсь тейст: «Вов, мярьктяда Тейне валмуворксонь валса: "Пчкафты, пчкафтк Эсь пряцень!" и "Тик тясонга, Эсь ошсотка сянь, мезе, кода минь кулеськ, Тон тиендеть Капернаумса"».

²⁴ И мярьгсь: «Видеста корхтан тейнть: кодамовок пророксь эсь ошсонза аф путневи пара лувксс.

²⁵ Видеста корхтан тейнть: Израильса ульсь лама удавада Илиянь пингста, мзярда колма кизот и кота кофт ашель пизем и марнек масторлангса ульсь вачаши,

²⁶ но Илия эздост конандинге апак кучтоль, аньцек Сидононь Сарепта ошста удавати.

²⁷ Тяфта Елисей пророкть пингстонга Израильса ламоль наксафты урмаса сярядида, но фкявок эздост ашель аруяфтф, Сириянь эряй Наманда башка».

²⁸ Тянь кулемста синагогаса сембонь пяшкодезень кяжсь.

²⁹ Синь стясть и панезь Иисусонь ошста; вятезь панда пряс, конань лангса ащесь синь ошсна, мяльсноль ёрдамс Сонь тоста алу пандт.

³⁰ Но Иисус ётась кучкаваст и тусь Эсь киганза.

Капернаумонь синагогаса

³¹ Иисус сась Галилеянь Капернаум ошу, тоса тонафнезень ломаттнень ваймамань шиня.

³² И дивандасть Сонь тонафтоманцты, сяс мес валсонза марявсь азорксши.

³³ Синагогаса ульсь аля, кона колафоль кяжи аф ару ваймопожфса, и сон ювадсь оцю вайгяльхть:

³⁴ «Назаретонь Иисус, мезе Тейть миньцтонк эряви? Тон сать юмафтомонк? Мон содате кият, Тон Шкаень Инярусь!»

³⁵ Иисус кемоста кардазе сонь, мярьгсь: «Лоткак корхтамда и листь эздонза!» Эста кяжи ваймопожфсь прафтозе алять ломаттнень ёткс, лиссь потмостонза мезеньге кальдявонь апак тик.

³⁶ Сембе дивандазевсть и корхтасть эсь ётковаст: «Мезе тя тяфтамсь Сон корхтай? Сон азорксшиса и вийса кардасыне аф ару ваймопожфнень и сят лисендихть».

³⁷ Иисусонь колга кулятне срадсть сембе перьфпяльге.

Иисус пчкафтсы Симононь авозенц и лия сярядихнень

³⁸ Синагогаста лисемда меле Сон сувась Симононь пяли. Симононь авозец пяк сярядсь, сон ульсь пси урмаса. Иисусонди эняльдсть лездомс тейнза.

³⁹ Иисус комась вельхксозонза и панезе пси урмать; урмась эстокиге кадозе сонь. Авась стясь и кармась синь перьфкаст шарома.

⁴⁰ Ши валгома ёткть ломаттне вятнезь и каннезь Иисусонди эрь кодама урмаса сярядиснон. Сон эрь сярядить лангс путнезень кядензон и пчкафнезе.

⁴¹ Ламотнень потмоста лисендсть кяжи ваймопожфневок, конат пешкодсть: «Тон Шкайть Цёрацат!» Но Сон карнезень синь корхтамда, сяс мес синь содазь: Сон – Христоссь.

Иисус тонафты Иудеяса

⁴² Варьхмодемшовор Сон лиссь ошста и тусь шава вастс. Ломаттне вешендезь Сонь, и мзярда музь, кармасть кирнемонза, афоль ту эздост.

⁴³ Но Сон мярьгсь тейст: «Тейне лия ошеванга эряви кандомс Пара кулять Шкаень Оцязорксшить колга, вдь Мон тянкса кучфан».

⁴⁴ Сон стаки тонафтсь Иудеянь синагогава.