Лука 3 - Од Соткс Новый Завет на мордовском-мокша языке 2016

Иоанн Кстиндайсь аноклай ки Азорти

¹ Тиверий кесарть кеветиеце кизонь оцязорондамста – мзярда Понтий Пилат азорондась Иудеяса, Ирод оцюняль Галилеяса, Филипп, сонь брадоц, оцюняль Итуреянь и Трахонитонь масторхнень эса, а Лисаний оцюняль Авилинеяса,

² и озксвятиень оцюнякс ульсть Анна и Каиафа – Шкайсь пачфтезе Эсь валонц Иоаннонди, Захариянь цёранцты, кона эрясь шавмодаса.

³ Тяда меле Иоанн кармась якама Иорданть перьфке ащи масторхнень ланга: тернезень ломаттнень шарфтомс Шкайти и кстиндафтомс пряснон пежетнень нолдаманкса.

⁴ Лиссь стане, кода сёрматф Исаия пророкть книгаса: «Серьгядить вайгялец кайги шавмодаса: "Аноклада Азорти ки, видептесть Тейнза китнень-яттнень!

⁵ Эрь лашмось пяшкодеза, эрь пандсь и губорсь алнялгодоза, кичкор китне видемост, лотку-латкуфне вадявгодост.

⁶ И эрь ломанць няйсы Шкайть эзда идемать!"»

⁷ Пяк лама ломань сашендсь Иоаннонди прянь кстиндафтома. Сон корхтась тейст: «Пупай куень лефкст! Кие тонафтодязь тинь ворьгодемс Шкайть сай пингонь судонц эзда?

⁸ Эсь тевсонт няфтесть Шкайти шарфтомантень, и тяда арьсе идемс прянтень валса: "Минь аляньке – Авраам". Корхтан тейнть: Шкайсь машты тиемс ня кефнень эзда Авраамонди итть.

⁹ Узерсь ащи ни шуфттнень юрснон ваксса: эрь шуфтть, кона аф канды цебярь имошт, керсазь и ёрдасазь толти».

¹⁰ Ломаттне кизефтезь сонь: «Мезе ина тейнек тиемс?»

¹¹ Сон мярьгсь каршезост: «Кинь кафта панардонза, ся максозазе фкять сянди, кинь прокс аш; кинь ули ярхцамбялец, тиеза тяка лаца».

¹² Каяфксонь кочкайхневок састь прянь кстиндафтома. Синь мярьгсть Иоаннонди: «Тонафты, мезе тейнек тиема?»

¹³ Сон каршезост мярьгсь: «Тяда сяве каяфкс сяда лама мярькфть коряс».

¹⁴ Кизефнезь сонь ушматтневок: «Тейнек ина мезе тиема?» Тейст мярьгсь: «Аф вихца, аф люпштазь тяда ватка киньге кядьста ярмак, сатфтость сянь, мезе пандови тейнть покодеманкса».

¹⁵ Ломаттне учендозь Христость, и седисост арьсекшнесть Иоаннонь колга: «Афоли сон Христоссь?»

¹⁶ Иоанн тянь каршес корхнесь сембонди: «Мон кстиндатядязь тинь ведьса, но мельган сай мондедон Виись, и мон аф кондястян нльне сандалия шнанянцка юксомс. Сон кармай тинь кстиндамонт Иняру Ваймопожфса и толса.

¹⁷ Сонь кядьсонза каймоц, Сон понжафтсы сёроть тинголангса. Тозерть кочкасы утому, а ювть плхтасы аф мадонды толса».

¹⁸ Тяфтама и лама лия валса корхтась Иоанн ломаттненди Пара кулять азондомста.

¹⁹ Иоанн лихнезень лангу Ирод оцюнять сембе зияну тевонзон и Иродиадань мархта эряманцка, вдь Иродиада туфоль рьвакс Иродонь брадонцты.

²⁰ Ирод касфтозень аноконь кальдяв тевонзон лувксснон, мзярда сёлгозе Иоаннонь пякстамгудс.

Иисусонь кстиндамац

²¹ Ламотне кстиндафтсть пря Иоаннонь кядьста. Иисусовок кстиндафтсь пря и, мзярда Сон озондсь, панжевсь менельсь,

²² и Иняру Ваймопожфсь няевиста, гуляня лаца валгсь Сонь лангозонза, и менельста кулевсь вайгяль: «Тон Монь кельгома Цёразят; Тон Монь кенярдемазят!»

Иисусонь атянь-атянза

²³ Иисусти Эсь покодеманц ушедомста колмогемоньшка кизоль, и Сон ульсь, кода ламотне арьсесть, Иосифонь Цёрац, кона ульсь цёракс Илиянди.

²⁴ Иисусонь лядыкс атянь-атянза ульсть: Матфат, Левий, Мелхий, Ианнай, Иосиф,

²⁵ Маттафия, Амос, Наум, Еслим, Наггей,

²⁶ Мааф, Маттафия, Семей, Иосиф, Иуда,

²⁷ Иоаннан, Риса, Зоровавель, Салафиил, Нирий,

²⁸ Мелхий, Аддий, Косам, Елмодам, Ир,

²⁹ Иосий, Елиезер, Иорим, Матфат, Левий,

³⁰ Симеон, Иуда, Иосиф, Ионан, Елиаким,

³¹ Мелеай, Маинан, Маттафа, Нафан, Давид,

³² Иессей, Овид, Вооз, Салмон, Наассон,

³³ Аминадав, Арам, Есром, Фарес, Иуда,

³⁴ Иаков, Исаак, Авраам, Фарра, Нахор,

³⁵ Серух, Рагав, Фалек, Евер, Сала,

³⁶ Каинан, Арфаксад, Сим, Ной, Ламех,

³⁷ Мафусал, Енох, Иаред, Малелеил, Каинан,

³⁸ Енос, Сиф, Адам, тянь аляц ульсь Шкайсь.