Лука 24 - Од Соткс Новый Завет на мордовском-мокша языке 2016

Иисусонь вельмамац

¹ Недляшиня, варьхмодемшовор, аватне сявозь аноклаф вадендемаснон и састь калмоти, синь мархтост састь лиятневок.

² Синь няезь, кевсь калмоть эзда веляфтфоль.

³ Потму сувамста синь ашезь му Иисус Азорть ловажанц.

⁴ Мзярс синь абонкшнесть, апак учт инголест эвондасть пиндолды щамса кафта алят.

⁵ Эводемать эзда аватне нолдазь сельмоснон алу, но алятне тейст азозь: «Мес вешендьсасть шистоть кулофнень ёткста?

⁶ Сон аш тяса. Сон вельмась кулофста. Лятфтасть, мезе Сон корхтась тейнть Галилеяса улемстонза:

⁷ "Улема тянди: Ломанень Цёрась максови пежу ломаттнень кядьс, ули эськотьф крёзти, и колмоце шиня вельмай"».

⁸ Эста аватне лятфтазь Иисусонь валонзон.

⁹ Калмолангста мрдамстост синь азондозь семботь тянь кефкие апостолхненди и сембе лиятненди.

¹⁰ Ня аватне, конат азондсть апостолхненди тянь колга, ульсть Магдалань Мария, Иоанна, Мария – Иаковонь тядяц и лиятне, конат синь мархтостольхть.

¹¹ Синь валсна марявсть апостолхненди шавокс, сяс ашесть кема тейст.

¹² Но Пётр ласькозь тусь калмоти. Тоса сон комась, варжакстсь потму и няезень аньцек иляназонь котфнень. Сон мрдась меки, и пяк дивандась сянди, мезе лиссь.

Иисус эвондай тонафниензонды Эммаусу вяти ки лангса

¹³ Сяка шиня Иисусонь кафта тонафниенза мольсть Эммаус вели, кона Иерусалимть эзда кефкиешка вайгяльбе вастсоль.

¹⁴ Синь корхнесть эсь ётковаст сембе ся тефнень колга, конат лиссть.

¹⁵ Мзярда синь корхнесть и арьсесть тянь колга, Сонць Иисус маладсь тейст и тусь мархтост.

¹⁶ Но синь ашезь сода Сонь, сяс мес сельмосна ульсть бта вельхтяфт.

¹⁷ Иисус пшкядсь тейст: «Мезень колга тинь молембачк корхтатада и мес тинь шаманте тяшкава пичефксуфт?»

¹⁸ Эздост фкясь, конань лемоцоль Клеопа, каршезонза мярьгсь: «Кали Тон ськамот Иерусалиму сафнень эзда аф содасак, мезе лиссь тоса ня шитнень?»

¹⁹ Иисус кизефтезень: «Мезе ина?» Синь азозь Тейнза: «Ся, мезе лиссь Назаретонь Иисусть мархта, кона ульсь прорококс, вииель тевса и валса Шкайть и сембе ломаттнень инголе;

²⁰ и кода озксвятиень оцюнятне и Израилень оцюняньке максозь Сонь куломас, и эськодезь крёзти.

²¹ Ина минь надиякшнеме, Сон вчёк Ся, кона идесы Израильть. Аньцек тя нинге аф сембе. Вов ни колмоце шись тусь, кода тя лиссь,

²² а тяса кона-кона миньцень ёткстонк аватне пяк дивандафтомазь: синь ульсть сенем валдоняста калмоса

²³ и ашезь му тоста Сонь ловажанц. Мрдамста азондозь, кода тейст эвондасть ангелхт, конат корхтасть: Иисус шиса.

²⁴ Ёткстонк мзярошкась тусть калмоти и музь семботь стане, кода корхтасть аватне; но Сонцень ашезь няе».

²⁵ Эста Иисус мярьгсь тейст: «Вай, кодань тинь аф шарьхкодихтяда и конашкава стакаста кематада семботи сянди, мезень колга корхнесть пророкне!

²⁶ Кали аф тяфта вчёк эрявсь кирдемс сталмот Христости и сувамс Эсь иневалдозонза?»

²⁷ И Сон ёфнезень тейст сембе васттнень Сёрматфксста, коса корхтави Сонь колганза, сявомок Моисейста и сембе пророкнень эзда.

²⁸ Синь маладсть ся велети, ков мольсть. Иисус тись пря сяда тов моликс.

²⁹ Но синь ушедсть кирнемонза: «Илятт мархтонк, шись илядьбяли, шопотькшни». Сон сувась куду и илядсь мархтост.

³⁰ И мзярда мархтост ащесь шрать ваксса, Сон сявозе кшить, бславазе, синдезе и максозе тейст.

³¹ Эста тонафнихнень сельмосна панжевсть и синь содазь Иисусонь. Но Сон арась тейст аф няевикс.

³² Синь фкя-фкянди мярьгсть: «Кали ашесть пала минь седиеньке, мзярда Сон корхтась тейнек ки лангса и мзярда панжезе тейнек Сёрматфксть смузенц?»

³³ Тонафнихне эстокиге стясть и тусть меки Иерусалиму. Тоса синь музь кефкие апостолхнень и лия тонафнихнень, конат пуромфтольхть марса.

³⁴ Пуромфне азондозь тейст: «Азорсь афкукс вельмась кулофста и Сон эвондась Симононди».

³⁵ Синьге азондозь, мезе лиссь ки лангса, и кода синь содазь Иисусонь кшинь синдемста.

Иисус няфти пря тонафнихненди

³⁶ Мзярда синь корхтасть тянь колга, Сонць Иисус арась кучказост и мярьгсь тейст: «Сетьмоши тейнть!»

³⁷ Синь абондсть и эводембачк арьсесть – няихть шопача.

³⁸ Но Иисус мярьгсь тейст: «Мес тинь эводеде и мес тинь седиентень фатязе абонкссь?

³⁹ Варжакстода кяднень и пильгонень лангс; тя – Мон Монць. Токамасть Монь и ваномасть; шопачать аш пукшенза и пакаренза, а Монь улихть».

⁴⁰ Тянь азомста Сон няфтезень тейст Эсь кядензон и пильгонзон.

⁴¹ Мзярда синь кенярдемать эзда нинге ашесть кема и дивандакшнесть, Сон мярьгсь тейст: «Тинь ули тяса мезентевок ярхцамс?»

⁴² Синь макссть Тейнза рястаф кал пакш и медь кяряз.

⁴³ Сон сявозе и ярхцась инголест.

Иисус максы тонафнихненди оцюдонга оцю тев и надияфты кучемс тейст Иняру Ваймопожфть

⁴⁴ Иисус мярьгсь тейст: «Вага кодама смузьсна ся валхнень, конатнень Мон азондыне тейнть нинге мархтонт улемста. Пяшкодевома семботи, мезе тяштьф колган Моисеень койса, пророкнень книгасост и Псалтирьса».

⁴⁵ Тяда меле Иисус панжезе синь ёньцнон Сёрматфксть шарьхкодеманцты.

⁴⁶ Сон мярьгсь тейст: «Тяфта сёрматф: Христости эрявсь маятамс и колмоце шиня вельмамс кулофнень эзда.

⁴⁷ И Сонь лемсонза эряви тердемс сембе ломаньтналхнень шарфтомс Шкайти пежеснон нолдафтоманкса. Ушедода Иерусалимста.

⁴⁸ Тинь тянь няфтиенза-азондыенза.

⁴⁹ Мон кучса тейнть сянь, мезе надияфнесь Алязе; но илядода Иерусалимса вярдень вийса пяшкодевомазонт».

Иисусонь кеподемац менели

⁵⁰ Иисус лихтезень синь ошста Вифанияти самс. Сон кеподезень кядензон и бславазень синь.

⁵¹ Бславамбачк Иисус кармась аердома эздост и ульсь кепотьф менели.

⁵² Синь сюконясть Тейнза и оцю кенярдема мархта мрдасть Иерусалиму.

⁵³ Шкаень шназь, синь сембе пингть ульсть Шкаень кудса. Аминь.